¹ Matokia zao vaolagna zao: Raha misy ôlogno araiky magniry ny ho mpiandraikitry, dia magniry asa tsara izy. ² Noho zany ny mpiandraikitry tsy maintsy tsy managna tsigny. Tsy maintsy manam-bady vaiavy araiky izy. Izy tôkony hahay handanjalanja, misy fagnahy, tia filaminagna, tia mandray ôlogno. Tsy maintsy mahay mampianatra izy. ³ Tsy tôkony za-dratsy amin'ny divay izy, tsy mpila ady, fao ndraiky malemy fagnahy, feno fiadagna-pô. Izy tsy tôkony ho tia vaola. ⁴ Tôkony hitantagna tsara ny tokantragnony izy, aveo reo zanany tôkony hagneky azy am-pagnajagna tatôbe. ⁵ Fao raha tsy mahay mitantagna tokatragnony izy, akôry no hikarakarany fiangonan-Jagnahary? ⁶ Tsy tôkony ho ôlogno vao niaova fô izy, mbô tsy hiebohebo kay ho lavo amin'ny fagnamelohagna ny devoly. ⁷ Izy fagna koa tsy maintsy tsara laza amin'ny reo ôlogno egny ambailany, mbô tsy ho lavo agnaty fahafaham-baraka ndraiky fandriky ny devoly. ⁸ Reo Diakona, hotra zany faogna koa, dia tôkony ho mendriky. Zareo tsy tôkony higiaka divay maro loatra na tsy mahay onona ara-kanigny. ⁹ Tôkony hitagna fahamarignan'ny finoagna nambara miaraka amin'ny feon'ny fieritreraitagna madio. ¹⁰ Zareo faogna koa dia tôkony ho sedraigny alaoha, avakeo tôkony hanompo satria tsy manantsigny zareo. ¹¹ Reo vaiavy faogna koa tôkony ho magnaiva hotra zany. Tsy tôkony ho mpagnendrikendriky zareo. Tôkony hahay handanjalanja aveo mahatoky amin'ny raha jiaby. ¹² Reo Diakona dia tôkony hanambady vaiavy araiky. Tsy maintsy mitantagna tsara reo zanany ndraiky tokatragnon-jareo. ¹³ Fao reo zay nanompo tsara dia handray laza tsara ndraiky fahatokisagna gaida amin'ny finoagna hoan'ny haignin-jareo zay ao amin'i Jesôsy Kristy. ¹⁴ Manaoratra reto raha reto aminao zaho, avakeo magnantaigna ny hoavy tsy hoaila akagny aminao zaho. ¹⁵ Fao raha tara zaho, dia manaoratra mbô hahaizanareo ny fitondran-taigna ao amin'ny tokatragnon-Jagnahary velogno, lehy vato fehizoro ndraiky fioraignan'ny fahamarinagna. ¹⁶ Tsy azo lavigny fao ny fahamarinagna nambara zay araka Zagnahary dia gaida: "Izy dia niboaka tamin'ny nôfo, nihamarignan'ny Fagnahy, hitan'ny anjely, nambara tagnivon'ny reo firenena, ninoan'izao tontolo zao, avakeo nasandratra tamim-bogninahitry."