¹ Okhulupilila ayangu, cunufunishisha ngako ndipo pepemphelo yangu yosalekejya kwa Mulungu niyakuti akapulumushe mtundu wangu, wa Ayuda. Nunenela pa beve kuti ngankhale kuti bofunafuna ² Mulungu, boziba lini njila yabwino yo mufunilamo. ³ Oziba lini Mulungu mwakuikila banthu mucilingamo mwa yeve, teto bovumela lini vakufuna kubacitila Mulungu. ⁴ Kristu wamvwila bwino-bwino lamulo kuti ayike aliyense okhulupilila mwa yeve mucilungamo na Mulungu. Teto lamulo niyosayenelela soti. ⁵ Mose elemba za banthu enzofuna kumvwila malamulo yonse ya Mulungu: "Nibanthu ocita bwiwo-bwino vuyu labila lamulo bati bakankhale na moyo kosasila." ⁶ Koma ao bakuika mucilungamo mwa yeve ndaba okhulupilila mwa Kristu- kwa beve Mose akuti, "Pasankhale oluta ku lulu," kuti, na colinga cakuti akazenaye Kristu pansi kwa seo, ⁷ Mose olabila soti teti kwa beve: "Pasankhale oluta pansi pali bakufwa," niye kuti, nalingo yotola Kristu kufuma kwa akufwa kuzanaye kwa seo. ⁸ Koma, ao okhulupilila mwa Kristu angalabile velemba Mose kuti: "Mungapeze mosavuta uthenga wa Mulungu. Munga yalabile mau na kulingalila pa mau." Niye uthenga utulalikila: Banthu bakhulupilile mwa Kristu. ⁹ Uyu uthenga niwakuti ngati munthu wasimikijya kuti Yesu ni Ambuye, ndipo ukhulupilila cacendi kuti Mulungu emuusha kwa akufwa, akupulumushe. ¹⁰ Ngati banthu okhulupilila ivi vinthu, Mulungu abaike kunkhala olungama mwa yeve. Ndipo kwa ao olabila pameso ya banthu mosabisa kuti Yesu ni Ambuye- Mulungu abamupulumushe. ¹¹ Nivolembeka mumalemba pa Kristu, "Aliyense okhulupilila mwa yeve sazakhumudwa kapena kucita soni." ¹² Munjila iyi, Mulungu otola Ayuda na Amitundu kunkhala amozi. Ndaba ni Mulungu umozi wa banthu onse okhululpilila mwa yeve, otanthizila onse opempha yeve kuti abathandize. ¹³ Ici cili monga moyolabilila malemba: "Ambuye akapulumushe onse opempha yeve." ¹⁴ Banthu anyinji okhulupilila lini mwa Kristu, ndipo bayakine angayese kufotoka cifukwa cake cabasacitila teti. Bangalabile kuti, "Banthu bangamupemphe lini Kristu kuti abathandize ngati bakilye khulupilila mwa yeve! Ndipo bangamukhulupilile lini ngati bakaliye mvwapo za yeve! Ndipo bangamvwe tyani za yeve ngati paliye olalikila kwa beve! ¹⁵ Ndipo ao oyenela kulalikila angalalikile lini ngati Mulungu aliyebatume. Koma ngati okhulupilila alilikila kwa beve, cunkhala monga mwakulabilila malemba kuti: 'Ni cabwino banthu pakuwela nakuza na uthenga wabwino!" ¹⁶ Ningayankhe kwa bala olabila vinthu voteto kuti: "Mulungu watuma banthu kuyolalikila uthenga wa Kristu. Koma ni aliye lini wa Aisraeli oikako nzelu ku uthemga wabwino! Cili monga mwelabilila Yesaya pecimvwa kufoka: "Ambuye, cuoneka monga paliye ekhulupilila vetelalikila!" ¹⁷ Lomba, Nukuujyani kuti banthu okhulupilila mwa Kristu ndaba akumvwa za yeve, ndipo banthu okumvwa uthenga ndaba bayakine olalilkila pa Kristu! ¹⁸ Koma ngati munthu elabila kwa ao banthu, "Nivacendi Aisraeli becimvwa za uthenga uyu," Ninga labile kuti, "Inde, ngako! Cili monga mwakulabilila malemba: "Banthu onkhala muziko lonse lapansi baciona cilengedwe, ndipo namucisimikijyila mwalili Mulungu- ndipo banthu onse onkhala mumalo yakutali msanga bacimvwishisha ici!" ¹⁹ Moonjezela, Nicacendi kuti Aisraeli ecimvwa uthenga uyu. Beumvwishisha, koma bekana ku khulupilila mau. Kumbukilani kuti Mose enze oyamba kupeleka cenjezo ku banthu moteti. Ebaujya kuti Mulungu elabila kuti, "Muganiza kuti mayiko ya Amitundu ni mayiko lini olo patontho. Koma banthu bao bayakine bakakhulupilile mwa neo, ndipo nikuyobadilisa. Ndipo mukabakhumbwile ndipo mukakalipe nao, banthu umuganiza kuti onimvwishisha lini." ²⁰ Kumbukilani soti kuti Mulungu elabila mokwana kupitila mwa Yesaya, "Ayuda benzonifuna lini kuniziba bakanipeze" ²¹ Koma Mulungu olabila soti pa Aisraeli. Kuti, "Nthawi itali natambasula manja yangu ku banthu osanimvwila nakunikana neo ndipo colinga cangu nicakuti nibabweze kwa neo."