¹ Ni kuti nikosheko, "Mulungu ko wabakana banthu bake Ayuda?" Yankho yufunika kunkhala, ² "Yayi teti!" Kumbukilani kuti neo nane nine wa mtundu wa Israeli, obadwa mwa Abraham, mutundu wa Benjamin, koma Mulungu aliye nikane neo. Yayi, Mulungu aliye kane banthu bake, besankha eka kale- kale kuti bankhale banthu bake bati akadalise mwa padela. Kumbukilani kuti Eliya ebuda podandaula kwa Mulungu pa banthu ba Israeli, monga mwa mau kuti; ³ "Ambuye, bapaya onse aneneli banu, baononga na maguwa yanu. Nineo neka no khulupilila mwa mweo nili moyo, lomba nane ofuna kuti banipaye!" ⁴ Mulungu emuyankha teti: "Neweo weka lini wasala okhulupilika kwa neo. Nasamala naku zisungila seveni sausande madoda mu Isreali, madoda yaliye pembezopo fano ya bala." ⁵ Teto, molingana, pali gulu losalila la seo Ayuda basundaka okhulupilila. Mulungu watisankha kunkala okhulupilila ndaba tyala pakuti wationesha cikondi, munjila itisayenela. ⁶ Pakuti ndaba ni mwacisomo kwa bala osankhika, nikamba lini pakuti pali nchito yacita kuti abasankhe. Ngati Mulungu osankha banthu kamba kazinchito zao sembe aliye lole cisomo pakati pao. ⁷ Pakuti Mulungu engosankhapo pa banthu bamu Isreali, ici culengesha tizibe kuti anyinji Ayuda ekangiwa kupeza vebenzo sakila- ngankhale kuti Ayuda osankhika na Mulungu evipeza. Anynji mwa Ayuda benzofuna lini kuziba venzo labila Mulungu kwa beve. ⁸ Izi ndiye monga mwecilembela muneneli Yesaya: "Mulungu ebapanga kunkhala anthota. Sembe beona ca zoona, koma baliye ikeko nzelu. Sembe becimvwa cezekambiwa kwa beve, koma baliye ikeko nzelu ku uthenga webepasiwa. cankhala teti mpakana lelo." ⁹ Ayuda onikumbusha vekamba mfumu Davide pepempha Mulungu kuti aleke malingalilo ya adani bake kunkhala aliye nzelu: "Lekani bankhale opusa, monga nyama zuponela mucono kapena mungoda! Lekani bankhale omasuka monga bali pa madyelelo, lekani madyelelo nkhale pa nthawi yakuti mubakate, ndipo bakacimwe, zocokapo zake kuti mukabaononge. ¹⁰ Lekani basaone ciyipa pacikuza pa beve. Balekeni nthawi zonse bankhale muma zunzo kamba ka mavuto yao. ¹¹ Ngati muyakine angakoshe, "Lomba Ayuda pecimwa mwa kusakhulupilila mwa Krist, cutanthauza kuti nthawi zonse bakankhale opatuka kwa Mulungu? Ningayankhe, "Yayi, baliye patuke kwa Mulungu kwasila! Mumalo mwake, ndaba becimwa, Mulungu opulumusha Amitundu kuti Ayuda akhumbwile mwakubadalisila Amitundu, kuti amupemphe Kristu kuti abapulumushe." ¹² Ayuda pebemukana Kristu, zocokapa zenze zakuti Mulungu edalisa pakulene banthu bayakine muziko pakubapa umwayi okhulupilila. Ndipo Ayuda pebekangiwa pa mzimu, zocokapo zenze zakuti Mulungu edalisa pakulene Amitundu. Pakuti izi nizacendi, ganizilani cikankhale cabwino cotyani Ayuda onse osankika na Mulungu pati ba khulupilile Yesu! ¹³ Lomba ni kwa mweo Amitundu unulabila nao pazinthu zukonkhapo.Nineo otimiwa pa Amitundu monga mweo,numekela ngako pa utmiki wangu wenipasa Mulungu. ¹⁴ Koma niceyembekezo cangu soti kuti kamba ka nchito yangu Ayuda ayangu acite sanje, kuti kamba ka ici bayakine banga khulupilile nopulumushiwa. ¹⁵ Mulungu wakana anyinji Ayuda ayangu kamba kakuti bekana ku khulupilila, na colinga cakuti epanga mtendele pakati pa yeve na banthu Amitundu. Ngati niye vecitika Ayuda anyinji pebekana Kristu, ganizilani vinthu vabwino viti vikatike pavuli pomukhulupilila. Cikabe monga auka kwa akufwa! ¹⁶ Monga ngati vipaso voyamba ni vituba niyekuti na vosalila ni vituba. Monga misambo yacimuti ili ya Mulungu ngati mijyu nayo niya Mulungu. ¹⁷ Mulungu wakana anyinji Ayuda munjila imozi-mozi monga banthu mwakutendela misambo yoyuma kucosa ku cimuti. Ndipo alyense wa mweo Amitundu walandiliwa na Mulungu muli monga musambo wa cimuti cenze posalima watendewa kuika pa cimuti cili pa nthaka yosamalika. Mulungu wakulolani kuti mulandile ku madaliso yepasa Makolo basu Ayuda. monga misambo yulyela kucokela ku mijyu ya cimuti camu nthaka yolimilila bwino. ¹⁸ Mwa ici, mweo Amitundu musa zonde Ayuda bekaniwa na Mulungu, nanga kuti bali monga ni misambo yamene munthu wacosa ku cimuti! Ngati mufuna kuzitukumula kamba Mulungu mwawakupulumusilani, kumbukilani ici: Misambo yulyesha lini mijyu. Mumalo mwake, mijyu yulyesha misambo. Molinganijya, Mulungu wakuthandizani kamba ka vamwalandila kucokela kwa Ayuda! Paliye camwabapasa Ayuda. ¹⁹ Payakine mukambe nane kuti, "Mulungu ebakana Ayuda ngati banthu otenda misambo iyipa kucosa ku cimuti notaya, ndipo wacita ici kuti atilandile seo Amitundu, monga banthu otola misambo noika pa cimuti ca bwino." ²⁰ Ningayankhe kuti nizoona, koma kamba kakuti Ayuda aliye khulupilile mwa Kristu ndiye pebekana Mulungu. koma mweo , nikamba tyala kakuti mukhulupilila mwa Kristu kuti mwapana pano molimba. Teto osazitukumula, koma munkhale ozula naku dabwa! ²¹ Pakati Mulungu aliye pulumushe Ayuda osakhulupilila, bekula ngati cimuti cili na misambo yacilingedwe kucokela ku mijyu, lomba ngati namwe simuza khulupilila, sazakupulumushani. ²² Onani pela kuti Mulungu ocita izi mwacisomo, koma soti olanga. Abelanga Ayuda bekana kukhulupilila mwa Kristu. Koma Mulungu wakucitilani cisomo, koma akuyokulangani ngati mupitilijye lini kukhulupilila mwa Kristu. ²³ Ndipo ngati Ayuda akhulupilile mwa Kristu abewejye soti ku cimuti, cifukwa Mulungu okwanisha kucita teto. ²⁴ Mweo Amitundu poyamba mwenzilini naye Mulngu koma mwa mwapezapo kanthu panjila zesebenzesha Mulungu kudalisa Ayuda. cili monga kutola misamba yakuti munthu watenda kucosa ku cimuti- cimuti cekula kuliye ocishanga- ndipo, mosiyana na mwakucitila banthu, kuphatikijya pa cimuti ciyake, Teto Mulungu akuyo landila Ayuda ndaba benze bake nakale! cili monga kuwejyelapo misamba yenzepo nakale! ²⁵ Amitundu okhulupilila ayangu, Nufuna kuti muzibe ici cisinsi ca coonadi, kuti musazitole kuti muziba vonse: Banthu banyinji ba Israeli bapitilijye kucita nthota mpakana onse osankika Amitundu akhulupilile mwa Yesu. ²⁶ Ndipo Mulungu akapulumushe onse Israeli. Ndipo aya mau amumalemba yakankhale ya zoona: "Yeve omasula banthu bake mumtendele akacokele kuli Mulungu pakati pa Ayuda. Akuyokhululukila macimo ya Israeli." ²⁷ Monga mwa kulabilila Mulungu, "Phangano yati nikapange nao ni yakuti nikabakhululukile macimo yao." ²⁸ Ayuda bekana uthenga wa bwino wa Kristu lomba Mulungu obatola ngati adani bake. Koma ici cakuthandizani Amitundu. Lomba pakuti ndiye mtundu wesankika na Mulungu, Mulungu opitilijya kubakonda kamba ka lonjezo kuti abacitile Makolo yao. ²⁹ Akali kubakonda, ndaba aliye sinthe Maganizo pa lonjezo kuti akabape, na mwebayitila kuti ni mtundu wake. ³⁰ Mweo Amitundu poyamba muliye mumvwile Mulungu, koma lomba wakucitilani cifundo kamba kuti Ayuda aliye mumvwile. ³¹ Cimozi-mozi, lomba omumvwila lini Mulungu. Munjila yacifundo yecitilamo mweo, akaba citile cifundo soti. ³² Mulungu walabila kuti banthu onse Amitundu na Ayuda omvwilila lini yeve. Aciti ici kuti aoneshe cifundo kwa onse, ³³ Nudabwa pa vinthu va nzelu vawacita Mulungu navakuziba nthawi zonse. Paliye anga mvwishishe kapena kuziba mokwanila. ³⁴ Nukumbukila malemba yakuti, "Paliye oziba Mulungu vakuganiza. Paliye emupasapo nzelu." ³⁵ Ndipo, "Paliye emupasapo ciliconse cakuti Mulungu eganiza kuti amupasilemo mphoto." ³⁶ Mulungu ndiye elenga vonse. Ndiye soti olengesha kuti vinthu vonse vinkhaleko. Cilingo cevilengela nicakuti vikatamande yeve. Lekani banthu onse balemekeze yeve kosalekejya. Lekani zinkhale teto.