¹ Ai tempondo aku kakan mknop ikam mandi mokong umbang Injil ngket Allah yo snampe bune epo ikam. Ikam nrima iyo ai beta-beta prcaya epo Kristus koe Injil ene. ² Ena ikam makai beta-beta epo ise yo sundok ulek ku ene, Injil ene doko yo nte nylamat ikam; tapi belo low ka ena ikam prcaya tingen belo di diang paham beta-beta. ³ Ise yo sundok sampe ku diang ikam ene umbang yo sundok trima ku low. Yo pnting kati yo sundok keo tnulis lang Alkitab, aku ngulek epo ikam se Kristus mate koe dosa-dosa taka, ⁴ se Io nlowong, tapi likas ene pinosuli nua mbo olo ktolu. Ene low tnulis lang Alkitab. ⁵ Aku mere low epo ikam se Kristus yo nyuli nua ene mmkelak kompu tonga-Iyo epo Petrus, ai epo duo blas rasul. ⁶ Sundok ene Io mmkelak kompu tonga-Iyo rndu mbo erai awa epo sisa se limo jatus kongo ulun. Deo yo aso bolum sampe tempondo, pulun tenu-tenu kongo tingen yo sundok mate. ⁷ Sundok ene Yesus mmkelak kompu tonga-Iyo low epo Yakobus ai oli epo eka rasul. ⁸ Pngeka beta Io mmkelak kompu tonga-Iyo epo aku low. Sama kati epo pea yo kinomekus belo pian des nte kinomekus. ⁹ Koe aku ene rasul Tuhan yo paling gramas. Aku belo snaron bnomba rasul, koe aku sundok ngurow ngsa jmaat Allah. ¹⁰ Tapi koe Kasih Karunia Allah aku kate jadi umbang nau ku tempondo. Belo se prsuma Allah ngampun aku. Mokin ko aku ube yo bgawi tumok tingen se eka rasul yo mak. Tapi ene sbeta iyo makse ngket komer ku, Ene leka tulan Allah yo nengkosang aku ai ngawat bgawi diang aku. ¹¹ Jadi, ngket ise ka ikam nrima Injil ene, ngket aku be, ngket rasul-rasul yo mak ene belo di jadi soal. Yo pnting kain nyampe Injil ene ai ikam prcaya. ¹² Jadi pnyampe kain ene se Kristus sundok nyuli nua ngket mate, ise moko keo ngket ikam yo ngulek se ulun mate belo anta nyuli nua? ¹³ Ena beta ulun mate belo anta pinosuli nua, ene sama ka low Kristus belo anta nyuli nua ngket mate. ¹⁴ Ai ena ka Kristus belo nyuli nua ngket mate, moko ene belo beta keo jodo pnyampe ngket kain ai belo beta keo jodo low ikam prcaya. ¹⁵ Lngkat se ene, Kati ungka kain yo nungka nampa kesah kro nau umbang Allah, Koe kain ngesah se Allah sundok msuli nua Kristus ngket mate, moko ena ngaya kati mbo pntau kam ene Allah belo keo msuli ulun mate. ¹⁶ Keo ena beta ulun mate belo pinosuli nua, ktine low Yesus belo pinosuli nua ngket Io mate. ¹⁷ Ai ena ka Kristus belo pinosuli nua, umbang iman kam ene belo keo jodo, ikam aso bolum diang dosa ai belo keo arapan ise-ise. ¹⁸ Ene arti yo ulun-ulun yo sundok mate lang Kristus belo low ka di keo arapan. ¹⁹ Ena ka taka pulun nte kola bolum mbo dnia endo tingen keo arapan epo Kristus, belo keo makse taka ulun paling sial ngket eka ulun. ²⁰ Tapi yo beta ene ktindo, Kristus sundok pinosuli ngket ekang ulun mate, ene doko nte memenesa se ulun mate ene anta pinosuli nua. ²¹ Koe sama kati ulun tau mate ene koe leka gawi erai kongo ulun, ktine lou ulun tau nyuli ngket mate jadi ngket erai kongo ulun. ²² Koe sama kati umbang eka ulun jadi tau mate lang bgabung diang Adam, ktine low ulun jadi dapet tinombolum nua lang bgabung diang Kristus. ²³ Tapi tongku ulun anta kono giliran nte pinosuli; Kristus nte yo ono tingen, sundok ene dero yo sundok jadi mpun-Iyo des jman pngulet-Iyo. ²⁴ Sundok ene sampe ka mbo pnyundok iyo, yo ene montuk anta Io nyrah Krajaan epo Allah Bapa, sundok Io mkabis eka pmrenta, eka roh yo pun kuasa ai eka roh yo mpun pnggalak mbo dnia. ²⁵ Koe Io arus jadi Raja sampe Allah mayak eka bali-Iyo ela iwat botis-Iyo. ²⁶ Bali yo sori tingen nte Io pkalah yo ene pngnate. ²⁷ Lang Alkitab tnulis ktindo, "Allah sundok nampa ise ka eka ngaya koe kalah epo-Iyo." Tnoan ka se yo nulek "ise ka" ene Allah se belo disumba lang reken, yo nampa ise ka ene jadi ngaya koe kalah epo Kristus. ²⁸ Tapi ena sundok eka ene pnayak iwat Kristus, sundok ene Kristus se anta mayak Io-se ela iwat kuasa Allah yo sundok mayak eka ene epo iwat kuasa Kristus, apa Allah jadi ba lang ise masam. ²⁹ Ena belo ktine, ise jodo iyo gawi ulun yo bnaptis nte ulun mate? Ena ulun mate belo anta pinosuli, ise moko dero kakan bnaptis nte ulun-ulun yo sundok mate? ³⁰ Ai ktine low kain, nte ise kain kakan dor ngadap bahaya tongku molo malom? ³¹ Erai buntung mandi mokong! Tongku olo aku salo adap diang maut. Koe aku buen san kito ikam lang Yesus Kristus,Tuhan taka, aku ngulek se otang endo memang beta. ³² Ena ka koe asak pngnanam ku tingen, ise jodo yo oki? Gawi tau nte ngelian, yo ka nglawan korik tau mopak ulun mbo Efesus. Ena ulun mate belo pinosuli, moko ene "Ale taka kuman nyingkap, koe manin taka mate low ka". ³³ Nang ikam lumpat tang, ngangon diang ulun yo tuju gawi triaw tau nte kompit nampa ikam lumpat gawi triaw. ³⁴ Kingat-kingat ikam ai nang nampa dosa oli. Ikam arus tau mai, koe keo ngket ikam aso yo belo pian tau se-Allah. ³⁵ Tapi bahe keo yo rkunti, "Ktimbe nau ulun mate pinosuli nua? Ai diang kompu tonga ise dero kate bolum nua?" ³⁶ Ene unti bungang beta! Ena ikam ngulo bigi epo lang tana, bigi ene belo anta moti ena bigi ene belo mate ile. ³⁷ Yo ulo kam ene makse eka erai tonga diang lai pnykulo yo kakan nulo ene, tapi bigi tingen, kati panan bigi gandong ena belo bigi-bigi yo mak. ³⁸ Tapi Allah se yo memekotang nau pnjadi pnykulo ene kati yo ptua-Iyo, Makse-makse jenis bigi makse-makse low nau pnjadi iyo. ³⁹ Belo di eka isi upak ene sama, isi upak ulun makse se umbang isi upak korik kotok, makse nua isi upak mpulu, ai makse low umbang isi upak esa. ⁴⁰ Keo umbang kompu mbo sorga ai keo umbang kompu mbo dnia, tapi kmulia kompu mbo sorga makse se umbang kmulia kompu mbo dnia. ⁴¹ Nau pa mato olo makse se nau pa bulan, ai nau pa bulan makse se nau pa bintong-bintong, ai nau pa bintong yo erai makse diang nau pa bintong yo mak. ⁴² Ktine low umbang iyo umbang pnyuli ulun mate. Kompu yo nlowong ene kompu yo tau boto, tapi kompu yo pinosuli nua ene kompu yo belo tau rusak. ⁴³ Des kompu ene nlowong, kompu ene triaw ai belo mana, tapi des io tinombolum nua, io ene kompu yo buen ai belo di tau boto. ⁴⁴ Des nlowong kompu ene kompu ngket dnia, tapi sundok tinombolum nua, kompu ene kompu yo dnie ngket roh Allah. Ena keo kompu yo ngket dnia, keo low kompu yo ngket Allah ⁴⁵ Lang Alkitab keo tnulis ktindo, "Ulun yo tla tingen, yo ene Adam tnampa jadi bolum," Tapi Adam yo sori ene Roh yo nte mie bolum kden. ⁴⁶ Allah nampa yo ngket dnia ile, bayu yo ngket sorga, belo di sorga ile bayu dnia. ⁴⁷ Adam yo tla tnampa ngket tana, tapi Adam yo kduo ulet ngket sorga. ⁴⁸ Ulun-ulun mbo dnia endo ene kati Adam yo tla, yo tnampa ngket tana, tapi ulun-ulun sorga ene sama kati Io yo ulet ngket sorga. ⁴⁹ Yo ka kati taka tempondo ene sama kati nau Adam yo tnampa ngket tana, ktine low anta taka jadi kati nau Io yo ngket sorga ene. ⁵⁰ Erai buntung - erai buntung endo yo kakan ulek ku epo ikam, kompu yo jnadi ngket daya ai isi belo kuli sumba lang Krajaan Allah ai kompu yo tau mate belo anta tau jadi kompu yo kden. ⁵¹ Sbeta yo aku mmekelak epo ikam umbang yo melim: taka belo di anta mate eka, tapi taka eka anta nensut umbang. ⁵² Umbang ene kolan-kolan ekang mato skitop des jman oyon tmburi yo sori tingen. Koe des jman dingo oyon tmburi ene, ulun-ulun mate anta pinosuli nua diang kompu yo belo tau mate, ai taka eka-eka anta nensut umbang. ⁵³ Kompu taka yo tau mate endo arus gnanti diang kompu yo belo tau mate, ai kompu yo ngket dnia arus gnanti diang kompu yo ngket sorga. ⁵⁴ Ena kompu yo tau mate sundok gnanti diang kompu yo belo tau mate, ai kompu yo ngket dnia sundok gnanti diang kompu yo ngket sorga, gnnap ka doko oli pirman Tuhan yo tnulis: "Maot sundok mapos lang pngkuret. ⁵⁵ O maut mombe pngkuret ko? O maut mombe singot ko?" ⁵⁶ Singot maut yo doko dosa, ai kuasa dosa yo ene aturan torat. ⁵⁷ Tapi sukur epo Allah, yo sundok mie epo taka pngkuret tete Yesus Kristus, Tuhan taka. ⁵⁸ Koe ene doko, eraibuntung-eraibuntung yo tngkosang ku, moko yo ikam arus tetap prcaya epo Yesus ai nang kerong-kerong. Bgawi ka terus diang moyoh nte Tuhan. Koe ikam tau se ise ka yo gawi kam nte tuhan pasti keo jodo.