¹ Keo be di erai kongo ngket ikam, yo ena mentulan diang ulun yo mak, ronu meto yo adil epo ulun-ulun belo di persaya Tuhan ai makse mbo ulun-ulun kudus? ² Ktine lou, belo tau be ikam, se ulun-ulun kudus anta ngukum denia? Ai ena ikam yo anta ngukum denia endo, belo be ikam kelian nte ngurus urusan-urusan yo belo penting? ³ Belo tau be ikam, se taka anta ngukum mlekat-mlekat? Jadi da aso urusan-urusan biasa lang bolum taka olo-olo. ⁴ Beta ko ktine, ena ikam arus ngurus urusan-urusan biasa, ikam nyerah urusan ene epo dero yo belo di penting lang jemaat? ⁵ Nau umbang endo ulek ku nte ngemai ikam. Belo be keo budah erai kongo ngket ikam yo keo pentau, yo kuli ngurus urusan-urusan erai buntungiyo? ⁶ Keo be erai buntung yo erai meto yo adil epo erai buntung yo mak, ai ka ube epo ulun-ulun yo belo persaya Tuhan? ⁷ Keo urusan mbo ikam ene tingen ka, melak aut se ikam ene kalah. Ise moko ikam belo di rela ube sesa koe belo adil. Ise moko ikam belo di rela ena pinorugi? ⁸ Tapi ikam se ngenjoun yo belo adil ai ikam se nampa rugi, ai nau umbang ene joun kam epo erai buntung- erai buntung kam se. ⁹ Ai belo tau be ikam, se ulun-ulun yo belo adil belo anta kuli bagian lang Kerajaan Allah? Nang beta tang! Ulun pokeng, ulun nyembah uok ouk, ulun bezinah, bansi, ulun gawal song sama song, ¹⁰ pengako, ulun sakap, pemauk, ulun tuju mtenah ai tukang ngakal belo anta kuli bagian lang Kerajaan Allah. ¹¹ Ai tenu-tenu kongo ngket ikam ktine doko bai. Tapi ikam sundok miye kompu tonga kam binorese, ikam sundok pinokudus, ikam sundok tnerima jadi ulun belo keo yo sala lang karan Tuhan Yesus Kristus ai lang Roh Allah taka. ¹² Eka ise masam kate ba mbo aku, tapi belo di eka-eka ene keo jodo. Eka ise masam kate ba mbo aku, tapi aku belo di miye kompu tonga ku nte batak koe ise masam. ¹³ Okan singkap ene nte buntung ai buntung nte awa okan: tapi keduo-duoiyo kinomapos koe Allah. Tapi kompu tonga belo di nte pokeng, tapi nte Tuhan, ai Tuhan nte kompu tonga. ¹⁴ Allah, yo mesuli Tuhan, anta mesuli taka lou koe kuasa-Iyo. ¹⁵ Belo be tau ikam, se kompu tonga kam ene anggota Kristus ? Anta alek ku ka be anggota Kristus nte nyerahiyo epo pokeng? belo di anta! ¹⁶ Ai belo tau be ikam, se ise-ise ulun yo preket diang bawe pokeng, jadi erai kompu diang io ? Koe, ktine doko keo tenulis: " keduoiyo anta jadi erai isi upak." ¹⁷ Tapi ise yo ngemreket kompu tongaiyo epo Tuhan, jadi erai roh diang Io. ¹⁸ Nidar beta kompu tonga kam ngket gawi pokeng! Tongku dosa yo mak yo nelaku koe ulun, terjadi la baling se kompu tongaiyo. Tapi ulun yo ngenjoun pokeng bedosa epo kompu tongaiyo se. ¹⁹ Ktine low belo tau be ikam, se kompu tonga kam ene doko lou Roh Kudus yo nongos lang ikam, Roh Kudus yo kuli kam ngket Allah, - ai se ikam makse mpun kam se? ²⁰ Koe Ikam sundok benoli ai umaniyo sundok lunas benayar: Koe ene kino mulia ka doko Allah diang kompu tonga kam!