¹ Alaw di aku tau bsara diang basa eka-eka ulun ai basa- mlekat, tapi ena aku belo di keo kosang, aku sama kati agong io tino gong-gong ai kati genta ngre nye-nye. ² Alaw di aku keo karunia nte nampa nubuat ai aku tau eka-eka rsia ai aso tau eka -eka pentau pentoan; ai alaw aku keo iman io sempurna nte ngensut tunden, tapi ena aku belo keo kosang sama sekali aku belo keo jodo. ³ Ai alaw di aku ngembagi ise masam yo keo mbo aku, ndok sampe mie kompu- tonga ku nte tuna, tapi ena aku belo keo kosang ndok belo keo- idik -idik jodo io nte oki. ⁴ Kosang ene sabar; kosang-ene yo doko saway kesong; io belo tukang kuwo. Io belo tau nondek io se ai belo di sombong. ⁵ Io belo ngenjoun gawi yo belo keo adat ai memekeo io se. Io mba di tuju mara ai mba di ngona sala ulun mak. ⁶ Io mba di ego ena belo adil, tapi koe io beta ⁷ I ngelim ise masam, persaya epo ise masam, ngarap ise masam, sabar nantay kanam ise masam. ⁸ Kosang belo tau sundok; nubuat anta abis; basa roh anta brenti; pntau pntoan anta mapos. ⁹ Koe taka belo di tau ba ai nubuat taka belo di sempurna. ¹⁰ Tapi ena yo sempurna ene ulet, jadi yo belo di sempurna ene anta mapos. ¹¹ Des aku aso pea, aku bkesah bsurah kati bang pea, san ku kati bang pea, akal ku kati akal bang pea. Tempo ndo des aku sudok jadi tuo, aku ngeloli sipat bang pea ene. ¹² Koe tempo endo taka se kito lang sermin kati umbang nau io aro-aro, tapi nindo taka se anta kito wae sangko wae. Tempo ndo aku tau belo di sempurna, tapi nindo aku anta tau diang sempurna, sama kati aku se tinonoan. ¹³ Ktine ka doko toro tolu nau umbang endo, yo ene iman, arapan ai kosang, ai yo lelu ngket ene yo paling olay yo doko kosang.