¹ Natomboli miso mpe namoni, moto moko asimbi nsinga ya bopimi. ² Nalobi: akei esika nde? Mpe alobi na ngai: Nakei kopima Yelusaleme mpo nayeba bolai mpe bokuse bwa yango. ³ Nde tala, anzelu oyo azalaki kosolola na ngai abelemi, mpe anzelu mosusu ayei mpe bakutani. ⁴ Alobi na ye: kilingana, loba na elenge mobali boye: Yelusaleme ekozala engumba monene, mpo na boyike bwa bato na banyama bakofannda kati. ⁵ Yawe alobi, nakozala mpo na ye efelo na moto zinga zinga, mpe nakozala nkembo mpe bongengi na ye. ⁶ Bokima, bokima longwa na ekolo na moyi, elobi Yawe, zambi napanzi bino o bisika ya mipepe minei ya mokili, elobi Yawe. ⁷ Mibikisa Siona, yo oyo ofandi epai na elenge mwasi ya Babyloni. ⁸ Elobi Yawe na mapinga: Sima na yango, nde nkembo eyingeli! Zambi atindi ngai epai na bikolo biye bibotolaka bino biloko, pamba te, ye oyo asimbi bino ati ngai mosapi o liso. ⁹ Tala namami loboko na ngai likolo na bango, mpe bakonyongama na baye banyokolaka, nde bongo bokoyeba nazali na etinda uto Yawe. ¹⁰ Ganga na esengo mpe sepela elenge mwasi na Siona! Pamba te, nazobeleme mpe nakofanda o ntei ya bino, elobi Yawe. ¹¹ Bikolo nzike ekokangama na Yawe mokolo mona, mpe bakokoma bato na ngai, nakofanda kati na yo, bongo wana nde okososola te Yawe atindaki ngai epai na yo. ¹² Yawe nde akwi Yuda lokola libula na mabele na bule na ye, mpe aponi lisusu Yelusaleme. ¹³ Moto nyoso afanda swi o boso bwa Yawe, zambi ye atelemi uto efandelo na ye na bule.