¹ Nau umbang ngumpul sen nte ulun-ulun kudus, moko io ikam nggawi sngkono diang tutui-tutui yo bieku epo Jmaat-jmaat mbo Galatia. ² Des olo tela ngket tongku minggu moko io tongku ikam sengkono diang ise yo pengkuli kam nyeing ise-ise ai ngona io mbo lou, apa nang ngumpul ene bayu gnawi, ena aku ulet. ³ Des sundok aku ulet, aku anta nyuyu ulun-ulun, yo san kam sengkono, diang surat epo Yerusalem nte moit pendie kam. ⁴ Ena memang belo kate belo, se aku lou brangkat, jadi dero anta brangkat sama-sama diang aku. ⁵ Aku anta ulet epo ikam, des sundok aku nglalo Makedonia, koe aku anta nglalo Makedonia. ⁶ Ai mbo Korintus bahe aku anta nongos tenu-tenu kola iyo diang ikam ena belo bahe aku anta nongos kola musim roni, sampe ikam kuli ngawat aku nte nrus ju langku. ⁷ Koe tempondo aku belo kakan kito ikam ile-ile bute. Aku arap kuli olah nongos diang ikam, ena sengkono mbo Tuhan. ⁸ Tapi aku anta nongos mbo Epesus sampe olo raya Pentakosta, ⁹ koe mbo mndo deo boyan nte oki nte nggawi gawi gata yo olai ai penting, betako keo deo yo nglawan. ¹⁰ Ena Timotius ulet epo ikam, bkomerka apa io keo mbo ekang ikam diang belo di takut, koe io nggawi gawi gata Tuhan, sama kati aku. ¹¹ Jadi, nangka keo ulun yo nyapa io! Tapi awatka io, apa io nerus ju lang diang slamat, apa io ulet nua epo aku, koe aku mbo mndo minte pngulet iyo sama-sama diang erai buntung-erai buntung yo mak. ¹² Nau umbang erai buntung Apolos: sundok bjuli-juli aku nyemuyu iyo nte sama-sama diang erai buntung-erai buntung io mak nuntun ikam, tapi io sama sekali belo kakan ulet tempondo. Ena keo des io buen anta, io anta ulet. ¹³ Jaga-jaga! Akatka diang turon lang iman! brumbangka kati song! Ai dor galak! ¹⁴ Jnounka eka gawi gata kam lang kasih! ¹⁵ Keo aso pninduku epo ikam, erai buntung-erai buntung. Ikam tau, se Stefanus ai kluarga iyo ene doko ulun-ulun yo tela btobat mbo Akhaya, ai se dero sundok nyerah kompu tonga dero epo pelayanan ulun-ulun kudus. ¹⁶ Koe ene patoka ulun-ulun yo ktine ai tongku ulun yo lumpat bgawi diang poruk pgel. ¹⁷ Aku ego koe pngulet Stefanus, Fortunatus ai Akhaikus, koe dero menggenap ise yo aso kurang mbo ikam; ¹⁸ koe dero mroni kanam rohku ai roh kam. Tengkuen ka ulun-ulun yo ktine! ¹⁹ Salam epo ikam ngket jmaat-jmaat mbo Asia Kecil. Akwila, Priskila ai jmaat mbo lou dero nyampe ruai ruaw salam epo ikam. ²⁰ Salam epo ikam ngket erai buntung erai buntung eka-eka. Sampe ka salam epo erai-erai diang arok olam kudus. ²¹ Diang kayang ku se aku nules endo: Salam ngket Paulus. ²² Ise yo belo kosang se Tuhan, io terkutuk. Maranata! ²³ Kasih karunia Tuhan Yesus diang ikam. ²⁴ Kosang ku diang ikam eka-eka Kristus Yesus.