¹ Mitadiava fitiavagna bakô managnà zotom-pô amin'irô fagnamaizam-pagnagny, indrindra fa mba haminanianarô. ² Fa zegny mivolagna amin'ny fivolagna tsy hay tsy mikoragna amin'olo fa amin-dRagnahary. Fa tsisy mahazo izegny fôtony mikoragna raha misitriky ao amin'ny fagnahy izy. ³ Fa zegny maminany mikoragna amin'olo mba ho fampioregnana irô, ho famporisiagna irô, bakô fampiononagna irô. ⁴ Zay mivolagna amin'ny fivolagna tsy hay magnorigny tegnany, fa zay maminany magnorigny fiangonagna. ⁵ Amin'iziô magniry anarô jiaby hivolagna amin'ny fivolagna tsy hay zaho. Fa mbola mihoatra nohony izegny aza, magniry zaho ny haminanianarô. Zay maminany misy lanjany kokoa noho zay mivolagna amin'ny fivolagna tsy hay (raha tsisy olo araiky mandika volagna ka mba hitsanganany fiangonagna). ⁶ Fa amin'iziô, rahalahy, raha navy aminarô amin'ny fivolagna tsy hay zaho, ino mba raha tsara amiako anarô amin'izegny? Tsy afaka zaho, izy koa tsy mikoragna aminarô amin'ny fagnambaragna, na fahaizagna, na faminaniana, na fampianaragna. ⁷ Izy koa magnamboaka fiô irô raha-magnaina tsy manan'aigny_kara sodina na lokanga_sady tsy magnamboaka lantom-peo samihafa irô, akory hahaizan'olo zay hira amboakan'ny sodina na lokanga? ⁸ Fa izy koa magnano fiô hafahafa trompetra, akory hahaizan'olo jiaby fotoagna hiomagnana amin'ny ady? ⁹ Ka kara zegny koa aminarô. Izy koa tsy mazava volagna amboakan'ny vavanarô, akory hahaizan'olo raha nivolagninarô? Hivolagna anarô, sady tsisy hahazo anarô. ¹⁰ Misy fivolagna maro samihafa eto amin'izao tontolo izao, bakô tsisy aminy regny tsisy dikany. ¹¹ Fa izy koa tsy mahay dikany fivolagnana araiky zaho, ho vahiny amin'izegny mivolagna zaho, aviô zegny mivolagna ho vahiny aminaka. ¹² Kara zegny koa aminarô. Fôtony magniry mare fihetsehan'ny Fagnahy anarô, managnà zotom-pô mba handeha tsara amin'ny fagnoregnana fiangonagna. ¹³ Dikan'izegny zay mivolagna amin'ny fivolagna tsy hay tôkony hivavaka mba hafahany mandika volagna. ¹⁴ Fa izy koa mivavaka amin'ny fivolagna tsy hay zaho, mivavaka fagnahiko, fa saigniko tsy mamoa. ¹⁵ Ino tôkony ataoko? Hivavaka amin'ny Fagnahiko zaho, sa hivavaka amin'ny saigniko koa zaho. Hihira miaraka amin'ny Fagnahiko zaho, bakô hihira miaraka amin'ny saigniko koa . ¹⁶ Raha tsy izegny, izy koa midera an-dRagnahary miaraka amin'ny Fagnahy anarô, akory no hivolagnan'ny vahiny hoe:"Amena" izy koa magnamia fisaoragna anao izy koa tsy hainy zay volagninao. ¹⁷ Fa anao tegna magnamia fisaoragna tsara koa, fa olo hafa tsy miorigny. ¹⁸ Misaotra an-dRagnahary zaho fa mivolagna amin'ny fivolagna tsy hay mandilatra noho anarô jiaby. ¹⁹ Kanefa agny am-piangonagna aleoko mivolagna fivolagna dimy araka fazahoako mba hafahako mampianatra irô hafa, toy zay volagna folo arivo amin'ny fivolagna tsy hay. ²⁰ Ralahy, aza mba ntsaiky amin'ny fihevitry anarô. Kanefa ndraiky, raha amin'ny ratsy, manaova kara ntsaiky. Fa amin'ny fihevitrinarô alo ho matotro anarô. ²¹ Voasoratra ao amin'ny lalàgna fa: "Amin'olo hafa fivolagna ndraiky amin'alalany sogny vahiny Hikoragnako amin'ireto olo ireto. Na tsy haregny zaho aby irô," Hoy Tompo. ²² Dikan'izegny fivolagnana tsy hay famantaragna, tsy amin-drô mpino, fa amin-drô tsy mpino. Fa faminaniagna ndraiky, famantaragna tsy nihin-drô tsy mpino, fa nihin-drô mpino. ²³ Dikan'izegny, izy koa miara-miangona fiangonagna jiaby aviô mivolagna amin'ny fivolagna tsy hay aby jiaby, bakô miditriky irô vahiny ndraiky tsy mpino, tsy ho ambaran-drô fa adala ma anarô? ²⁴ Fa izy koa ndraiky maminany aby anarô jiaby ka nisy tsy mpino na vahiny nidriky, ho resy lahatra aminy zay jiaby regniny izy. Ho tsaraigny amin'alalany raha jiaby nambara izy. ²⁵ Ho ambara ny sekire am-ponany. Vokatr'izegny, handohaliky izy bakô handiniky an-dRagnahary. Hagnambaragna izy fa tegna ao aminarô Zagnahary. ²⁶ Ino izegny magnaraka , ralahy? Izy koa fa tafiaraka anarô, tsiaraikiaraiky managna salamo, fampianaragna, fagnambaragna, fivolagna tsy hay, na fandikam-bolagna. Ataova raha jiaby mba hagnoregnanarô fiangonagna. ²⁷ Izy koa misy mivolagna amin'ny fivolagna tsy hay, ambilà hisy aroé na farafabeny telo io, aviô mandeha tsiaraikiaraiky, bakô tôkony araiky handika volagna zay voalaza. ²⁸ Fa izy koa tsisy mpandika volagna , ambilà tsiaraikiaraiky amin-drô hitana fahanginagna ao am-piangonagna. Ambilà tsiaraikiaraiky hikoragna mitokagna amin'ny tegnany ndraiky amin-dRagnahary. ²⁹ Ambilà hivolagna mpaminany aroé na telo, bakô ambilà irô hafa hitandregny amin'ny fahaiza-magnavaka zegny nambara. ³⁰ Fa izy koa misy fahitagna amaizagna zegny mipetraka iô ami'ny fanompoagna, ambilà hangigny araiky zegny mivolagna. ³¹ Fa tsiaraikiaraiky aminarô afaka mifandimby maminany mba hafahany tsiaraikiaraiky mianatra bakô mba jiaby hahery. ³² Fa fagnahin-drô mpaminany iô ambanin'ny fagnaraha-maso-drô mpaminany. ³³ Fa Zagnahary tsy Zagnaharin'ny fikorontagnana, fa fiadanagna. Izegny fitsipiky fiangonagnan-drô mpino jiaby. ³⁴ Viavy tôkony hitanà fahanginagna ao am-piangonagna. Satria tsy mahazo alalagna hivolagna irô. Fa kenefa, tôkony hagneky irô, kara nambaran'ny lalàgna. ³⁵ Izy koa misy tianan-drô hianaragna, ambilà hagnotany vadiny agny atragno irô. Fa mahamegnatra viavy mivolagna ao am-piangonagna. ³⁶ Bakà aminarô ma niavin'ny volagnan-dragnahary? Anarô fo ma voakasikin'izegny? ³⁷ Raha misy mieritreritry tegnany ho mpaminany na ara-pagnahy, tôkony hagneky izy fa irô raha jiaby zay soratako aminarô, didin'ny Tompo. ³⁸ Fa izy koa misy tsy magneky izegny, alo izy tsy hikegny. [fagnamarihagna: Ankamaroan'ny dikany volagna, ao agnatin'izegny ny ULB ndraiky UDB, mamaky fa: "Fa izy koa misy tsy magneky izegny, alo tsy ho ekegna izy." Ny dikan-teny sasany taloha magnano hoe: "Fa izy koa misy tsy mahay izegny, alo izy tsy hahay izegny."] ³⁹ Koa amin'izegny, ralahy, magniria maré haminany, aviô aza manakagna na azôvy na azôvy hivolagna amin'ny fivolagnana tsy hay. ⁴⁰ Fa ambilà raha jiaby atao araka tôkony ho izy ndraiky am-pilaminagna.