¹ Re ka re Aborehama rraarona mo nameng, o lemogile eng? ² Gonne fa Aborehama a ne a siamisitswe ka ditiro tsa gagwe, go ne go ka nna le sengwe se a ka ipelafatsang ka sone, mme e seng fa pele ga Modimo. ³ Lekwalo la reng? "Aborehama o ne a dumela Modimo, mme a bonwa a le tshiamo fa pele ga Modimo." ⁴ Jaanong mo go yo o dirang, tuelo ya gagwe ga e kaiwe e le mpho, mme e kaiwa e le se se mo tshwanetseng. ⁵ Mme ene yo o sa direng mme a dumela mo go ene yo o siamisang baleofi, tumelo ya gagwe e kaiwa e le tshiamo. ⁶ Tafita le ene o bua ka tshegofatso e e mo mothong yo Modimo a mo kayang a le tshiamo e se ka lebaka la ditiro tsa gagwe. ⁷ O ne a bua a re, "Go sego batho ba ba itshwaretsweng ditlolo tsa bone le maleo a bone a bipilwe. ⁸ Go sego motho yo Morena a sa mo kaeng boleo." ⁹ Jaanong a se ke tshegofatso mo go ba ba rupileng fela kgotsa le mo go ba ba sa rupang? Gonne ra re, ''Aborehama o ne a bonwa a le tshiamo ka ntlha ya tumelo ya gagwe." ¹⁰ Jaanong, o e amogetse jang, a ise a rupe kgotsa a setse a rupile? O e amogetse a ise a rupe. ¹¹ Aborehama o ne a amogela tshupo ya go rupa. Se e ne ele go kanelwa ga tshiamo ya gagwe e a e supileng pele ga a rupa. Maduo a se, ke go nna rraagwe botlhe ba ba dumelang, go akareditswe le ba ba sa rupang. Se se ne se rurifatsa gore le bone ba tlaa kaiwa tshiamo. ¹² Se se ne se raya gore Aborehama a nna rraagwe batho botlhe, e seng ba ba rupileng fela, mme le bone ba ba tsamayang mo dikgatong tsa ga rraetsho Aborehama tsa tumelo pele ga a rupa. ¹³ Gonne e ne e se kafa molaong gore tsholofetso e e fiwe Aborehama le dikokomane tsa gagwe gore ba tla nna barua-lefatshe, e ne ya fiwa ka tshiamo e e tlang ka tumelo. ¹⁴ Fa ele gore boruaboswa ke ja ba ba leng mo molaong, tumelo e tla bo ele lefela, le tsholofetso e nna lolea. ¹⁵ Gonne molao o tsisa bogale, mme fa go senang molao ga go na tlolo molao. ¹⁶ Ka lebaka le, ke ka tumelo gore tsholofetso e tle e nne ka tshegofatso le gore e tlhomamisediwe dikokomane tsotlhe tsa ga Aborehama_ e seng ba ba ka fa tlase ga molao fela, mme le ba ba kopanetseng tumelo le Aborehama. Ke rraarona rotlhe, ¹⁷ jaaka go kwadilwe gotwe, ''Ke go dirile rra ditshabatshaba." Aborehama o ne a le fa pele ga yo a mo tshepileng, e leng Modimo, yo o neelang baswi botshelo a dira dilo tse di seyong di nne teng. ¹⁸ Le fa go ne go lebega go sa kgonege, Aborehama o ne a tshepa Modimo ka bokamoso jwa gagwe. Mme o ne a nna raditshabatshaba go yeng ka fa go builweng ka teng gotwe, ''Dikokomane tsa gago di tla nna jalo.'' ¹⁹ O ne a se bokoa mo tumelong. Aborehama o ne a tlhaloganya gore ga a ka ke a kgona go tshola ngwana (ka gore o ne a le dingwaga di ka nna lekgolo, _100). Gape o ne a amogetse gore popelo ya ga Sara ga e ka ke ya kgona go ima ngwana. ²⁰ Mme ka ntlha ya tsholofetso ya Modimo, Aborehama ga a ka a belaela, boemong jwa moo, o ne a nonotshiwa mo tumelong mme a galaletsa Modimo. ²¹ O ne a dumela gore se Modimo a se solofeditseng, o kgona go se diragatsa. ²² Ka jalo le gone mo a go balelwa a le tshiamo. ²³ Go ne go sa kwalelwa ene a le nosi, gore o ne a kaiwa tshiamo. ²⁴ Go ne go kwalelwa le rona ba re tla amogelang tsholofetso, rona ba re dumelang mo go ene yo o tsositseng Morena wa rona Jeso mo baswing. ²⁵ Yo ke ene yo o neng a swela ditlolo tsa rona a bo a tsosiwa gore re siamisiwe.