¹ Ry tiagna, aza mino ny fagnahy jiaby. Fao ndraiky, tsapay reo fagnahy mbô hahita fao avy amin-Jagnahary zare, satria mpagnazary sandoko maro no afa niala tamin'ny zao tontolo zao. ² Amin'ny zany no ahaizanare ny Fagnahin-Jagnahary ny fagnahy jiaby zay magneky fao Jesôsy Kristy zay tonga nôfo dia avy amin-Jagnahary, ³ ave ny fagnahy jiaby zay tsy magneky fao Jesôsy dia tsy avy amin-Jagnahary. Dia zany ny fagnahin'ny antiKristy, zay afa regninare fao hoavy, ave avaizo dia afa aketo an-tany. [Fagnamariahagna: misy dikan-teny talaoha sasany dia mivaky magnanjao: "Ary ny fagnahy jiaby zay tsy magneky fao Jesôsy tonga nôfo dia tsy avy amin-Jagnahary. Zany dia fagnahin'ny antiKristy, zay afa regninare fao hoavy, ave avaizo dia afa aketo an-tany.] ⁴ Are dia avy amin-Jagnahary, ry zanaka tiagna, ary afa nandresy zare, satria lehy araiky zay ao aminare dia goalahy mihoatra noho lehy araiky zay aketo amin'ny zao tontolo zao. ⁵ Izy reo dia avy amin'ny zao tontolo zao; noho zany zay jiaby koragnin-jare dia avy amin'ny zao tontolo zao, ave zao tontolo zao dia mitandregny zare. ⁶ Avy amin-Jagnahary atsika. Zay mahay Tompo dia magnaboaka atsika. Izy zay tsy avy amin-Jagnahary dia tsy magnaboaka atsika. Amin'ny zany no ahaizantsika ny fagnahin'ny fahamarinagna ndraiky ny fagnahin'ny fahadisoagna. ⁷ Ry tiagna, aoka atsika hifankatia, fao ny fitiavagna dia avy amin-Jagnahary, ave zay jiaby mitia dia natairaka Zagnahary ndraiky mahay Zagnahary. ⁸ Ny ôlogno zay tsy mitia dia tsy mahay Zagnahary, satria Zagnahary dia fitiavagna. ⁹ Noho zany ny fitiavan-Jagnahary dia nambara tamintsika, fao Zagnahary dia nandaifa Zanany lalahy taokagna amin'ny zao tontolo zao mbô ho velogno noho Izy atsika. ¹⁰ Ao amin'ny zany fitiavagna zany, tsy ny nitiavantsika Zagnahary, fao ny nitiavany atsika, ary ny nandifasany ny Zanany lalahy ho fagnavaotagna reo fahotagnantsika. ¹¹ Ry tiagna, raha tia loatra atsika Zagnahary, dia tôkony hifankatia faogna koa atsika. ¹² Tsy mbôla nisy nahita Zagnahary. Fao raha mifankatia atsika, dia midôko ao amintsika Zagnahary ave ny fitiavany dia tantairaka ao amintsika. ¹³ Amin'ny zany no ahaizantsika fao midôko ao aminazy atsika ary izy ao amintsika, satria izy dia nagnamia atsika ny sasany amin'ny Fagnahy. ¹⁴ Ary koafa nahita atsika ndraiky afa mitsangagna antomoa fao ny Iada dia afa nandaifa ny Zanany lalahy ho mpagnavotro zao tontolo zao. ¹⁵ Na zôvy na zôvy magneky fao Jesôsy dia Zanaka lahin-Jagnahary, dia midôko ao aminazy Zagnahary avake izy ao amin-Jagnahary. ¹⁶ Atsika faogna koa dia nahay ave nino ny fitiavagna zay afa nanagnan-Jagnahary hoantsika. Zagnahary dia fitiavagna, ave lehy araiky zay midôko amin'ny zany fitiavagna zany dia midôko ao amin-Jagnahary, ave Zagnahary dia midôko ao aminazy. ¹⁷ Noho zany, zany fitiavagna zany dia nitantirahiagny tamintsika, mbô hanagnantsika toky amin'ny androny fitsaragna, satria tôrotro Azy, dia karaha zany faogna koa atsika aketo amin'ny tô tany tô. ¹⁸ Tsisy hamboriagna ao amin'ny fitiavagna. Fao ndraiky, ny fitiavagna tantairaka dia magnala hamboriagna, satria ny hamboriagna dia tsy maintsy miaraka amin'ny sazy. Fao lehy araiky zay ambory dia tsy natà ho tantairaka ao amin'ny fitiavagna. ¹⁹ Mitia atsika satria Zagnahary nitia atsika voalaohany. ²⁰ Raha misy ôlogno mivaolagna: "Tiako Zagnahary" naifa malaigny rahalahiny, dia mpavandy izy. Fao lehy zay tsy mitia ny rahalahiny, zay hitany, dia tsy afaka ny hitia Zagnahary, zay tsy hitany. ²¹ Ary, zany faogna koa no didy zay anagnantsika dia avy aminazy: Na zôvy na zôvy mitia Zagnahary dia tsy maintsy mitia ny rahalahiny faogna koa.