¹ Mikasiky famoriagna vola nin-drô mpino, araka ny nagnambarako lalagna fiangonan'i Galatia, kara zegny koa tôkony ataonarô. ² Amin'ny andra voalohan'ny herigniandra, tôkony hanokagna raha ny tsiaraikiaraiky aminarô sady hikajy zegny araka zegny vitanarô. Magnanaova zegny mba tsy hisian'ny famoriagna vola izy koa fa avy Zaho ³ Izy koa fa avy zaho, na azovy na azovy ikenarô, alefako miaraka amin'ny taratasy mba hanolorako fagnatrikinarô ho agn'i Jerosalema. ⁴ Izy koa mety aminaka mandeha, handeha hiaraka aminaka irô. ⁵ Fa ho avy agny aminarô zaho izy koa mandalo agn'i Makedonia. Fa handalo agny Makedonia zaho. ⁶ Mety afaka hijanogno miaraka aminarô zaho na mandritra ny ririgniny, mba hahafahanarô magnampy zaho amin'ny diako na aia na aia himboako. ⁷ Fa tsy magniry hahita anarô mandritra ny fotoagna fôky zaho iziô. Fa magnategna hipetraka maharitraritry miaraka aminarô, izy koa ambelan'ny Tompo. ⁸ Hijanogno ao Efesaosy zaho mandra-pahavian'ny Pentekosta, ⁹ fa efa varavaragna malalaka nimbiagna aminaka, aviô misy fahavalo maro. ¹⁰ Izy koa fa avy Timoty, ezaho mba tsy havozo izy miaraka aminarô, fa magnano asan'ny Tompo izy, kara ny ataoko. ¹¹ Kaza ambela hoisy olo hagnano tsinontsino izy. Ampia izy amin'ny lalany fiadanagna, mba hafahany mandeha iô aminaka. Magnantegna izy mba ho avy hiaraka amin-drô ralahy zaho. ¹² Mikasiky i Apolosy ralahintsika, namporisiky izy mare zaho mba hamangy anarô miaraka amin-drô ralahy. Fa mbola tsy vognono tanteraka ho avy izy iziô. Na zegny ndraiky, ho avy izy koa fa mety ny fotoagna. ¹³ Madigniasa, mitsangana tsara amin'ny finoagna, miasa kara ny lelahy, mahereza. ¹⁴ Mba alô atao am-pitiavagna raha atanao jiaby. ¹⁵ Hainarô fianakaviagnan'i Stefanasy, irô niova fô voalohany tao Asaia, bakô koa irô nametraka tegnan-drô ho amin'ny fanompoagna irô mpino. Mamporisiky anarô zaho, ralahy, ¹⁶ mba hagneky olo kara zegny ndraiky amin'olo jiaby magnampy amin'ny asa ndraiky miasa miaraka aminay ¹⁷ Ravo amin'ny fahavian'i Stefanasy, Fortinatasy, bakô Akaiosy zaho. Nameno ny tsy naha-tiô anarô irô. ¹⁸ Namelombelogno fagnahiko ndraiky ninarô irô. Dikany zegny, ataova hay olo kara zegny. ¹⁹ Irô fiangonan'i Asia magnano veloma anarô. Akila ndraiky Pritsila magnano veloma anarô ao'amin'ny Tompo, miaraka amin'ny fiangonagna ao amin'ny tany mpitra-drô. ²⁰ Ralahy jiaby magnano veloma anarô. Mifagnanaova veloma amin'ny oroko masigny. ²¹ Izaho, Paoly, manoratra ity amin'ny tagnako. ²² Izy koa misy olo tsy tia Tompo, enga anie mba ho voaozogno izy. Ho avy, ny Tompontsika! ²³ Ho aminarô anie fahasoavan'ny Jesosy Tompo. ²⁴ Ho aminarô jiaby ny fitiavako ao amin'i Jesosy Kristy. [Fagnamarihagna: Dikan'ny volagna taloha magnampy fa: "Amena." Fa ny vaovao maro hafa, ao agnatiny zegny ULB ndraiky UDB, magnadoso izegny.]