¹ Aku kakan, apa ikam tau, eraibuntung-eraibuntung, se itak kakah taka eka keo mbo bsilingu iwat jaun ai se dero eka sundok kentas tasik. ² Nte jadi lumpat Musa dero eka sundok bnaptis lang jaun ai lang tasik. ³ Eka dero sundok kuman okan singkap rohani yo sama ⁴ ai dero eka ngisop pngisop rohani yo sama, koe dero ngisop ngket batu karang rohani yo lumpat diang dero, batu karang ene yo doko Kristus. ⁵ Tapi beta ko ktine aso deo ube ngket dero Allah belo sengkono kesong, koe ene dero pnate mbo padang gurun. ⁶ Eka-eka endo sundok terjadi nte sontoh nte taka, nte mkenop taka, apa taka nang nengkakan ise-ise yo dat kati yo nlaku koe dero, ⁷ ai apa taka nang jadi tukang nyembah uok ouk, sama kati tenu-tenu kongo ngket dero, kati keo tnulis: "Jadi tunge ka bangsa ene nte kuman ngisop; laju uat ka dero diang ego-ego." ⁸ Nang beta taka njoun gawi pokeng, kati yo nlaku tenu-tenu kongo ngket dero, sampe sundok duo pulu tolu ribu ulun mate lang erai olo. ⁹ Ai nang ka taka nyoba Tuhan, kati yo nlaku tenu-tenu kongo ngket dero, sampe dero mate tingkut nipo. ¹⁰ Ai nang ka ngemamay diang kesong memelensu, kati yo nlaku tenu-tenu kongo ngket dero, sampe dero pnate koe mlekat maot. ¹¹ Eka-eka endo sundok kono mitek dero nte sontoh ai tnulis nte mkenop taka yo bolum mbo des, ela mone pnyundok jaman sundok sampe. ¹² Koe ene ise yo san io, se pngakat io turon, ati-ati apa io nang pukan! ¹³ Pengkono-pengkono yo kono ikam ene pengkono biasa, yo belo di lengkat se pngelian ulun. Koe Allah stia ai koe ene yo belo di mie ikam snoba lengkat se pngelian kam. Des ikam snoba Io mie ikam boyan baling, koe ene ikam klian nantaiiyo. ¹⁴ Koe ene, eraibuntung-eraibuntungku yo knosang, kinoliki nyembah uok ouk! ¹⁵ Aku bsara epo ikam kati ulun-ulun deo pentau. Knanam kam se ise yo ulek ku! ¹⁶ Belo be cawan pngucapan sukur, yo omboniyo taka ngulek sukur, yo doko persekutuan diang daya Kristus? Belo be roti yo tinompotu-tinompotu koe taka ene perseketuan diang kompu Kristus? ¹⁷ Koe roti ene doko erai, jadi taka, tontan ko deo, ene erai kompu, koe taka eka kuli bagian lang roti yo erai ene. ¹⁸ Eti beta-beta bangsa Israel mbo sipat ulun biasa: Belo be dero yo kuman ise yo dnie nte persembahan kuli bagian lang playanan mezbah? ¹⁹ Ise yo ptua ku diang pnyurah ene? Se persembahan epo uok-ouk ene ise-ise? ena belo se uok-ouk ene ise-ise? ²⁰ Makse! Ise yo ptua ku yo ene, persembahan ene persembahan epo roh-roh dat, belo di epo Allah. Ai aku belo kakan, ikam bgabung diang roh-roh dat. ²¹ Ikam belo kuli ngisop ngket cangkir Tuhan ai low ngket cangkir roh-roh dat. Ikam belo kuli bagian lang perjamuan Tuhan ai low lang perjamuan roh-roh dat. ²² Ena belo kakan be taka ngati woyu Tuhan? Aso galak memang be taka se Io? ²³ "Eka ene kate ba." Beta, tapi belo di eka ene keo jodo. "Eka ene kate." Beta, tapi belo di eka ene nte mturon iman. ²⁴ Nang ndok erai kongo yo meto untung nte yo se, tapi moko yo tongku ulun meto untung nte ulun yo mak. ²⁵ Ikam kate kuman eka ise masam yo jnual ela pakot ulak-lekon, belo di koyoh mresa ono koe pngenanam boyat lang kesong. ²⁶ Koe: "Dnia diang eka atok yo ene mpun Tuhan." ²⁷ Ena ikam nirak nte kuman koe ulun yo belo di percaya, ai irak ene trima kam, okan ka ise yo nugah epo ikam, belo di koyoh mresa koe pngenanam boyat lang kesong. ²⁸ Tapi ena ulun ngulek epo ikam: "Ene persembahan uok-ouk!" Nang ka ikam kumaniyo, koe io yo ngulek ene epo ikam ai pngenanam boyat lang kesong. ²⁹ Yo ptua ku diang pngenanam boyat ene makse pngenanam boyat lang kesong kam se, tapi pngenanam boyat lang kesong ulun mak ene. Bahe keo ulun yo ngulek: "Ise moko kbebas ku arus atur koe pngenanam boyat kesong ulun mak? ³⁰ Ena aku ngulek sukur epo okan singkap yo aku lumpat kumaniyo, Ise moko ulun ngesah yo triaw se aku koe okan singkap, yo nte okan singkap ene sundok aku ngendoa sukur?" ³¹ Aku nuing: Ena ikam kuman ai ena ikam ngisop, ena belo ikam nggawi yo mak, gawi ka eka-eka ene nte kmulia Allah. ³² Nang ikam nampa dat pngenanam lang kesong ulun, ktine epo ulun Yahudi, ktine low ulun Yunani ktine low epo Jmaat Allah. ³³ Sama kati aku low bkomer nte msenang eka kesong ulun diang ise ka, belo di nte oki se, tapi nte ulun deo, apa dero kuli slamat.