¹ Tmpo ndo nau umbang pendiye-pendiye Roh. Aku kakan, erai buntung-erai buntung, apa ikam tau kebetaiyo. ² Ikam tau, se des ikam aso belo pian tau se Allah, ikam belo mikir se bekoit epo uok ouk yo belo tau besara. ³ Koe ene aku kakan nampa ikam persaya, se ndok belo keo erai kongo yo besara koe Roh Allah, kuli ngulek: "selaka beta Yesus!" ai ndok belo keo erai kongo, yo kuli ngangkan: "Yesus ene doko Tuhan", makse ko koe Roh Kudus. ⁴ Keo bemasam pendiye, tapi Roh erai. ⁵ Ai keo bemasam pelayanan, tapi Tuhan erai. ⁶ Ai keo bejenis-jenis gawi gata ajaib, tapi Allah yo erai ene lou yo ngenjoun eka-eka ene lang eka-eka ulun. ⁷ Tapi epo tongku ulun deniye pemekelak ngket Roh nte kepentingan sama-sama. ⁸ Koe epo erai kongo Roh miye karunia nte besara diang kepintar, ai epo dero yo mak Roh yo sama miye karunia besara diang pentau. ⁹ Epo yo erai kongo Roh yo sama miye iman, ai epo yo mak Io miye karunia te mekale. ¹⁰ Epo yo erai kongo Roh miye kuasa nte nampa mujizat, ai epo yo mak Io miye karunia nte benubuat, ai epo yo mak nua Io miye karunia nte ngembeda bemasam roh. Epo yo erai kongo Io miye karunia nte besara diang basa roh, ai epo yo mak Io miye karunia nte nakser basa roh ene. ¹¹ Tapi eka-eka endo gnawi koe Roh yo erai ai yo sama, yo miye karunia yo pinotoko epo tongku ulun, sama kati yo petua-Iyo. ¹² Koe sama kati kompu endo erai ai anggota-anggotaiyo deo, ai eka-eka anggota ene, beta ko deo, tapi erai kompu, ktine lou Kristus. ¹³ Koe lang erai Roh eka taka, ktine ulun Yahudi, ktine lou ulun Yunani, ktine batak, ktine lou ulun bebas, sundok benaptis jadi erai kompu ai eka taka deniye isop ngket erai Roh. ¹⁴ Koe kompu lou belo ngket erai anggota, tapi ngket deo anggota. ¹⁵ Ena ka botis ngulek: "Koe aku makse tangan, aku makse anggota kompu", jadi beta be io makse anggota kompu? ¹⁶ Ai ena ka telingo ngulek: "Koe aku makse mato, aku makse anggota kompu", jadi beta be io makse anggota kompu? ¹⁷ Ena ka mupus kompu ene mato, ise nte nempaning? Ena ka mupus ene telingo, ise nte ngarok? ¹⁸ Tapi Allah sundok miye epo anggota, masing-masing pinotoko, awa io mbo kompu, kati yo petua-Iyo. ¹⁹ Ena ka eka ene erai anggota, mbo mone po kompu? ²⁰ Memang keo deo anggota, tapi erai kompu bute. ²¹ Jadi mato belo kuli ngulek epo tangan: "Aku belo koyoh iko." Ai utok belo kuli ngulek epo botis: "Aku belo koyoh iko." ²² Mokin ube yo anggota-anggota kompu yo nintan paling lome ene yo penerlu beta. ²³ Ai epo anggota-anggota kompu yo mbo pengeti taka nte eti tau nte ngemai, taka ngasi ngadoiyo mokin kinonuon ube. Ai epo anggota-anggota taka yo belo di buen nau, taka ngenjni beta-beta. ²⁴ Nau umbang ene belo di perlu koe anggota-anggota taka yo buen nau. Allah sundok nyusun kompu taka ktine nau ene, jadi epo anggota-anggota yo belo mulia pinotoko kinonuon. ²⁵ Apa nang jadi belo bako sengkono lang kompu, tapi apa anggota-anggota yo beda ene bako awat. ²⁶ Koe ene ena erai anggota benasa, eka anggota lumpat benasa, ena erai anggota kinonuon, eka anggota lumpat ego. ²⁷ Ikam eka ene kompu Kristus ai tongku ikam ene anggotaiyo. ²⁸ Ai Allah sundok netap tenu-tenu ulun lang Jemaat: yo tla nte rasul, kedua nte nabi, ketolu nte guru. Longon se ene oli deroiyo kuli karunia nte mekeo mujizat, nte mekale, nte ngelayan, nte mimpin, ai nte besara lang basa roh. ²⁹ Rasul ba, nabi ba , guru ba be dero ene? keo be dero eka kuli karunia nte mkeo mujizat, ³⁰ ena belo nte mekale, ena belo nte besara lang basa roh, ena belo nte nakser basa roh? ³¹ Jadi bkomer ka nte kuli karunia-karunia yo paling buen. Ai aku nutuy epo ikan boyan yo buen-buen aso.