¹ Na zôvy na zôvy mino fao Jesôsy no Kristy dia natairaka Zagnahary, ave na zôvy na zôvy tia ny Iada faogna koa dia tia ny zanaka natairany. ² Noho zany no ahafahantsika fao tiantsika reo zanaka Zagnahary: koafa tia Zagnahary ndraiky magnatantairaka reo didiny atsika. ³ Satria zany no fitiavagna ho nihin-Jagnahary: dia ny hagnatantirahantsika reo didiny. Ave re didiny dia tsy mavaisatra. ⁴ Fao ny ôlogno jiaby zay natairaka Zagnahary dia mandresy zao tontolo zao. Avake zany dia fandrisiagna zay afa nandresy zao tontolo zao: ny finoagnantsika. ⁵ Zôvy lehy araiky zay mandresy zao tontolo zao? Lehy araiky zay mino fao Jesôsy dia Zanaka Zagnahary. ⁶ Zany dia lehy araiky zay tonga tamin'ny rano ndraiky lío: Jesôsy Kristy. Izy dia tonga tsy tamin'ny rano faogna, fao tamin'ny rano ndraiky lío. ⁷ Fao misy teo zay mitsangagna antomoa: ⁸ ny Fagnahy, ny rano, ary ny lío. Reo telo reo dia mifagnaraka. [Fagnamarihagna: Ny dikan-teny talaoha sasany dia mivaky karaha zao: "Fao misy telo zay mitsangagna antomoa agny an-dangitry: ny Iada, ndraiky ny Vaolagna, avake ny Fagnahy Masigny; ary reo telo reo dia araiky. Ary misy telo zay mitsangagna antomoa aketo ambonin'ny tany: ny Fagnahy, ny rano, avake ny lío; ave reo telo reo dia karaha ny araiky." Na zany aby, reo dikan-teny bahery tsara dia tsy mivaky karaha zany.] ⁹ Raha mangala ny fitsanganagna antomoan'ôlogno atsika, dia ho goalahy tatô ny fitsanganagna antomoan-Jagnahary. Fao ny fitsanganagna antomoan-Jagnahary dia zao: izy dia mitsangagna antomoa mahakasiky Zanany. ¹⁰ Na zôvy na zôvy mino zanaka Zagnahary dia managna fitsanganagna antomoa ao amin'izy haigniny. Zay tsy mino Zagnahary dia magnano Azy ho mpavandy, satria izy tsy nino ny fitsanganagna antomoa zay afa namian-Jagnahary mahakasiky Zanany. ¹¹ Ary ny fitsanganagna antomoa dia zao: Zagnahary dia magnamia atsika fiainagna bariko dintany, ave zany fiainagna zany dia ao amin'ny Zanany. ¹² Lehy araiky zay managna ny Zanaka dia managna fiainagna. Ny ôlogno zay tsy managna Zanaka Zagnahary dia tsy managna fiainagna. ¹³ Afa nanaoratra reto raha reto aminare zaho mbô hahaizanare fao managna fiainagna bariky dintany are- hoanare zay mino ny agnaran'ny Zanaka Zagnahary. ¹⁴ Karaha zany faogna koa, zao no fagnikiagna zay anagnantsika eo agnatraihany, fao na ino na ino angatahintsika araka ny sitrapôny, dia maharegny atsika Izy. ¹⁵ Tôrotro zany faogna koa, raha haintsika fao maharegny atsika Izy, na ino na ino angatahintsika Aminazy dia haintsika fao azontsika zay jiaby nangatahinatsika taminazy. ¹⁶ Raha misy ôlogno araiky mahita rahalahiny magnano fahotagna zay tsy mitairaka fahafataisagna, tsy maintsy mivavaka izy, ave Zagnahary hagnamia fiainagna azy. Zaho dia mampitôvy reo zay managna fahotagna tsy mitairaka fahafataisagna. Misy fahotagna zay mitairaka fahafataisagna; tsy mivaolagna zaho magnanjao tôkony hivavaka amin'ny zany izy. ¹⁷ Ny tsy fahamarinagna jiaby dia fahotagna, naifa misy fahotagna tsy mitairaka fahafataisagna. ¹⁸ Haintsika fao na zôvy na zôvy natairaka Zagnahary dia tsy manota. Naifa lehy araiky zay natairaka Zagnahary dia miaro haigniny, ave ny ratsy tsy afaka hikasiky azy. ¹⁹ Haintsika fao avy amin-Jagnahary atsika, ave zao tontolo zao dia midôko ao amin'ny ratsy. ²⁰ Kanaifa haintsika fao ny Zanaka Zagnahary dia afa tonga ary afa nagnamia atsika fahazavan-tsaigny mbô ahaizantsika lehy araiky zay taigna marigny. Karaha zany faogna koa, atsika dia ao amin'ny lehy araika zay marigny, ao amin'ny Jesôsy Kristy Zanany. Izy no Zagnahary marigny ave fiainagna bariko dintany. ²¹ Zanaka, arôvy amin'ny reo sampy ny haigninare.