¹ Mikasiky irô fanomezam-pagnahy, rahalahy, tsy tiako tsy hahay anarô. ² Hainarô fa taminarô mbola mpanompo sampy, voavily nadeha amin-rô sampy tsy manam-peo anarô, tagny amin'ny zay lalagna jiaby nitarihin'ny anarô regny. ³ Nohon'izegny tiako ho hainarô fa tsisy olo zay mivolagna amin'ny Fagnahin-dRagnahary afaka mivolagna hoe: "Jesosy dia voaozogno." Tsisy afaka mivolagna hoe: "Jesosy dia Tompo", afa-tsy amin'ny alalan'ny Fagnahy Masigny. ⁴ Bakô misy fanomezam-pagnahy samihafa, fa Fagnahy mitovy fo. ⁵ Misy fanompoagna samihafa, fa Tompo mitovy fo; ⁶ bakô misy karazan'asa samihafa, fa Zagnahary mitovy fo no magnano izy irô ho azo atao amin'ny tsiaraikiaraiky. ⁷ Bakô ho an'ny tsiaraikiaraiky namiagna fanehoagna ambadikin'ny Faganhay ho an'ny Tombontsoany jiaby. ⁸ Fa ho an'ny olo araiky namiagna baka amin'ny Fagnahy ny volagna fahendregna, aviô ho an'olo araiky hafa volagnan'ny fahalagnana amin'ny alalan'ny Fagnahy mitovy fo. ⁹ Ho an'ny araiky hafa namiagna finoagna amin'ny alalan'ny Fagnahy mitovy, bakô ho an'ny araiky hafa irô fanomezam-pahasoavagna hanjanga amin'ny alalan'ny Fagnahy araiky. ¹⁰ Ho an'ny araiky hafa nagnamia irô asan'ny hery ,aviô ho an'ny araiky hafa faminaniana. Ho an'ny araiky hafa nagnamia fahafahagna magnavaka irô fagnahy, ho an'ny araiky hafa irô karazagna fivolagnana samihafa, aviô ho an'ny araiky hafa fandikagna volagna. ¹¹ Fa Fagnahy araiky sady mitovy fo miasa ao amin'ny raha jiaby izegny, magnamaiza irô fanomezam-pagnahy ho an'ny olo tsiaraikiaraiky aby, araka zay nofidiany. ¹² Fôtony vatagna, araiky aviô managna rantsagna maro sady jiaby rantsagna ny vatagna fo, dikan'izegny miaraka amin'i Kristy izegny. ¹³ Baka tamin'ny Fagnahy araiky nagnanaovagna batisa atsika jiaby ho vatagna araiky, na irô jiosy na irô Grika, na voafehy na afaka, bakô ijiaby natao mba higiaka amin'ny fagnahy araiky. ¹⁴ Ny vatagna tsy rantsagna tôkana, fa maro. ¹⁵ Izy koa mivolagna ny vity: "Fôtony tsy tagnana zaho, tsy rantsagna amin'ny vatagna zaho," izegny tsy hely amin'ny rantsagnan'ny vatagna aby. ¹⁶ Izy koa sofigny hivolagna: "Fôtony tsy maso zaho, tsy rantsagna amin'ny vatagna zaho," izegny tsy hely amin'ny rantsagnan'ny vatagna aby. ¹⁷ Izy koa maso ny vatagna jiaby, ino raha arignaisagna? Izy koa sofigny ny vatagna jiaby, hagnaia ny fahitagna? ¹⁸ Fa Zagnahary nandamigny rantsan'ny vatagna tsiaraikiaraiky araka ny namorognany izegny. ¹⁹ Izy koa rantsagna mitovy fo izy jiaby, agnaia hoisy vatagna? ²⁰ Kay izegny naviany izio rantsagna maro, fa vatagna araiky fo. ²¹ Maso tsy afaka mivolagna amin'ny tagnana hoe: "Tsisy raha ilaiko anao." Na loha tsy hivolagna amin'ny vity hoe: "Tsisy raha ilaiko anao." ²² Fa irô rantsagna amin'ny vatagna zay miseho ho malemy kokoa tegna ilaigna, ²³ bakô irô rantsan'ny vatagna zay heverintsika fa tsy manan-danja , amiantsika lanja maventy kokoa irô, aviô rantsantsika tsy famboaka managna fahamendrehagna mihoatra. ²⁴ Bakô rantsantsika famboaka tsy mila indesigny amin'ny fahamendrehagna. Fa irô efa misy fahamendrehagna. Fa Zagnahary nampikambagna rantsana jiaby miaraka, aviô izy nagnamia lanja kokoa an'irô zay tsy ampy izegny. ²⁵ Nagano izegny Izy mba tsy hisy fisarahagna iô amin'ny vatagna, fa mba hifampikarakara amin'ny fitiavagna mitovy irô rantsagna. ²⁶ Dikan'izegny izy koa mijaly rantsagna araiky, miaraka mijaly rantsagna jiaby; na izy koa amiagna lanja rantsagna araiky, miaraka ravoravo rantsagna jiaby. ²⁷ Bakô anarô vatagn'i kristy aviô rantsagna amin'izegny ny tsiaraikiaraiky. ²⁸ Bakô Zagnahary nanendry tao amin'ny fiangonagna irô apostoly aloha, faharoé mpaminany, fahatelo irô mpampianatra, aviô irô zay magnano asa mahagaga, bakô irô fanomezam-pahasoavagna hagnanjanga, irô magnamia fagnampiagna, irô zay managnano asan'ny fitanan-draharaha, aviô irô zay magnano karazagna fivolagna samihafa. ²⁹ Apostoly ma irô jiaby? Mpaminany aby? Mpampianatra aby? Magnano asa mahagaga aby jiaby? ³⁰ Managna fanomezam-pagnahay hajanga ma izy jiaby? Mivolagna amin'ny fivolagna tsy hay ma izy jiaby? Mandika volagna ma izy jiaby? ³¹ Tadiava maré irô fanomezam-pagnahay maventiventy. Fa hagambara aminarô lalagna tsaratsara kokoa zaho.