¹ Nde amonisi ngai Yosua, nganga Nzambe mokonzi, atelemi nzukukalu o boso bwa anzelu na Yawe, mpe satana na loboko la mobali mpo na komokamba. ² Yawe alobi na satana: Tika Yawe apamela yo satana!Tika Yawe apamela yo, ye oyo aponaki Yelusaleme! Oyo ezali lokoni elongwi o moto te? ³ Nzokande Yosua alataki molato na bosoto, mpe atelemaki nzukukalu o boso na anzelu. ⁴ Anzelu koloba na baye bazalaki o boso bwa ye: Bolongola ye molato na bosoto, mpe alobi na Yosua: Tala, nalongoli lisumu na yo mpe nalatisi yo bilamba na lokumu. ⁵ Nalobi: bomolatisa ekoti ya petwa, mpe bamokitisi omoto, mpe balatisi ye molato. Anzelu na Yawe azalaki wana. ⁶ Anzelu na Yawe alobi na Yosua maloba maye: ⁷ Boye elobi Yawe na mapinga: Soki okotambola semba na nzela na ngai mpe okokela mitindo mya ngai, nde okosambisa ndako na ngai mpe okobatela biteni na yango, mpe nakondingisa yo otambola bo elingi yo engebene na baye bazali awa. ⁸ Yusua, nganga Nzambe mokonzi, yo mpe baninga baye bafandi o boso, yokamela! Zambi bango nde bazali na elembo na ngai, tala nalingi kotinda mosali na ngai, akobengama nzete ebota mbuma. ⁹ Tala, mpo na libanga ya motuya natie o boso ya Yosua, ezali na miso sambo; nde ngai mei nakomi na bokasi bonso likolo na yango, elobi Yawe na mapinga, bongo na mokolo mwango nde nakutoli mbeba na ekolo yango. ¹⁰ Na mokolo mona, elobi Yawe na mapinga, nde moko na moko na bino abiangami na nse na nzete na mowiti mpe na mosuke.