¹ Jaanong le kgolagano ya pele e ne e na le ditsamaiso tsa kobamelo le lefelo le le boitshepo la selefatshe . ² Ka motlaagana o ne wa baakanngwa. Ntlwana e mo go yone go neng go na le setlhomo sa lebone , tafole, le borotho, e ne e bidiwa lefelo la boitshepo. ³ Ka fa morago ga sesiro go ne go na le ntlwana e nngwe e bidiwa lefelo le le boitshepo ga boitshepo. ⁴ E ne e na le aletara ya gauta ya dinkgisa-monate. Gape e ne e na le letlole la kgolagano, e apesitswe ka gauta. Mo teng go ne go na le sejana sa gauta se tshotse mana, thobane ya ga Arone e e ileng ya tlhoga,le matlapana a kgolagano. ⁵ Mo godimo ga letlole la kgolagano , dicheruba tse di galalelang di ne di okame sethibo sa letlole, se re ka se keng ra bua ka sone ka botlalo. ⁶ Fa dilo tse di sena go baakanngwa, baperesiti ba ne ba tsena mo ntlwaneng e e kwa ntle ya motlaagana go dira ditiro tsa bone. ⁷ Mme moperesiti mogolo ke ene fela a neng a tsena mo ntlwaneng ya bobedi gangwe fela mo ngwageng a tshotse madi, a a neng a a iketshetsa le batho, e le a maleo a e seng a kabomo. ⁸ Moya o o boitshepo o ne wa supa gore tsela ya go tsena mo lefelong le le boitshepo ja boitshepo, e ne e sa supiwa, fa motlaagana wa pele o santse o le teng. ⁹ Se e ne ele tlhaloso ya nako eno. Dineo le ditlhabelo tse di ntshiwang gadi kgone go siamisa segakolodi sa moobamedi. ¹⁰ Ba kgathala fela ka ga dijo le dino le ka mefuta ya mediro wa go itlhapisa ga go ya ka fa tumeding ya bone. Tse tsotlhe e ne e le ditsamaiso tsa senama tse dineng di beilwe go fitlhelela tsamaiso e ntsha e dirwa. ¹¹ Keresete o tsile e le moperesiti yo mogolo wa dilo tse dintle tse di tsileng. O raletse motlaagana o mogolo o o siameng o o neng o sa dirwa ka diatla tsa batho, yo o seng wa lefatshe le le dirilweng le. ¹² Ga a tsena ka madi a dipudi , le dinamane , mme o tsene ka madi a gagwe mo lefelong le le boitshepo ja boitshepo, a tsenela botlhe mme a re rekolola ka bosakhutleng. ¹³ Gonne fa madi a dipodi le dipoo , le go kgatsha molora wa moroba mo go ba ba itshekologileng, go ba tsisa gautshwane le Modimo ka go ntlafadiwa nama ya bone, ¹⁴ madi a aga Keresete yo ka Moya o o boitshepo a ikitshitseng setlhabelo se se senang bogole , go tlhapisa letswalo la rona mo ditirong tse di suleng gore re kgone go direla Modimo yo o tshelang, a tla re ntlafatsa bogolo jang? ¹⁵ Ke ka moo a leng motshereganyi mo kgolaganong e ntsha. Ka lebaka le,le ka go bo leso lengwe le nnile teng go golola ba ba kafa tlase ga kgolagano ya ntlha mo maleong a bone, ba ba biditsweng ba tla amogela tsholofetso ya boswa jo bo sa feleng . ¹⁶ Gonne fa go nang le mokwalo wa kabo ya boswa, leso la yo o o dirileng le tshwanetse go rurufadiwa. ¹⁷ Gonne mokwalo wa kabo ya boswa o diragadiwa fela fa yo o kwadileng a sule, fa a santse a tshela ga o na thata epe. ¹⁸ Tota le kgolagano ya ntlha ga e a simololwa kwa ntle ga madi. ¹⁹ Gonne fa Moshe a sena go neela batho botlhe taolo mo molaong, o ne a tsaya madi a dipodi le dinamane,metsi le leloba le lehibidu,sethunya se se nkgisang monate a kgatsha lekwalo le batho botlhe. ²⁰ O ne a re, "Se ke madi a kgolagano e modimo a le e laoletseng". ²¹ Ka mokgwa o o tshwanang, o ne a kgatsha madi mo motlaaganeng le dijana tsotlhe tse di neng di dirisiwa mo tirelong . ²² Go ya ka molao , dilo ka bontsi di tlhapisiwa ka madi. kontle ga tshololo ya madi ,ga gona boitshwarelo. ²³ Jalo he, go ne go tlhokafala gore meriti ya dilo tse di kwa legodimong di tshwanetse go ntlafadiwa ka madi a ditlhabelo tsa diphologolo. Lefa gontse jalo, dilo tsa legodimo tsone di ne di tshwanelwa ke go tlhapisiwa ka ditlhabelo tse di botoka . ²⁴ Keresete ga a tsena mo lefelong le le boitshepo ja boitshepo le le dirilweng ka diatla, se e leng moriti fela wa dilo tsa nnete. Mo boemong jwa seo,a tsene mo legodimong la nnete, gore jaanong a re emele fa pele ga Modimo. ²⁵ Ga a a ya koo gore a intshe setlhabelo gantsi, jaaka moperesiti yo mogolo yo o neng a tsena mo lefelong la boitshepo ja boitshepo ngwaga le ngwaga ka madi a yo mongwe . ²⁶ Fa go ne go ntse jalo, o ne a ka tshwanelwa ke go boga gantsi go tswa kwa motheong wa lefatshe. Mme jaanong ke gangwe fela kwa bofelong jwa metlha, e e kailweng gore a nyeletse sebe ka go intsha setlhabelo. ²⁷ Mongwe le mogwe o laoletswe go swa gangwe fela mme morago go tla katlholo. ²⁸ Ka mokgwa o o tshwanang, Keresete le ene, yo o neng a ntshiwa gangwe fela go phimola maleo a ba le bantsi, o tla a bonala la bobedi a sa tlele sebe , mme a tlela kgololo ya bao ba ba mo letileng ka bopelotelele.