¹ Memang ulun kringo, se keo ikam yo pokeng, ai pokeng yo lengkat balo, kati yo belo pini keo tontan mbo bangsa-bangsa yo belo tau se Allah, yo doko se keo ulun yo bolum diang bawe uma yo se. ² Beta ko ktine ikam sombong apo. Belo be sengkono ube ikam nyoru ai mkoro ulun yo nggawi ktine ngket ekang ikam? ³ Koe aku, beta ko kompu tonga ku belo di keo, tapi diang sara rohani keo, aku - sama kati aku keo -sundok mkitek ukuman epo io, yo nglaku gawi ktine ene. ⁴ Ena des taka bkumpul lang roh, ikam sma-sama diang aku, diang kuasa Yesus, Tuhan taka, ⁵ ulun ene arus srah taka lang karan Tuhan Yesus epo iblis, sampe ngembenasa kompuiyo, apa rohiyo anta sinolamat des olo Tuhan. ⁶ Pementondek kam ene belo buen. Belo tau be ikam, se idik-idik ka ragi ngembong jlepong yo sundok bnobo? ⁷ Oding ka ragi yo usang ene, apa ikam jadi bobo yo bayu, koe ikam belo keo ragi. Koe anak domba Paskah taka low sundok sinomble, yo doko Kristus. ⁸ Koe ene alo taka nampa ungan, belo didiang ragi yo usang, belo low didiang ragi dat ai triaw, tapi diang roti yo belo keo ragi, yo doko kesong brese ai yo kono. ⁹ Lang surat ku sundok tulis ku epo ikam, apa ikam nang legung lget diang ulun-ulun pokeng. ¹⁰ Yo uyan ku belo di diang eka ulun pokeng ngket dnia endo ena belo diang eka-eka ulun sakap ai pngakal ai diang eka ulun yo nyembah berhala, koe ena ktine ikam arus ngendikah dnia endo. ¹¹ Tapi yo tulis ku epo ikam ene doko, apa ikam nang legung lget diang ulun, yo beta ko ngangkan se yo se erai buntung, yo ene ulun pokeng, sakap, nyembah berhala, pmetenah, pmauk ai tuju ngakal; diang ulun yo ktine nang ka beta ndok sindai ikam kuman sama-sama. ¹² Koe diang kuasa ise aku ngukum dero, yo keo ela baling se jmaat? Belo be ikam pulun ngukum dero yo keo lang jmaat? ¹³ Dero yo ela baling se jmaat anta ukum Allah. Usa ka ulun yo gawi triaw engket ekang ikam.