¹ Sinorapet beta kasih ene ai bkomer ka apa ikam se kuli karunia-karunia roh, yo tla karunia nte bnubuat. ² Ise yo bunyal diang basa roh, belo di bunyal epo ulun, tapi epo Allah. Koe ndok belo erai kongo ulun yo unong basa iyo; koe roh iyo ngulek nau umbang yo melim. ³ Tapi ise yo bnubuat, iyo bunyal epo ulun, iyo nengkuat, matuk ai nyempae. ⁴ Ise yo bunyal diang basa roh, iyo nengkuat yo se, tapi ise yo bnubuat, iyo nengkuat jemaat. ⁵ Aku gawal, apa ikam eka-eka bunyal diang basa roh, tapi lengkat se ene, apa ikam bnubuat. Koe ulun yo bnubuat keo uman ube se ulun yo bunyal diang basa roh, yo penting ena ulun ene se low kuli ngulek rti iyo, apa jmaat dapet btengkuat. ⁶ Jadi, eraibuntung-eraibuntung, ena aku ulet epo ikam ai bunyal diang basa roh, ise jodoiyo ene nte ngkam, ena aku belo nyampe epo ikam psan Allah ena belo pentau enabelo nubuat enabelo tutuy batuk? ⁷ Sama nau umbang yo diang kakas-kakas yo belo keo kesong, tapi yo keo oyon, kati suling ai kecapi-ketimbe ulun kuli tau legu ise yo kinomain koe suling ai kecapi, ena keduo iyo belo nembaling oyon yo beda? ⁸ Ktine low, ena trompet belo di nembaling oyon yo buen, ise yo braduh nte perang? ⁹ Ktine low ka doko ikam yo bunyal diang basa roh: ena ikam belo makai basa yo jelas, ktimbe ulun kuli paham ise pmensara ko? Kesah ko ene belo keo otang pmensara ko ene oit riut tingen! ¹⁰ Keo deo-tenu ka kedeo-bmasam basa mbo dnia; beta ko ktnie ndok belo erai ngket basa ene yo keo oyon yo belo keo rti. ¹¹ Tapi ena aku belo di tau rti basa ene, aku jadi ulun nyumba nte io yo makaiiyo ai io ulun nyumba nte oki. ¹² Ktine low diang ikam: ikam memang bkomer nte kuli karunia-karunia Roh, tapi lengkat se ene mokoiyo ikam bkomer makaiiyo te nengkuat Jmaat. ¹³ Koe ene ise-ise yo bunyal diang basa roh, io arus bdoa, apa epo iyo dnie low karunia nte ngulek rtiiyo. ¹⁴ Koe ena aku bdoa diang basa roh, rohku bute yo bdoa, tapi akal ku belo dilumpat bdoa. ¹⁵ Jadi, ise yo arus gawi ku? aku bdoa diang roh ku, tapi aku bdoa low diang akal ku; aku blegu ai muji diang rohku, tapi aku blegu ai muji low diang akalku. ¹⁶ Koe, ena iko ngulek sukur diang roh ko tingen, ktimbe ulun yo belo kuli karunia ene yo keo mbo mne nempaning kuli ngulek "amin" nte ulek sukur ko ene? Mba be io belo tau ise yo ulek ko. ¹⁷ Koe beta ko pmensara sukur ko ene buen beta, tapi ulun yo mak belo di betengkuat koe iyo. ¹⁸ Aku ngulek sukur epo Allah, se aku bunyal diang basa roh lengkat se eka ikam. ¹⁹ Tapi ena lang kumpulan jmaat aku gawal ube ngulek limo buku pmensara yo ulun kuli paham nte matuk ulun yo mak low, se bribu-ribu buku pmensara diang basa roh. ²⁰ Erai buntung-erai buntung, nang ka sama kati bang pea lang akal kam. Jadi ka bang pea lang akal dat, tapi ulun tuo lang akalkam! ²¹ Lang aturan Torat keo tnulis: "Koe ulun-ulun yo keo mpun basa yo mak ai koe bowa ulun-ulun nyumba Aku anta bunyal epo bangsa endo, beta ko ktine dero belo di anta nempaning nte Oki, firman Tuhan." ²² Koe ene karunia basa roh ene tanda, belo di nte ulun yo keo iman, tapi nte ulun yo belo keo iman; tapi karunia nte bnubuat ene tanda, makse nte ulun yo belo keo iman, tapi nte ulun yo keo iman. ²³ Jadi, ena eka jmaat bkumpul sama-sama ai tongku kongo ulun bunyal diang basa roh, laju sumba ka doko ulun baling ai ulun-ulun yo belo keo iman, belo be dero ngulek, se ikam kuto? ²⁴ Tapi ena eka bnubuat, laju sumba ulun yo belo keo iman ai ulun bayu, io anta jadi persaya koe eka ene ai kono presa koe eka-eka ene; ²⁵ eka-eka yo melim yo keo lang kesong iyo anta jadi tinonoan, sampe io anta sujud nyembah Allah ai ngaku: "Beta-beta, Allah keo ela ekang ikam." ²⁶ Jadi ktimbe tempo ndo, erai buntung-erai buntung? Ena des ikam bkumpul, mokoiyo tongku kongo ulun mie ise-ise: yo erai mazmur, yo mak tutuy batuk, ena belo psan Allah, ena belo karunia basa roh ena belo karunia nte ngulek rti basa roh, tapi eka-eka ene arus pnakai nte nengkuat. ²⁷ Ena keo yo bunyal-bunyal diang basa roh, koe ka duo kongo ena belo paling deo tolu kongo ulun, sengkelang, ai arus keo yo mak nte ngulek rti iyo. ²⁸ Ena belo keo ulun yo kuli ngulek rti iyo, mokoiyo dero suni ka lang kumlulan jmaat ai pulun kate bunyal epo io se ai epo Allah. ²⁹ Nau umbang nabi-nabi - buen iyo duo ena belo tolu kongo ngket dero yo bsara ai yo mak ngenanam ise yo ulek dero. ³⁰ Ena keo ulun yo mak yo tunge ela mne kuli psan, jadi yo tla ene arus suni. ³¹ Koe eka ikam kate bnubuat sengkelang, sampe ka ikam kuli ngnau ai kuli pengklian. ³² Karunia nabi tunduk epo nabi-nabi. ³³ Koe Allah belo dikakan yo kacau, tapi yo damai sejahtera. ³⁴ Sama kati lang eka Jmaat ulun-ulun kudus, bangbawe-bawe arus suni lang kumpulan-kumpulan Jmaat. Koe dero belo disnie nte bunyal. Dero arus tunduk, kati yo nulek low koe aturan Torat. ³⁵ Ena dero kakan tau ise-ise, alo ka dero ngunti ene epo songiyo ela low. Koe belo snaron nte bawe ena bunyal lang kumpulan Jmaat. ³⁶ Ena belo keo be firman Allah mulai ngket iko? Ena belo epo iko tingen be firman ene sundok ulet? ³⁷ Ena keo ulun saniyo se io ene nabi ena belo ulun yo kuli karunia rohani, iyo arus knop, se ise-ise yo ulekku epo ikam ene prenta Tuhan. ³⁸ Tapi ena io belo di nrimaiyo, nang kam trima iyo. ³⁹ Koe ene, eraibuntung-erai buntungku, komer kam beta nte kuli karunia bnubuat ai nang nusan ulun yo bsara diang basa roh. ⁴⁰ Tapi eka-eka ene arus gnawi diang snaron ai sengkono diang aturan.