¹ Tempo ndo aku kakan ngesah umbang otang yo tulis kam lang surat mitek aku. Ena ulun song belo kawen, ene buen. ² Tapi apa belo tkono koe terkno epo tadah gawi yo belo snonoh, alo ka tongku ulun song keo bawe ai tongku ulun bawe keo song. ³ Song arus keo jodo kati song memang epo bawe iyo, ai bawe arus keo jodo kati bawe memang epo song iyo; sama keo jodo erai epo erai. ⁴ Bawe belo keo kuasa epo kompu tonga iyo se, makse ko mpun song iyo, ktine low song belo keo kuasa epo kompu tonga iyo se, tapi bawe iyo. ⁵ Bsong panan nang bako tenggang ngket erai-erai. Kate ena ile-ile, asal sundok sama keo pemekat. Diang ktine, apa ikam beai nte bdoa. Tapi sundok ene, ikam arus bako dmpet nua bsong bawe. Ena belo ktine, nindo ikam tau ngaya ptua roh yo akal triau, koe ikam belo klian bako tenggang. ⁶ Oki makse di aturan tapi nte ngkam knanam tingen. ⁷ Sbeta iyo aku gawal ka ena eka ulun kati aku. Tapi tongku ulun sundok kuli karunia yo makse-makse ngket Allah. Keo yo kuli karunia ktindo, keo yo mak kuli karunia ktinduh. ⁸ Epo ulun-ulun yo belo pian kawen ai epo bang bawe yo sundok jadi balu, ktindo otang ngket aku: Buen ka ena ikam bolum sderai kati aku. ⁹ Tapi ena ikam belo klian nahan pngkakan, moko yo ikam kawen ka. Koe ale ikam kawen se rusak koe pngkakan kam belo taro aret. ¹⁰ Epo dero yo sundok kawen, ktindo ngket aku: (Sbeta yo makse aku yo nymuyu endo, tapi Tuhan.) Ulun bawe yo sundok kawen nang beta nytuar song iyo. ¹¹ Tapi ena iyo sundok stuar, iyo arus ttap belo keo song, ena belo mulik epo song iyo ene nua. Ai ulun song belo kate nytuar bawe iyo. ¹² Epo yo mak-mak iyo, tutui batuk ku ktindo: (Endo tutui batuk ngket aku se, makse ngket Tuhan) Ena ulun prcaya nmbawe ulun yo belo prcaya epo Kristus, ai bawe ene kakan nte bolum kerai diang iyo, ulun ene belo kate nytuar bawe iyo. ¹³ Ai ena ulun bawe yo prcaya keo song se ulun yo belo prcaya epo Kristus, ai song iyo ene kakan nte bolum kerai diang iyo, bawe ene belo kate nytuar song iyo. ¹⁴ Koe song yo belo prsaya jadi kudus nte jadi anggota umat Allah koe pngmpanan iyo diang bawe yo sundok jadi mpun Allah. Ktine low ulun bawe yo belo prsaya jadi kudus nte jadi anggota umat Allah, koe pngmpanan iyo diang song yo sundok jadi mpun Allah. Ena belo ktine, pea-pea dero pasti kati pea kafir, padahal pea-pea ene anggota umat Allah. ¹⁵ Tapi ena ulun yo belo prcaya ene kakan stuar, koe ka iyo stuar; montuk umbang ktine ene ikam bebas, tapi Allah kakan apa ikam bolum nyasong. ¹⁶ Ktimbe san ko, ulun bawe, belo be iko anta nylamat song ko? Ktine low ktimbe san ko ulun song, belo be iko anta nylamat bawe ko? ¹⁷ Moko yo tongku ulun bolum kati yo sundok ptutui Tuhan nte iyo, kati umbang des Allah momba iyo nte prcaya epo Allah. Endo doko aturan yo batuk ku mbo tongku jemaat. ¹⁸ Nton kati ulun yo sundok knateb des jman iyo kono bomba Allah, iyo mba di koyoh ngensut se io sundok kateb. Ktine low ena ulun yo belo pian kateb des jman yo kono bomba Allah, iyo mba di koyoh knateb. ¹⁹ Koe knateb ai belo knateb ene mba di pnting nte taka. Yo pnting ene ngaya epo aturan-aturan Allah. ²⁰ Jadi moko yo tongku ulun tetap bolum kati umbang des iyo bomba Allah. ²¹ Bahe ikam jadi panan ulun batak des ikam bnomba? ene belo moko mbe! Tapi ena ikam kuli ksmpatan nte bnebas, pnakai beta-beta ksmpatan ene. ²² Koe ulun batak yo bomba Tuhan lang playanan-Iyo, yo ene ulun bebas, mpun Tuhan. Ktine low ulun bebas yo bomba Kristus, yo ene batak-Iyo. ²³ Ikam sundok bnoli ai uman yo sundok lunas bnayar. Koe ene nang ka ikam jadi batak ulun. ²⁴ erai buntung mandi mokong lang Kristus, moko yo tongku ulun nokon ela onon Allah kati nau umbang des jman io bnomba. ²⁵ Endo oli umbang ulun-ulun yo belo pian kawen. Nte dero aku belo kuli prenta ise-ise ngket Tuhan. Tapi koe aku ulun yo dapet prcaya koe rahmat yo kuli ku ngket Allah, aku kakan mie ptutui batuk. ²⁶ San ktindo, koe jman tempondo ene jman bnasa, san ku buen ka ena tongku ulun ene tetap bolum kati nau-nau yo jati. ²⁷ Ena ikam sundok keo bawe nang meto bukil nte stuar. Ena belo pian keo bawe koyoh ka meto bawe. ²⁸ Tapi ena ikam kawen, ene belo di dosa. Ktine low ena ulun bawe ngelok kawen, belo ka io jadi dosa. tapi, dero yo kawen ene nindo deo ruku bmasam nte adap nau ubmang mbo ngmpanan. Aku kakan erai buntung mandi mokong ku belo ruku deo umbang bmasam yo nte adap ene. ²⁹ Otang oki ene ktindo, erai buntung mandi mokong; Taka belo di deo nte inte aso. Mulai ngket tempondo, tongku kongo yo sundok keo bawe moko yo bolum kati nau ulun belo bawe; ³⁰ ulun yo nangis, bolum kati ungka belo nangis; ulun yo ego, kati ungka belo di kanam ego; ulun yo sundok sboli, kati ungka belo keo pnyboli; ³¹ ai ulun-ulun yo sibuk diang pngkeo pngknan mbo dnia, mokoyo bolum kati ungka belo keo nte sibuk diang pngkeo pngknan iyo ene. Koe belo olah aso dnia endo anta mapos! ³² Aku kakan apa ikam bolum belo keo nte water. Ulun yo belo keo bawe kate nadah bolum yo pulun epo Tuhan, ktimbe Tuhan sngkono diang iyo. ³³ Ulun yo keo bawe, ene nmpae iyo epo urusan lang dnia, ktimbe umbang apa iyo kuli msnang bawe iyo, ³⁴ koe diang ktine deo tadah nte io kno. Bawe yo belo keo song ai pea-pea bawe ngelok kuli nadah bolum dero pulun epo Tuhan, apa kompu diang roh dero kudus. Tapi bawe yo keo song, ene nmpae iyo epo urusan lang dnia, ktimbe iyo kate kuli msnang song iyo. ³⁵ Eka-eka endo kesah ku diang ikam nte ngkam se, belo di nte ngugu ikam apa ikam belo kuli ise-ise, tapi ube apa ikam glaku yo beta ai buen, ai nglayan Tuhan belo keo nte nganggu. ³⁶ ena ulun nglaku yo belo pantas diang saro iyo, ena belo kuli nahan pngkakan iyo, ai san io prlu kawen diang saro io ene, koe ka io nglaku yo san iyo buen. Io belo di dosa, ena dero kawen. ³⁷ Tapi ena ulun sundok brputus lang kesong iyo nte belo kawen diang saro iyo ene ai kputusan io ene belo bpaksa, yo laku io ene buen ka, asal ka io klian. ³⁸ Jadi ulun yo kawen diang saro iyo ene buen, ai buen aso ulun yo belo kawen diang saro iyo. ³⁹ ulun bawe bsiret mbo song iyo kola song iyo ene aso bolum. ena song io ene sundok mate, io kate kawen diang song yo mak yo tngkakan iyo, asal ulun ene ulun prcaya. ⁴⁰ Tapi ena san ku, io aso snang ube ena tetap ktine-ktine ka. Ai san ku aku low keo Roh Allah.