¹ Ndaba nalumikijyana na Kristu , nikuujyeni vacendi. Nunama lini wenye! Malingalilo yangu yosimikijya teto ndaba Mzimu Utuba unisogolela. ² Nukuujyani kuti mulilile ngako Isreali ayangu. ³ Neo pa neoneka nine okonzeka kuti Mulungu anitembelele na kunifumya kwa Yesu ngati ici cingatandize kusintha kwa Israeli ayangu, mutundu wangu wacibadidwe, kuti bakhulupilile mwa Kristu. ⁴ Beve, ngati neo, na Israeli. Mulungu ebasankha kunkhala bana bake. Ni kwabeve kwaeonesha kuti yeve niwabwino. Ni kwabeve kwepanga pangano. Ni kwabeve kwepeleka lamulo. Ni beve bali na cipembezo ca Mulungu. Ni kwabeve kwe longeza vinthu vinyinji. ⁵ Ni makolo basu, Abrahamu, Isaki na Yakobo, besankhiwa na Mulungu kuti bayambe ziko lasu. Ndipo, nikucokela kwa seo Israeli kwe badwa Kristu ngati munthu. Ni Mulungu, oyenela matamando yasu kosasila! Ici ni cacendi! ⁶ Mulungu elonjeza Abrahamu, Isaki na Yakobo kuti bana bao onse bakalandile madaliso yake. Koma ngankhale anyinji mwa Israeli ayangu bamukana Kristu, ici cutanthauzalini kuti Mulungu wakangiwa ku kwanilisha velonjeza. Pakuti ni banthu lini onse bali bana ba Yakobo na bolabila kuti na banthu mu Israeli bakulabila Mulungu kuti bana bake bacendi. ⁷ Ndipo ni bana lini onse ba Abrahamu bacibadidwe bakulabila Mulungu kuti ni bana ba Abrahamu bacendi. Koma Mulungu oonapo bakiyakine tyala kunkhala bana ba Abrahamu bacendi. Ici cuvumelejyana na velabila yeve kwa Abrahamu kuti: "Ni Isaki, osati bana bako bayakine mwatimukafume bana bati ukanhkale wisiwao wazoona." ⁸ Cunutanthauza ni ici, ni onse lini bana Abrahamu bakulandila Mulungu kuti ni bana bake. Koma banthu tyala benze mu malingalilo yake Mulungu pepeleka lonjezo kuti akamupase bana Abrahamu- niye aba banthu bakulabila kuti ni mubadwe wake wacendi ndipo nibana bake. ⁹ Ici niye celonjeza Mulungu: "Panthawi monga ino cakacikuza nikawele soti kwa weo, ndipo Sara mkazi wako akankhale na mwana mwanalume." Mulungu elonjeza ici, ndipo ekwanilisha. ¹⁰ Cenze cimozi-mozi na Rabeka, mkazi wake wa Isaki, mwana wa Abrahamu, Rabeka pemita vumo ya mapasa. ¹¹ Mapasa aya, Yakobo na Esau, yakaliye badwa, ¹² ndipo aba bana benzebakiliye cita cinthu cabwino kapena ciyipa, Mulungu eciti kwa Rabeka, "Mukulene akatumikile musaza wake, kusiyana na mdauko." Mulungu elabila teti kuti tizibe eci: Kuti akafuna kucita cinthu, osankha banthu ndaba pakuti wafuna ku basankha, osati ndaba bamucitila cinthu ciyakine. ¹³ Niye mwelabilila Mulunug mu malemba: "Nemusankha Yakobo, musaza. Nemukana Esau, mkulu wake." ^{14 15 16} Munthu muyakine angakoshe, "Ko Mulungu okondela posankha tyala banthu bayakine?" Ningayankhe kuti, "Yayi okondela lini!" Mulungu eujya Mose, "Nikamvwele cifundo nakuthandiza aliyense unufuna!" Mulungu osankha banthu, osati kuti ndaba beve ofuna kuti Mulungu abasankhe kapena kamba kakuti boyesa mokwana ku kondwelesha Mulungu. Koma, osankha banthu ndaba anacifundo pa bala oseyenela kanthu. ¹⁷ Mose elemba kuti Mulungu eujya Farao kuit, "Niye cenekuikila mfumu ya Egypto: Kuti nikacite nawe nkhondo ndipo na banthu onse muziko lapansi bakathandizile ayao kulemekeza mbili yangu." ¹⁸ Niye tuona kuti Mulungu angamvwile cifundo munthu aliyense wawafuna mwinekazi. Ndipo tuziba kuti Mulungu angeleshe munthu aliyense kunkhala na nthota monga mwecitila na Farao. ¹⁹ Payakine umozi wa mweo alabile kuti, "Ndaba Mulungu ozibilathu vakusogolo vocita banthu ndipo paliye angakane vofuna Mulungu, nicabwino lini Mulungu kupasa cilango kwa ao omucimwila." ²⁰ Ningayankhe kuti, "Niwe munthu tyala weo uliye lamulo loshusha Mulungu! Ali monga munthu oumba vinkhombe, cinkhombe ciliye lamulo lokosha oumba, "Nicinji cawaniumbila teti?" ²¹ Koma oumba alinayo mphamvu yosunako dothi noumba cinkhombe cabwino cakuti banthu bakaone kuti nicodula ngako- lomba na dothi yosalapo nakuumbamo cinkhombe cakuti munthu muyakine akocisebenzesha masiku yonse. Mulungu ali na ulamulilo woteto. ²² Ngankhale kuti Mulungu ofuna kuonesha ukali pa cimo, ngankhale ofuna kuonesha patuba kuti angapase cilango banthu ocimwa, koma ebalekelela modekha belengesha kuti akalipe niye benzofunika cionongeko. ²³ Mulungu oyembekeza kuti cinkhale patuba mwakucitila cifundo, ao banthu bekonzekelathu nthawi ikaliya kwana kuti bakalandile ulemelelo- ²⁴ kuikilako nao seo osankhika. etisankha osati tyala pakati pa Ayuda koma na pakati pa Amitundu. ²⁵ Mulungu alinao ulamulilo osankha pakati pa Ayuda na pakati pa Amitundu, monga mwelembela muneneli Hoseya: "Banthu anyinji benzelini banthu bangu, koma lomba nulabila kuti ni banthu bangu. banthu anyinji benenzo konda lini, lomba nibakonde." ²⁶ Ndipo muneneli muyakine elemba kuti: "Mulungu kwebaujya poyamba kuti, 'Nimwe banthu bangu lini,' mumalo yamene yala obaujyiwa kuti bankhale bana ba Mulungu wa cendi." ²⁷ Yesaya naye elabila pa Aisraeli kuti: "Ngankhale kuti Aisraeli na nyinji cakuti paliye angababelenge, monga mucenga kumbali ya nyanja, natontho tyala bati bakapulumuke, ²⁸ Ndaba Ambuye akuyo langa mwamsanga onse banthu onkhala mu ziko ili, ekamba kuti akacite teto." ²⁹ Yesaya elemba soti, "Ngati Ambuye wa asilikali ba kululu eliyecitile cifundo bana basu bayakine kuti bankhale na moyo, sembe tenkhala monga mizinda ya Sodomu na Gomora, beeononga kubasilijyilatu." ³⁰ Tufunika tisilijye moteti: Ngankhale Amitundu enzoyeselela lini kunkhala atuba, bepeza kuti Mulungu akabaike mucilungamo mwa yeve ngati bakhulupilila mwa Kristu. ³¹ Koma Aisraeli benzoyesayesa kumvwila lamulo ya Mululngu, koma baliye kwanilishe. ³² Baliye kwanilishe ndaba benzocita vinthu mofuna ku kondwelesha Mulungu. bekangiwa kupanama ndaba bekana kukhulupilila Mulungu kuti abakhulukilile poyika cikhulupililo cao mwa Kristu. ³³ Niye velabila muneneli kuti vikacitike: "Mvwani! Nuika pa Aisraeli umozi ngati mwala wati ukoponesha banthu. Vakucita yeve vikakwiishe banthu. Koma, ao okhulupilila mwayeve sazacita soni."