¹ Makse rasul be aku? Makse ulun bebas be aku? Makse aku be yo sundok kito Yesus, Tuhan taka? Makse be ikam ene bua gawi gata ku lang Tuhan? ² Beta ko mbo ulun yo mak aku makse rasul, tapi mbo ikam aku beta-beta rasul. Koe bolum kam lang Tuhan ene doko mtrai kerasulan ku. ³ Endo doko tuing ku epo dero yo msala aku. ⁴ Belo be kain keo hak nte kuman nyingkap? ⁵ Belo be kain keo hak nte moit erai kongo bawe Kristen, lang ju lang kain, kati gawi rasu-rasul yo mak ai eraibuntung-eraibuntung Tuhan ai Kefas? ⁶ Ungka-ungka aku diang Barnabas tingen be yo belo keo hak nte bebas ngket gawi gata nte staket? ⁷ Ise ulun yo pini lumpat prang diang ongkos-iyo se? Ise ulun yo ngulo anggur ai belo kuman bua-iyo? Ktine low ise ulun yo ngamu deo domba ai yo belo ngisop susu domba ene? ⁸ Ise yo ulek ku endo makse kno ulun tingen. Mba be aturan Taurat se low ngulek ktine? ⁹ Koe lang aturan Musa keo tnulis: "Nang beta iko nglei bowa lmbu yo desung nguyas!" Lmbu be yo knuon Allah? ¹⁰ Ena belo taka be ptua Io ene? O o, nte taka doko nau umbang ene tnulis, yo doko ulun nyangkul arus nyangkul diang beta-beta kakan minte asil ai yo nguyas arus nguyas diang beta-beta nte kuli asil nte-iyo. ¹¹ Jadi ena kain sundok ngulo bini rohani nte ngkam, mroa ogot balo be, ena kain ngutik asil dnia endo ngket ikam? ¹² Ena ulun yo mak keo hak nte kakan yo ktine ngket ikam, belo be aso da-da kain? Tapi kain belo di makai hak ene. Mokin ube kain nanggung eka ise masam, apa kain belo nmpoyo tugas nyampe Injil Kristus. ¹³ Belo tau be ikam, se dero yo nglaku tugas lang awa kudus kuli pnymbolum-iyo ngket awa kudus ene ai se dero yo nglaku tugas mezbah, kuli bagi nte dero ngket mezbah ene? ¹⁴ Ktine low Tuhan sundok ngatur, se dero yo nyampe Injil, arus bolum ngket tugas nyampe Injil ene. ¹⁵ Tapi aku ndok sindai belo pini makai hak ene. Aku belo di nulis eka-eka endo apa aku kinotine low. Koe aku gawal ube mate se...! Beta-beta ka, ise ka low ulun-iyo belo keo yo kuli nmbelo knuon ku. ¹⁶ Koe ena aku nyampe Injil, belo di nte ngnuon kompu tonga ku se. Koe ene tugas ku yo belo kate belo gnawi. Ssa beta aku, ena aku belo nyampe Injil. ¹⁷ Koe ena aku nggawi ene kati ptua ku se, aku keo hak nte nrima upa. Tapi koe aku nglaku ene belo di kati pngkakan ku se, nyampe ene doko memang tugas ai tanggungjawabku ngket Tuhan. ¹⁸ Ena ktine ise upa ku? Upa ku yo doko endo: se aku kate nyampe Injil belo di keo upa, ai se aku belo makai hakku nte nyampe Injil. ¹⁹ Beta ko aku bebas diang eka ulun, aku nampa aku se jadi batak eka ulun, apa aku kuli ulun deo-deo aso. ²⁰ Ktine doko nte ulun Yahudi aku jadi kati ulun Yahudi, apa aku kuli ulun-ulun Yahudi ene. Nte ulun-ulun yo bolum la iwat aturan Taurat aku jadi kati ulun yo bolum la iwat aturan Taurat, betako aku se belo di bolum la iwat aturan Taurat, apa aku kuli dero yo bolum la iwat aturan Taurat ene. ²¹ Nte ulun-ulun yo belo di bolum la iwat aturan Taurat aku jadi kati ulun yo belo di bolum la iwat aturan Taurat, betako aku belo di bolum la baling aturan Allah, koe aku bolum la iwat aturan Kristus, apa aku kuli dero yo belo di bolum la iwat aturan Taurat. ²² Nte ulun-ulun yo gle aku jadi kati ulun yo gle, apa aku kuli nylamat dero yo gle. Nte eka-eka ulun aku sundok jadi ba, apa aku kate kuli tenu-tenu kongo dero. ²³ Eka-eka endo gawiku koe Injil, apa aku keo pngkuli langne. ²⁴ Belo be ikam tau, se mbo lapangan main eka yo lumpat sama-sama monsit, tapi erai kongo bute yo kuli adiah? Koe ene doko monsit beta-beta, ndok kuret. ²⁵ Tongku-tongku ulun yo lumpat main, io ngatur kompu tonga io se lang ise masam. Gawi dero ktine nte kuli adiah yo tau rusak, tapi taka nte kuli adiah yo kden. ²⁶ Koe ene aku monsit belo di asal monsit ai aku belo di nyagur smbarang sagur. ²⁷ Tapi aku nglampa kompu tonga ku ai aku ngatur eka-eka iyo, apa ena sundok nyampe Injil, nang aku se noding.