¹ Ka jalo, ga go na tshekiso mo go bao ba leng mo go Jeso Keresete. ² Gonne tsetlana ya Moya wa botshelo mo go Keresete Jeso e nkgolotse mo tsetlaneng ya leso le boleo. ³ Modimo o ne a dira se ne molao o retelelwa ke go se dira ka o ne o le bokowa mo nameng. O ne a romela morwae a le mo nameng e e leofang go nna setlhabelo sa boleo, mme a sekisa nama mo nameng e e leofang. ⁴ O ne a dira se gore molao o diragatswe mo go rona ba ba sa tsamaeng ka fa thatong ya nama, mme ka fa ketelopeleng ya Mowa. ⁵ Ba ba tshelang ka fa thatong ya nama ba nna kutlo mo dilong tsa senama, mme ba ba tshelang go ya ka ketelopele ya Mowa ba nna kutlo mo dilong tsa Moya. ⁶ Gonne go akanya senama ke leso, mme go akanya ka fa Moweng ke botshelo le kagiso. ⁷ Se ke ka gore tlhaloganyo ya senama ga e utlwe Modimo, ga e ka ke ya ikobela le go utlwa molao wa Modimo. ⁸ Ba ba mo nameng ga ba ka ke ba itumedisa Modimo. ⁹ Fa ele boammaruri gore Moya wa Modimo o tshela mo go lona, ga le mo nameng mme le mo Moweng. Mme ope yo o senang Moya wa ga Keresete ga se wa Modimo. ¹⁰ Ga Keresete a le mo go wena mmele o sule ka lebaka la boleo, mme moya o a tshela ka lebaka la tshiamo. ¹¹ Fa Moya wa ene yo o tsositseng Jeso mo baswing o le mo gola, ene yo o tsositseng Keresete mo baswing o tla rudisa mebele ya lona ka Moya wa gagwe o o tshelang mo lona. ¹² Jalo he bakaulengwe, re tshwanetse go tshela ka fa Moweng, mme e seng go tshela ka fa senameng. ¹³ Go nne fa o tshela ka fa nameng o tla swa, mme fa ka Moya o balaya ditiro tsa senama, o tla tshela. ¹⁴ Gonne ba ba etelelwang pele ke Moya wa Modimo ke barwa Modimo. ¹⁵ Ga le a amogela moya wa poifo go le buseletsa mo bokgobeng, ka jalo le amogetse Moya wa borwa yo o lelang mo go lona o re, ''Aba, Rara!'' ¹⁶ Moya o fa bosupi le mewa ya ron agore re bana Modimo. ¹⁷ Fa re le bana, re gape baruaboswa ba Modimo. Mme re baruamoswa mmogo le Kereste, fa ele gore ka bomammaruri re boga le Keresete gore re tla re galalediwe le ene. ¹⁸ Gonne ke a rurifatsa fa dipogisego tsa nako ena di ka se ke tsa tshwantshwanngwa le kgalalelo e re tla e senolelwang. ¹⁹ Gonne lebopo le letile ka tlhwaafalo, le letetse tshenolo ya barwa Modimo. ^{20 22} Gonne lebopo le ne la tsenngwa mo botshwarong e se ka thato ya lone, mme le tsentswe ke Modimo. Re na le botlhoka pelaelo ²¹ ja gore lebopo le tla gololwa mo bokgobeng jo bo bodisang mme le tla tlisiwa mo kgololesegong ya kgalalelo ya bana ba Modimo. Gonne re a itse fa lebopo lotlhe le le mo diphegelong ebile le le mo ditlhabing tsa pelegi go fitlha ka jaana. ²³ Mme e seng bone fela, le rona, bao re nang le maungo a pele a Moya, le rona re a lela re letse go amogelwa jaaka barwa, le go rekololwa ga mebele ya rona. ²⁴ Re ne ra bolokwa ka botlhoka-pelaelo jo. Mme se ne nang le botlhaka-pelaelo ka sone ga re ise re se bone, gonne ke mang yo o ka solofelang ka botlhoka-pelalelo selo se a se bonang? ²⁵ Mme fa re leta ka botlhoka-pelaelo se re sa se boneng, re leta ka bopelotelele. ²⁶ Le fa go ntse jalo, Moya o re thusa mo makoweng a rona. Moya o re rapelela ka dipheretlhego tse di se keng tsa tlhalosiwa gonne ga re itse gore re ka rapela jang. ²⁷ Ene yo o tlhatlhobang dipelo o itse tlhaloganyo ya Moya, gonne o rapela mo boemong ja badumedi go ya ka fa thatong ya Modimo. ²⁸ Gonne re a itse fa dilo tsotlhe di berekela go ya bomolemong mo go botlhe ba ba ratang Modimo, ebile ba beditswe ka fa thatong ya gagwe. ²⁹ Gonne ba a neng a ba itsile pele ga metlha, o ne a ba tlhoma a be a ba bopa mo setshwanong sa Morwa wa gagwe, gore Morwa wa gagwe a tle a nne motsalwa-pele wa bakaulengwe. ³⁰ Ba a neng a ba tlhamomisa pele ga metlha o ne a ba bitsa. Ba a ba beditseng o ne a ba siamisa. Ba a neng a ba siamisa, o ne a ba galaletsa. ³¹ Re tla reng ka dilo tsena? Fa Modimo a le mo letlhakoreng la rona ke mang yo o tla nna ng kgatlhanong le rona? ³² Ene yo o neng a seka a ipeela ngwana wa gagwe mme a mo neela mo boemong ja rona, aa ga a kake a re neela dilo tsotlhe mahala ka ene? ³³ Ke mang yo o ka pateletsang bao Modimo a ba itlhophetseng? Modimo ke ene a siamisang. ³⁴ Ke mang yo o tla atlholang? Keresete ke ene yo o suleng, mme go feta seo, o ne a tsosiwa mo baswing. O busa le Modimo mo lefelong la tlotla le Modimo, mme ke ene a re rapelelang. ³⁵ Ke mang yo o tla re kgaoganyang le lerato la ga Keresete? Aa ke matshwenyego, kgotsa go tlhokofatswa, kgotsa go kgobiwa, kgotsa tlala, kgotsa go sa ikategeng, kgotsa tshaka? ³⁶ Jaaka go kwadilwe gotwe, ''Ka lebaka la gogo re bolawa letsatsi lotlhe. Re tsewa jaaka dinku tse di isiwang matlhabelong.'' ³⁷ Mme ma-gareng ga dilotsotlhe tse, re bafenyi ka ene yo o re ratileng. ³⁸ Ke na le botlhoka-pelaelo ja gore le fa ele leso, kgotsa botshelo, kgotsa baengele, kgotsa babusi, kgotsa dilo tse di leng teng, kgotsa dilo tse di tla tlang, kgotsa dinonofo, ³⁹ kgotsa bo ko-godimo, kgotsa boteng, kgotsa sepe se se bopilweng, se se ka kgonang go re kgaoganya le lerato la Modimo le le mo go Keresete Jeso Morena wa rona.