¹ Sarak ka nau bolum ku, kati aku low nyarak nau bolum Kristus. ² Aku arus muji ikam, koe lang eka ise masam ikam nokon kenop se aku ai turon skongkong epo tutui batuk yo sampe ku epo ikam. ³ Tapi aku kakan,apa ikam tau nau umbang endo,yo ene Pengutok ngket tongku bangsong io doko Kristus,pengutok ngket bangbawe io doko bangsong ai Pengutok ngket Kristus io doko Allah. ⁴ Tongku bangsong yo bdoa ai bernubuat diang utok btokom,ngina utok iyo. ⁵ Tapi tongku bangbawe yo bdoa ai nubuat diang utok yo belo btokom,ngina utok iyo, koe io sama kati bang bawe yo notok balo iyo. ⁶ Koe ena bangbawe belo kakan nokom utok iyo,jadi arus low io notok balo iyo.Tapi ena nte bangbawe ene nte jadi ngemai,koe balo iyo tnotok ai pnulang,jadi arus io nokom utok iyo. ⁷ Koe bangsong belo koyoh nokom utok iyo;io cermin gambar ai kemulia Allah.Tapi bangbawe cermin kemulia bangsong. ⁸ Koe bangsong belo di ulet ngket bangbawe,tapi bangbawe ulet yo ngket bangsong. ⁹ Ai bangsong belo di tnampa koe bangbawe,tapi bangbawe tnampa koe bangsong. koe ene, ¹⁰ koe ene, bangbawe arus makai tanda kuasa ela utok iyo koe mlekat-mlekat. ¹¹ Beta ko ktine, lang Tuhan belokeo bangbawe ena belokeo bangsong ai belokeo bangsong ena belokeo bangbawe. ¹² Koe sama kati bangbawe pngulet yo ngket bangsong,ketine low bangsong kinomekus koe bangbawe;ai eka ise masam ulet yo ngket Allah. ¹³ Soba knanam kam se:Pantas be bangbawe bdoa epo Allah diang utok yo belo btokom? ¹⁴ Belo be dnia endo sundok mkelak epo ikam, koe ene hina nte bangsong,ena io keo balo anjang, ¹⁵ tapi se hormat nte bangbawe,ena io keo balo anjang?Koe balo dnie epo bangbawe nte jadi penokom. ¹⁶ Tapi ena keo ulun kakan nglawan,kain ene low jemaat-jemaat Allah belo keo pnepet yo ketine. ¹⁷ Lang peraturan-peraturan yo sori endo oli aku belo kuli memuji ikam,koe bkumpul-bkumpul kam belo mekulet yo buen,tapi mekulet yo dat. ¹⁸ Koe tla-tla aku kringo, se ena ikam bkumpul jadi jemaat,ikam keo bako tangki,ai nau umbang ene idi olai aku persaya. ¹⁹ Koe ela ekang ikam arus keo bako tangki,apa melak nindo ise lelu ikam yo tahan uji. ²⁰ Ena ikam bkumpul,ikam belo di bkumpul nte kuman perjamuan Tuhan. ²¹ Koe ela perjamuan ene tongku ulun kuman ile okan singkap yo se,sampe yo erai kongo siet lau ai yo mak braran. ²² Belo be ikam keo lou blai nte awa kuman ngisop?Ena belo kakan be ikam ngina jemaat Allah ai ngemayi ulun-ulun yo belo keo ise-ise?Ise yo ulek ku epo ikam?Muji ikam?Lang nau umbang endo aku belo muji. ²³ Koe ise yo sundok tlaju ku epo ikam,sundok trima ku ngket Tuhan,yo ene se Tuhan Yesus, montuk malom des Io snerah,ngalek roti, ²⁴ trus sundok ene Io ngulek syukur omboniyo;Io nbis-nbisiyo ai ngulek:"Ndo doko kompu-Ku,yo snerah nte ngkam;joun ka endo nte jadi pkenop se Aku!" ²⁵ Ketine low io ngalek cawan,sundok kuman,laju ngulek:"Cawan endo yo doko perjanjian bayu yo dimeteraikan koe daya-Ku;joun ka endo,tongku derang ikam ngisop iyo, nte jadi mkenop se Aku!" ²⁶ Koe tongku derang ikam kuman roti endo ai ngisop cawan endo,ikam ngabar pengemate Tuhan sampe Io ulet. ²⁷ Jadi ise-ise ulun diang sara yo belo pantas kuman roti a ai ngisop cawan Tuhan,io bdosa epo kompu ai daya tuhan. ²⁸ Koe ene moko yo tongku ulun nguji kompu yo se ai bayu sundok ene io kuman roti ai ngisop ngket cawan ene. ²⁹ Koe ise-ise ulun yo kuman ai ngisop belo ngangkan se kompu Tuhan,io memekulet hukuman nte io se. ³⁰ Koe ene deo ngket ikam yo lome ai kroton,ai belo di trini yo mate. ³¹ Ena taka nguji kompu taka se,hukuman belo kono taka. ³² Tapi ena taka kuli hukuman ngket Tuhan,taka bnatuk,apa taka belo anta nukum sama-sama diang dnia. ³³ Koe ene, erai buntung-erai buntung ku,ena ikam bkumpul nte kuman,inte ka erai-erai. ³⁴ Ena keo ulun yo siet lau,alo ka io kuman ile mbo lou io,apa ikam nang bkumpul nte nukum. Nau umbang-nau umbang yo mak anta aturku, ena aku ulet.