¹ Lomba seo teolimba tufinika kunyamula kufoka kwa ofoka, nakuti tisazikondweleshe teka. ² Lekani aliyense wa seo akondweleshe muyake mu vinthu vabwino, kuti amumangilijye pamozi. ³ Tiyeni tikondweleshe okhulupilila ayasu pakuti Kristu watiyika ngati cisanzo. Aliye cite vinthu kuti azikondweleshe yeve. Eyesa kukondwelesha Mulungu ngankhale kuti bayakine benzomunyoza, ici cenze monga moyolabilila malemba kuti, "Banthu pebenzokunyozani, cenzemonga benzonyoza soti neo." ⁴ Kumbukilani kuti ivi vinthu velembewa mumalemba vilomo kuti tiphunzile, kuti tinkhale odekha mumazunzo. Munjila iyi malemba yatilimbikishe kuti Mulungu aticitle vonse velonjeza. ⁵ Nupemphela kuti Mulungu amupeni kudekha mtima na cilimbiso kuti munkhale na mtendele na ayanu, kucita monga Kristu Yesu. ⁶ Ngati mucita ici, monse muko yamika Mulungu pamozi, Atate ba Ambuye Yesu Kristu. ⁷ Nulabila na mweo okhulupilila muli mwa Aroma, landilanani mweka na mweka. Ngati mucita teto, banthu bayamike Mulungu poona mweo munkhala ngati Kristu. Landilanani mweka na mweka monga mwekulandililani Kristu. ⁸ Nufuna kuti mukumbukile kuti Kristu etithandiza seo Ayuda kuti tizibe cacendi pa Mulungu. Yesu pewela, esimikijya cacendi pa malonjezo yepanga Mulungu ku makolo yasu kale- kale. ⁹ Koma ewela soti kuzothandiza Amitundu, kuti balemekeze Mulungu pa cifundo cake. Cifundo ca Mulungu caonesha mau yelabila Davide kwa Mulngu yali mumalemba kuti: "Nikakulemekezeni pakati pa Amitundu; Nikayimbe nakukuyamikani." ¹⁰ Mose naye elemba, "Mweo Amitundu, sangalalani nase mtundu wa Mulungu." ¹¹ Ndipo Davide elemba mumalemba, "Lemekezani Ambuye monse mweo Amitundu; lekani aliyense alemekeze yeve." ¹² Ndipo Yesaya elemba mumalemba, "Mwana wa Davide akuzolamulila pa Amitundu. bakuyomuyembekezela kuti akakwanilishe velonjeza." ¹³ Nupempela kuti Mulungu akulimbikisheni pumulanga kusogolo nakuti akacite velonjeza kuti akacite. Nupemphela kuti munkhale osangalala na mtendele mu cikhulupililo cake. Mzimu Utuba ukupaseni mphamvu yaciyembekezo kuti mukalandile vinyinji kuposa velonjeza. ¹⁴ Okhulupilila ayangu nuziba kuti mwankhala bwino ngako nayanu. Mwacita ici ndaba muziba vakufuna Mulungu kuti mucite ndipo ndaba mukwanisha kuphunzisa ayanu. ¹⁵ Nalemba iyi kalata mosabisila pa vinthu viyake nacolinga cakuti nikukumbusheni. Nalemba teti pakuti Mulungu waniyika kuknhala otumiwa, nanga kuti nenzoyenela lini. ¹⁶ Ecita teti kuti nisebenzele Yesu Kristu pa Amitundu. Mulungu wanisankha ngati mubusa panulalikila uthenga wabwino kuti alandile Amitundu okhulupilila mwa Kristu. Bakankhale ngati copeleka ca Mzimu Utuba capadela kwa Mulungu tyala. ¹⁷ Cuyamba teti, kamba ka ubwenzi wangu na Yesu, ndine okondwela pa nchito ya Mulungu. ¹⁸ Nilabile molimba pa nchito yawa cita Kristu kupitila mwa neo kuti Amitundu amvwile Mulungu mumau yao na muzinchito, ¹⁹ Kristu esebenza mwa neo poonesha vizindikilo na vodabwisha vecitika mumphamvu ya Mzimu wa Mulungu, kuti kumalo kulikonse kwene luta, kufumila ku Yerusalemu mpakana ku Iluriko, Nasilijya nchito yangu yolalikila uthenga wa Kristu. ²⁰ Punulalikila uthenga uyu, nuyesa-yesa kulalikila mumalo yakuti bakaliye mvwapo za Kristu. Nucita ici kuti nisacite nchito yakuti muyakine eyiyamba kale. Sunufuna kunkhala ngati ni munthu omanga ng'anda palulu pa fandeshiyoni ya mwine. ²¹ Mosiyana, Nuphunzisa Amitundu, kuti cucitika cingankhale celembewa mumalemba: "Banthu akaliye mvwepo uthenga wa Kristu, akamuone. Beve bakaliye mvwepo za yeve bakamvwishishe za yeve." ²² Ndaba nayesa kulalikila uthenga wa Kristu mumalo yakaliye mvwapo za yeve, nankhala nuleshewa kuwela kwa mweo. ²³ Koma lomba kuliye malo yakaliye mvwapo za Kristu. kwa zaka zinyinji nankhala nulakalaka kuti nikuyendeleni. ²⁴ Nufuna kuluta ku Spanya, nuyembekezela kuti munitandize pa ulendo wangu. Ndipo nufuna kuti nizapaname kuti nikacezeko namwe. ²⁵ Koma ningakuyendeleni lini lomba pakuti nikuya ku Yerusalemu kuti nitwale ndalama za banthu ba Mulungu. ²⁶ Okhulupilila aku Makedoniya na Akaya beganiza zo sonkha ndalama zopasa okhulupilila ku Yerusalemu, banthu ba Mulungu, osauka. ²⁷ Beve beka beganiza kucita teti, koma cacendi bali na ngongole ku banthu ba Mulungu aku Yerusalemu. Amitundu okhulupilila elandila zauzimu kufuma kwa Ayuda okhulupilila ndaba becimvwa za Kristu kucokela kwa beve , teto Amitundu nao ofunika kuthandiza Ayuda pakubapa vinthu. ²⁸ Nikasilijya nchito yotwala ndalama zabasonkha okhulupilila baku Makedoniya na Akaya, nikuyofuma mu Yerusalemu kuza ku Aroma pa ulendo wangu wakuya ku Spanya. ²⁹ Ndipo nuziba kuti patinikakuyendeleni, Kristu akuzotidalisa pakulene. ³⁰ Ndaba ndise ba Ambuye Yesu Kristu ndipo Mzimu wa Mulungu ulengesha kuti tikokondana, nukulimbikishani kuti mukonipemphelelako. ³¹ Pemphelani kuti Mulungu anicinjilijye ku Ayuda osakhulupilila panili mu Yudeya. Pemphelani kuti okhulupilila amu Yerusalemu akapokelele ndalama zunuba twalila. ³² Pemphelani paizi zinthu kuti Mulungu akondwele nane paulendo wakuza uko, nakuti nika pumule pakati panu- ndipo namwe mukapumule naneo- kwaka nthawi. ³³ Nupemphela , Mulungu otipasa mtendele, ankhale namwe monse ndipo akuyavyeni. Lekani zinkhale teto.