¹ Na atao mivolagna amin'ny fivolagnan-drô olo ndraiky irô anjely aza zaho. Fa raha tsy managna fitiavagna, manjary vy magnena na kipantsona mikarantsam-peo zaho. ² Na atao managna fanomezagna faminaniagna bakô mahay irô misitery ndraiky fahaizagna jiaby zaho, managna finoagna jiaby afahagna mamindra irô bongo. Fa izy koa ndraiky tsy manam-pitiavagna, tsinontsinoagna zaho. ³ Na atao magnamia zay jiaby anagnako hamahanagna masikiny aza zaho, bakô magnamia tegnako hiroagna. Fa izy koa tsy manam-pitiavagna tsy mahazo na ino na ino zaho. [Fagnamarihagna: Ny ULB ndraiky UDB samy managna dikany volagna maro, mivaky kara ty: " Hamiako mba hiroagna tegnako." Ny dikany volagna sasany ndraiky mivaky kara ty: " Hamiako tegnako mba ho reharehako."] ⁴ Fitiavagna mahari-po sady tsara fagnahy. Fitiavagna tsy magnirigniry na mirehareha. Tsy miavogno ⁵ na magnano zegny tsy mahamendriky. Tsy tia tegna. Tsy mora meloko, na mikaonty fahadisoagna. ⁶ Tsy miravoravo amin'y tsy fahamarignana. Kanefa, miravoravo amin'ny fahamiragnana. ⁷ Fitiavagna mandefitry amin'y raha jiaby, mino raha jiaby, matoky raha jiaby, bakô miharitry raha jiaby. ⁸ Tsy ho tapitry mandrakizay fitiavagna. Izy koa misy faminaniagna, ho ravagna irô zegny. Izy koa misy fivolagnana amin'ny volagna tsy hay, hijanogno irô zegny. Raha misy fahaizagna, ho ravagna izegny. ⁹ Fa atsika mahay amin'ny ampahany ndraiky maminagny amin'ny ampahany. ¹⁰ Fa izy koa navy tegna meva, ho ravagna zay tsy tanteraka. ¹¹ Taminy mbola ntsaiky, nikoragna kara ntsaiky, nieritreritry kara ntsaiky, nisaigny kara ntsaiky. Rehefa be zaho, nambelako fahazazagna. ¹² Fa amin'iziô atsika nahita tsy mivantagna amin'ny fitaratra, fa letry zay, hifagnatriky sôra. Amin'iziô zaho mahay amin'ny ampagnahy, fa baka io zaho fahay tanteraka kara nahaizagna zaho tanteraka. ¹³ Fa amin'iziô irô telo irô no mipetraka: finoagna, fanatenagna letry zay, bakô fitiavagna. Fa tegna maventy amin'ny raha irô, fitiavagna.