¹ Niany mampatsiaro anarô zaho, ralahy, amin'ny filanzantsara zegny nambarako taminarô, zegny niraisinarô sady itsangananarô. ² Baka amin'ny filanzantsra zegny hampahàvotro anarô, izy koa mitana mare amin'ny volagna nambarako taminarô anarô, izy koa tsy minomino fahatany. ³ Namezagna ho zava-dehibe voalohany anarô sady nazoko koa: fa maty amin'ny fahotantsika i Kristy araka Soratra Masigny, ⁴ nalevigny Izy, bakô Izy natsangana tamin'ny maty tamin'ny andra fahatelo araka Soratra Masigny ⁵ Kristy niboaka tamin'i Kefasy, bakô tamin-drô aroe ambin'ny folo, ⁶ avy iô niboaka ndraiky tamin-drô ralahy mihoatra ny dimanjato Izy. Mbola velogno ankamaroan-drô, fa sasany maty. ⁷ Bakô Izy niboaka tamin'i Jakoba, ndraiky tamin-drô apostoly jiaby. ⁸ Tegna farany, niboaka taminaka Izy, kara tamin'ny tsaiky teraka tsy feno fanjava. Fa zaho tegna hely amin-drô apostoly. ⁹ Zaho tsy magnaiva kahigna apostoly fôtony zaho nagnejiky fiangonan-dRagnahary. ¹⁰ Fa nohon'ny fahatsaragnan-dRagnahary naha kara ty zaho, sady tsy foagna ato aminaka fahatsaragnany. Nefa ndraiky, niasa mare noho izy jiaby zaho. Nefa tsy zaho aby zegny, fa fahatsaran-dRagnahary miaraka aminaka. ¹¹ Dikany zegny na zaho izegny na irô, araka nitorianay kara izegny ninoanarô ¹² Amin'iziô izy koa nambara fa Kristy natsangana tamin'ny maty, akory hafahan'ny sasany aminarô mivolagna fa tsisy fitsanganagna amin'ny maty? ¹³ Nefa izy koa tsisy fitsanganagna amin'ny maty, tsy natsangana aby Kristy; ¹⁴ Izy koa tsy natsangana Kristy, foagna fitorianay, bakô foagna koa finoagnanarô. ¹⁵ Hita ho vavolombelogno diso mikasiky zagnahary zahay fôtony nitsangana vavolombelogno nanohitry ndRagnahary, nivolagna fa natsangany Kristy izy koa fa tsy nagnano izegny Izy. ¹⁶ Izy koa tsy nitsangana ny maty, na Kristy tsy nitsangana koa; ¹⁷ rahoatra tsy nitsangana Kristy, foagna finoagnanarô sady mbola ao amin'ny fahotagnanarô anarô. ¹⁸ Bakô jiaby zegny maty ao'amin'i Kristy efa very koa. ¹⁹ Izy koa fiainagna ty fo anagnantsika toky amin'ny ho avy ao amin'i Kristy, atsika tegna mampalahelo amin'olo jiaby. ²⁰ Amin'iziô efa natsangana tamin'ny maty Kristy, araiky voaloahany tamin-drô zegny maty. ²¹ Fôtony baka tamin'ny alalan'ny olo araiky fahafatesagna, baka tamin'ny alalan'ny olo araiky koa nahavian'ny fitsanganagna amin'ny maty. ²² Kara nahafatesan'ny jiaby tao amin'i Adama, ho vilomigny ao amin'i Kristy koa olo jiaby. ²³ Kanefa samy amin'ny filaharany manokagna ny tsiaraikiaraiky: Kristy, araiky voaloham-bokatra, baka iô irô zegny nihin'i Kristy ho atao velogno amin'ny fiaviany. ²⁴ Baka iô ho avy ny farany, izy koa fa hamezan'i Kristy ho ndRagnahary Baba ny fanjakagna. Izegny izy koa fa hagnafoagna fitsipiky jiaby ndraiky fahefagna jiaby bakô hery Izy. ²⁵ Tsy maintsy manjaka Izy mandrapaha hagnabilany ny fahavalony jiaby ao'ambani'ny vitiny. ²⁶ Fahavalo farany ho haripaka ny fahafatesagna. ²⁷ "Napetrany tiô ambanin'ny vitiny raha jiaby." Fa nambara fa: "Izy nametraka raha jiaby," mazava tsara fa tsy tafiditry ao agnatin'izegny araiky nametraka raha jiaby hagneky tegnany. ²⁸ Izy koa fa magneky Izy raha jiaby, Zanaka feky hagneky araiky nampagneky raha jiaby ho Nihinany. Hiboaka izegny mba ho jiaby ao'amin'ny jiaby Zagnahary Baba. ²⁹ Na koa ino ilaigna irô zegny vita batisa ho an'ny maty? Izy koa tsy natsangana feky ny maty, nignino irô natao batisa ho an'izy iregny? ³⁰ Nagnino atsika am-bava loza isan-dera? ³¹ Miatriky fahafatesagna isan'andra zaho! Izegny azo antoko kara fireharehako ny aminarô, izay azoko amin'i Kristy Jesosy Tompotsika. ³² Ino tombony azoko, baka amin'ny fomba fizahavan'ny olombelogno, izy koa niady tamin'ny biby tao Efesosy zaho, izy koa tsy natsangana ny maty? Alô atsika hihinagna sady higiaka fôtony ho faty atsika hamaray. ³³ Kaza mety ho fitahigny: "Mandrombaka fisaignana tsara namagna tsy manjary." ³⁴ Mandiniha! Miaigna am-pahamarignana! Kaza manohy manota! Fa sasany aminarô tsy managna fahaizagna ndRagnahary. Magnambara izegny amin'ny haignatranarô zaho. ³⁵ Olo araiky hivolagna fa: "Karakory nananganagna ny maty, hitsangana amin'ny karazagna vatagna karakory irô? ³⁶ Tsy mahay na ino na ino anarô! Zegniny hafafinarô tsy hanomboko hitombo izy koa tsy maty izegny. ³⁷ Zegny nafafinarô tsy vatagna zegny ho avy, fa voany fo. Izegny mety hanjary vary na raha hafa. ³⁸ Fa hamezan-dRagnahary izy vatagna araka safidinany, bakô samy amin'ny vatany aby ny voany tsiaraikiaraiky. ³⁹ Tsy nofo jiaby mitovy. Fa kanefa araiky nofon'ny olombelogno, hafa nofon'ny biby, nofo hafa koa nin-drô vôrogno, hafa koa nin-drô laoko. ⁴⁰ Misy koa vatagna agny an-dagnitry, misy vatagna eto an-tany. Fa karazagna araiky fo voninahitry vatagna agny an-dagnitry, hafa koa voninahitry ny eto an-tany. ⁴¹ Araiky voninahitry masoandro, hafa voninahitry fanjava, avy iô voninahitry hafa koa nin-drô kintagna. Fa voninahitry koa mampiavaka kintagna araiky amin'ny kintagna araiky hafa. ⁴² Kara zegny koa fitsanganagna amin'ny maty. Zegny afafy mety rombaka, fa zegny atsangana tsy mety rombaka. ⁴³ Afafy amin'ny fahafaham-baraka, natsangana amin'ny voninahitry. Afafy amin'ny fahalemegna, natsangana amin'ny tanjaka. ⁴⁴ Afafy amin'ny vatagna voajagnahary izegny, atsangana ho vatagna ara-pagnahy. Izy koa misy vatagna voajagnahary, misy koa vatagna ara-pagnahy. ⁴⁵ Efa voasoratra koa fa: "Lôso fagnahy velogno Adama araiky lelahy voalohany." Araiky Adama farany lôso fagnahy magnamia fiainagna. ⁴⁶ Tsy ny ara-pagnahy avy voalohany fa ny voajagnahary, avy iô ny ara-pagnahy. ⁴⁷ Olo voalohany baka amin'ny tany, namboarigny tamin'ny fotaka. Olo faharoe baka agny an-dagnitry. ⁴⁸ Kara araiky namboarigny tamin'ny fotaka, kara zegny koa olo agny an-dagnitry, kara zegny koa irô baka agny an-dagnitry... ⁴⁹ Kara nitongasantsika bikan'olon'ny fotaka, hitonga bikan'olon'ny lagnitry koa atsika. ⁵⁰ Kara ty ambarako, anarô ralahy, nôfotro miaraka amin'ny lio tsy afaka handova fanjakan-dRagnahary. Na zegny mety rombaka handova zegny tsy mety rombaka. ⁵¹ Indriô! Raha marigny misitriky ambarako anarô: Tsy ho faty aby atsika jiaby, fa hivoagna aby atsika jiaby. ⁵² Hiova atsika amin'ny fotoagna araiky, agnatin'ny mipi-maso indraiky, amin'ny trompetra farany. Hagnena ny trompetra, irô maty hatsangana tsy ho mety lo, bakô hivoagna atsika. ⁵³ Fa ity vatagna mety rombaka ity tsy maintsy hisikiny izegny tsy mety lo, bakô ity vatagna mety maty ity tsy maintsy hisikiny tsy fahafatesagna ⁵⁴ Fa izy koa misikiny ny tsy mety rombaka ity vatagna mety rombaka ity, aviô izy koa misikiny ny tsy fahafatesagna ity vatagna mety maty ity, ho avy amin'ny volagna zegny voasoratra, "Voateligny tamin'ny fandrisiagna ny fahafatesagna." ⁵⁵ "Fahafatesagna, aia ny fandrisiagnanao? Fahafatesagna, aia ny fanindronanao?" ⁵⁶ Ota fanindron'ny fahafatesagna, bakô herin'ny ota lalàgna. ⁵⁷ Fa ankasitrahigny Zagnahary, zegny nagnamia atsika fandrisiagna baka amin'ny Jesosy Kristy Tompontsika! ⁵⁸ Dikany zegny, ralahy tiako, mioregna tsara bakô kaza miozongozogno. Kaza mipondy afara amin'ny asan'ny Tompo, fôtony hainarô fa tsy very foagna asanarô ao amin'ny Tompo