¹ Okhulupilila ayangu, pakuti Mulungu wakucitilani cifundo munjila zinyinji, Nukusengani kuti muzitwale monga ni nsembe yamoyo, nsembe yumupasa Mulungu tyala ndipo yukondwelesha yeve. Niye njila imozi tyala yomupembezelamo. ² Musalole osakhulupilila kukusogolelani mwonkalila. Koma, lekani Mulungu akusintheni maganizo yanu nakuti yankhale ya nyowani kuti muzibe vakufuna Mulungu kuti mucite, ndipo kuti muziba njila zokondweleshamo yeve, njila zakusebenzelamo yeve. ³ Pakuti Mulungu mucifundo cake wanisankha kuti ninkhale otumiwa wake, cinthu cenenze osayenela, nulabila teti kwa aliyense wa mweo: Musayese kuti mulibwino kuposa mumulili. Koma, ziganizileni munjila ya nzelu, njila ilicimozi-mozi monga njila yawa lola Mulungu kuti mumukhulupilile. ⁴ Ngankhale munthu ali na thupi imozi, ili na viwalo vinyinji. Vonse viwalo nivofunikila pa thupi, koma vusebenza lini nchito yofanana. ⁵ Cimozi-mozi, seo, tingankhale anyinji, tilimu gulu imozi ndaba talumikijyana na Kristu, ndipo nise amozi. Pasankhale umozi oziona kuti yeve yeka niwofunukila kuposa onse. ⁶ Lomba, pakuti aliyense angacite vinthu vosiyana-siyana ndaba Mulungu otiumba mosiyana, tivicite nacidwi mosangalala. Seo tupasiwa mauthenga yayasu tilabile munjila yuonesha cikhullupililo casu mwa Mulungu. ⁷ Ao epasiwa na Mulungu kutumikila ayao acite teto. Ao bapasa Mulungu kuphunzisa coonadi acite teto. ⁸ Ao bapasa Mulungu kulimbikisha ayao acite namtima wa nthunthu. Ao bapasiwa kupasa vinthu ayao, acite teto na wanzi. Ao bapasiwa na Mulungu kusunga ao ecite teto, ndipo acite mwa luso. Ao bapasiwa na Mulungu kuthandiza ovutika acite mosangalala. ⁹ Mumufunikila ku konda banthu bakondeni namtima wa nthunthu. Zondani ciyipa. Pitiljyani kucita vakuona Mulungu kuti ni vabwino. ¹⁰ Kondanani ngati mwakucitila banthu ba banja imozi; ndipo ngati nikulemekezana, munkhale oyamba nimweo kulemekeza ayanu. ¹¹ Osacita ulesi. Koma nkhalani ofunishisha kusebenzela Mulungu. Munkhale achangu pumutumikila Ambuye. ¹² Kondwelani ndaba muyembekezela vati akucitileni Mulungu. Pumuvutika, Nkhalani odekha mtima. Nkhalani opemphela ndipo osalekejya. ¹³ Ngati banthu ba Mulungu asoba kanthu, gabanani nao vumuli navo. Nkalani ofunishisha kulandila ayanu. ¹⁴ Mupempheni Mulungu kuti abacitile cifundo ao okuvutishani ndaba mukhulupilila mwa Yesu. Muujyeni kuti abamvwele cifundo; Osamupempha kuti abacitile viyipa. ¹⁵ Ngati niokondwela kondwelani nao. Ngati niosakondwa nkhalani nao mukusakondwela kwao. ¹⁶ Funilani ayanu vinthu monga vumufuna pamoyo wanu. Osankhala uzikujya mumaganizo, Koma nkhalani, poyanu nabanthu ooneka monga niosalemekezeka. Osaganiza kuti munanzelu. ¹⁷ Osabwezela ciyipa pa munthu aliyense wakucitilani ciyipa. Citani vinthu munjila yakuti banthu onse bazibe kuti niya bwino. ¹⁸ Nkhalani mumtendele na banthu ayanu, kuti vinthu musogolele ngati nikotheka. ¹⁹ Okhulupilila ayangu, bunukonda, osacita ciyipa kwa bala okucitilani ciyipa. Koma, lekani Mulungu abapase cilango. Malemba yakuti, "Nikobabwezela ao ocita viyipa. Ni ulamulilo wangu kubabwezela,' akuti Mulungu." ²⁰ Koma mumalo mobacitila ciyipa, citani mwakuphunzisila malemba: "Ngati adani banu bananjala, balyesheni. Ngati bana njota, bapaseni vakumwa. Pocita teto, bacite soni payakine bangasinthe mikhalidwe yao pa mweo." ²¹ Osalekelela viyipa vakucitilani bayakine kuti vikugonjeseni. Koma bacitileni vabwino kuposa vakucitilani beve.