¹ Teto Mulungu sazapasa cilango kwabala olumikijyana na Kristu Yesu. Mzimu wa Mulungu ulengesha kuti tinkhale mu umoyo wanyowane ndaba niseolumikijyana na Kristu ² Yesu. Munjila iyi, nufunika lini kucimwa ngati nuganizila pa cimo, ndipo sinizankhala soti opatulika kwa Mulungu. ³ Teyesa ku kumvila lamulo la Mulngu, koma cenze cacabe- cabe kuganiza kuti tinga kwanishe- tekangiwa kuleka kucimwa. Ndipo Mulungu etithandiza: Etumijya mwana wake pa ziko lapansi kuti mwana wake atucosa ku cimo. Mwana wake ewela na thupi monga lasu seo tucimwa. Mwana ewela kuzozipeleka nsembe pa macimo yasu. Pecita ici, eonesha kuti macimo yasu yenze yayipa cendi, ndipo kuti aliyense ocimwa apasiwe cilango. ⁴ Lomba tingakwanishe kucita vuyufuna lamulo yake. Tucita teti, osati mwa zocita zasu kulingana na zofuna zasu za cinkhalidwe casu ciyipa cakale, koma ponkhala mwaufunila Mzimu wa Mulungu. ⁵ Banthu onkhala mwa cifuno ca cinkhalidwe ciyipa cakale oganizo pa cinkhalidwe ciyipa. Koma banthu onkhala kulingana vaufuna Mzimu wa Mulungu oganiza pa vinthu vamu Mzimu. ⁶ Awo oganiza pa zofuna za nkhalidwe iyipa sibazankhala kosasila. Koma ao ofuna vuufuna Mzimu wa Mulungu bakankhale na moyo osasila na mtendele. ⁷ Lekani nifotokoze pa ici. Ngati banthu ofuna zofuna cinkhalidwe ciyipa, bosemphana na Mulungu. Omvwila lini lamulo lake. Nicendi, bangakwanishe lini kumvwila lamulo lake. ⁸ Banthu ocita zofuna cinkhalidwe ciyipa angakondweleshe lini Mulungu. ⁹ Koma tufunikila lini kulola nkhalidwe iyipa yakale kutilamulila. Tingalole Mzimu wa Mulungu kutilamulila, ndaba unkhala mukati mwasu. Ngati Mzimu ucokela kwa Kristu unkhala lini mu munthu, uyo munthu alilini mwa Kristu. ¹⁰ Lomba pakuti Kristu onkhala mwa mweo mwa Mzimu wake, Mulungu oona mathupi yanu ngati yakufwa, ndipo mufunika lini kucimwa. Ndipo oona mizimu yanu ngati ya moyo, ndaba akuikani olungama mwa yeve. ¹¹ Mulungu eusha soti Yesu pecifwa. Ndaba Mzimu wake unkhala mwa mweo, Mulungu akuyotola ma thupi yanu, kuti yakuya kuimfwa, kunkhala soti namoyo. Emuusha Kristu pecifwa, ndipo mukankhale na moyo soti. ¹² Okhulupilila ayangu, tuyenela kunkhala kulingana na Mzimu vuutiujya. Tuvomelejyewa lini kunkhala muufunila mukhalide wasu wakale. ¹³ Ngati munkhala mucikhaladwe cakale mukankhale lini na Mulungu kosasila. Koma ngati Mzimu ukuleshani kucita vinthu viyipa, mukankhale na moyo osasila. ¹⁴ Seo tumvila Mzimu wa Mulungu nise bana Amulungu. ¹⁵ Ndaba muliye landile mzimu wa mantha. nimwe lini bajya oyopa obalamulila. Koma Mulungu wakupasani Mzimu wake, ndipo Mzimu wake watiyika kunkhala bana bake. Mzimu ulengesha kuti tililile kwa Mulungu kuti, "Nimwe Atata!" ¹⁶ Mzimu usimikijyila vuyukamba mizimu yasu, kuti nise bana ba Mulungu. ¹⁷ Pakuti nise bana ba Mulungu, nase tikalandile vetilonjeza Mulungu. Ndipo tikuyolandila pamozi na Kristu. Koma tufunika kupita mumavuto mwecitila Kristu kuti Mulungu akatilemekeze. ¹⁸ Nuganizila kuti mavuto yatilimo pa nthawi ino yofunikila lini kuyaganizila ngako, ndaba zabwino zilikusogolo uku zati akavumbulushe Mulungu zikankhale zikulene. ¹⁹ Vinthu veciumba Mulungu vuyembekeza Mulungu patiakavumbulushe bana bake bacendi. ²⁰ Mulungu aliyelole kuti vinthu veciumba kuti vikwanilishe cilingo ceviumbila. ni ndaba lini kuti enzofuna kuti vikange, ²¹ Mulungu eviumba teti kuti vintu veumba sikuliyakine vikafwe lini soti ndipo sivizawola. Akamasule ivi vinthu kuti vika lobe mu ulemelelo wa Mulungu. ²² Tuziba kuti mpakana lelo cili ngati vinthu vecilenga Mulungu vubuula pamozi muvobaba. Cili ngati linina lili na vobaba poyembekezela mwana kuti abadwe. ²³ Ni vinthu lini veciumba tyala vubuula koma nase tubuula mkati. Seo tili na Mzimu wa Mulungu- niye mphaso zoyamba za Mulungu putuyembekeza kuombolewa kwa ma thupi yasu. ²⁴ Ndaba Mulungu etipulumusha mwa ciyembekezo mwa yeve. Ngati tili na vinthu vetenzoyembekeza, sitenzofunikila kueyembekezela soti. Ngati wacipeza cewenzoyembekezela, ufunikila lini kuceyembekezela soti. ²⁵ Lomba pakuti tikalikuyembekezela, tiyembekezele modekha. ²⁶ Mzimu wa Mulungu utithandizila ngati tafoka. Tuzibalini bwino mutinga pemphelele. Koma Mzimu wa Mulungu uziba; puutipemphelela, utipemphelela nabuulo wakuti sitinga fotokoze na mau aliyonse. ²⁷ Mulungu oziba maganizo yasu na zili mkati mwasu, oziba vakufuna Mzimu. Mzimu wake utipemphelela seo tili bake mwakufunila yeve. ²⁸ Ndipo tuziba kuti kwa ao okonda Mulungu, obacitila zonse zucitika za bwino. ocita izi kwabala osankhika pa cilingo cake. ²⁹ Mulungu otiziba nakale ndipo eganiza zotisintha cikhalidwe kuti tinkhale ngati mwana wake. Cazoona nicakuti Kristu wa lemekeza ngati mwana oyamba wa Mulungu pakati pa bana anyinji anakazi na analume. ³⁰ Ndipo bala beciyita kale Mulungu bati bakankhale ngati mwana wake, ebaita kuti bankhale soti na yeve. Ndipo beciyita kuti bakankhale nayeve ebayita kuti bakankhale olungama mwa yeve. Ndipo kwa bala beyika kunkhala olungama mwa yeve, akabalemekeze. ³¹ Lomba nikuujyeni vutuphunzila pa ivi vonse vakuticitila Mulungu. Ndaba Mulungu oticitila ivi vinthu ndipo kuliye muyikine angapambane seo. ³² Mulungu aliye bise ngankhale mwana wake. Koma, emupeleka kwa adani bake kuti bamupaye kuti seo tukhulupilila tikamulumuke pa imfwa yake. Ndaba Mulungu ecita ici, akatipe vonse vutufuna kuti tikankhale mwa yeve. ³³ Kuliye aliyense angatinamijyile pa meso ya Mulungu, ndaba watisankha kuti tinkhale bake. Niyeve watiyika kuti tinkhale olungama mwa yeve. ³⁴ Kuliye soti angatitembelele. Kristu niye etifwila- ndipo kupyola pa ici, euka kwakufwa- ndipo olamulila na Mulungu pa mpando wolemekezeka, ndipo niyeve otipapatilako. ³⁵ Ndipo paliye munthu kapena cinthu cingaleshe kuti Kristu aleke kutikonda! ngankhale munthu aticite ciyipa, ngankhale aticite cobaba,ngankhale tinkhale ciliye vakulya, ngankhale tinkhale tiliye vovwala vokwana, ngankhale tinkhale mu nthawi yoyofya, ngankhale kuti munthu atipaye. ³⁶ Vinthu voteti vingacitike kwa seo, monga malemba moyolablilila kuti David eciti kwa Mulungu, "Ndaba nise banthu banu, nthawi zonse bayakine ufuna kutipaya, monga wamalonda yopaya nyama oona kuti mbelele niye nyama yopaya." ³⁷ Koma ngankhale kuti vinthu vonse viyipa viticitikile, tikapambane ndaba Kristu, otikonda , otithandiza. ³⁸ Nukhulupilila kuti kuliye ciliconse cucokela kwa kufwa, ngankale vucita ngati seo tinamoyo, ngankhlae angelo, kapena vibanda, kapena vocititka vicitika lomba, kapen vitivikacite kusogolo, kapena maulamulilo amphamvu, ³⁹ kapena malo yapa lulu, kapena malo yapansi pa nyanja, kapena ciliconse ceumba Mulungu cingakwanilishe kuti cosa pa cikondi ca Mulungu mwa Yesu Kristu Ambuye wasu.