¹ Tsy olo afaka mba zaho? Tsy apostoly mba zaho? Tsy nahita i Jesosy Tompontsika mba zaho? Tsy asako ao amin'ny Tompo mba anarô? ² Izy koa tsy Apostoly ho an'ny hafa zaho, farafaratsiny Apostoly ho anarô. Fa anarô porofo amin'ny maha-apostoly zaho ao amin'ny Tompo. ³ Ara ty fiarovako amin-drô zegny magnotanitany zaho: ⁴ Izio mba zahay tsy mahazo lalagna hihinagna ndraiky higiaka? ⁵ Izio mba zahay tsy mahazo mitonga vady mpino, kara ataon-drô apostoly sasany, ndraiky irô ralahin'ny Tompo, bakô Kefasy? ⁶ Sa zaho ndraiky Barnabasy fo tsy maintsy miasa? ⁷ Azovy magnano fanompoagna miaramila amin'ny fandaniany manokagna? Azovy mitsambo voaloboko tsy mihina voany? Azovy mpiambigny ondrikondriky kay tsy migiaka ronono azo amin'izegny? ⁸ Izio mba zaho magnambara irô raha mifototro amin'ny fahefagnan'ny olombelogno? Tsy magnambara zegny koa mba lalàgna? ⁹ Fa izegny efa voasoratra ao amin'ny lalàgna Mosesy hoe: "Aza fihezigny tady vavany aomby izy koa miasa." Ilainy aomby marigny hiahian-dRagnahary? ¹⁰ Tsy mikoragna mikasiky zay mba izy? Efa nisoratagna ho atsika, fa zay miasa tany tôkony hiasa amin'ny fagnatenagna, bakô zay hamopoko tôkony hamopoko amin'ny fagnatenagna hahazo anjara amin'ny vokatra. ¹¹ Raha namafy raha ara-pagnahy tio aminarô izahay, Zio ma maro loatra aminay mijinja raha ara-materialy baka aminarô? ¹² Raha atao izegny zo izegny avy aminarô irô hafa, zio ma zahay tsy managna mandilatra? Na izegny aza , tsy nitaky izegny zo izegny zahay. Fa kanefa, naleonay niaritry raha jiaby toy zay ho sakagna ho an'ny filazantsaran'i Kristy. ¹³ Zio ma tsy hainarô fa irô zay manompo ao amin' ny tragnon-dRagnahary, mahazo sakafon-drô irô baka ao amin'ny tragnon-dRagnahary? Bakô ma zio tsy hainarô fa irô zay manompo iô amin'ny alitara mahazo anjara aminy zay natao fagnatriky tio amin'ny alitara? ¹⁴ Kara zegny koa, Tompo nandidy fa irô zay mitory filazantsara tôkony hahazo fivelomagna irô bakà amin'ny filazantsara. ¹⁵ Nefa tsy nitaky araiky tamin'irô zo irô zaho. Avio tsy manoratra raha kara ty mba mety hisy raha jiaby hatao zaho. Alo zaho maty toy zay hisy olo hagnadoso aminaka izegny rehareha zegny. ¹⁶ Fa izy koa mitory filazantsara zaho, tsy misy antony tôkony ireharehako, fôtony tsy maintsy magnano izegny zaho. Bakô loza aminaka izy koa tsy mitory filazantsara zaho! ¹⁷ Fa raha magnano izegny an-tsitrapô zaho, managna valisoa. Fa raha tsy an-tsitrapô ndraiky, mbola managna andraikitry zay nambela taminaka zaho. ¹⁸ Ino izegny no valisoako? Izegny rehefa mitory zaho, afaka magnamia filazantsara tsy misy fagnifam-bôla ka mba tsy hampiasa tanteraka zonaka amin'ny filazantsara. ¹⁹ Fa na afaka amin'ny jiaby aza zaho, ho avy mpanompo ho an'ny jiaby, mba hahazaoko maromaro koa. ²⁰ Tio amin'ny Jiosy lôso kara Jiosy zaho, mba hahazaoko Jiosy. Tamindrô zay amban'ny lalàgna zaho, lôso kara olo zay amban'ny lalàgna zaho mba hahazaoko irô zay amban'ny lalàgna. Nagnano izegny zaho na tsy tio amban'ny lalàgna aza tegnako.[fahamariagnana: Ny baiboly ULB ndraiky UDB mivaky hoe:"Nagnano izegny zaho na tsy tio amban'ny lalàgna aza tegnako."Ny dikan-teny taloha tsy magnisy izegny.] ²¹ Tamin-drô zay ambandiky lalàgna, loso kara olo ambandiky lalàgna zaho, na tsy ambandiky lalàgnan-dragnahary aza tegnako, fa ambanin'ny lalàgnan'i Kristy. Nagnano izegny zaho mba hahazaoko irô zay ambanin'ny lalàgna. ²² Tio amin-drô malemy lôso malemy zaho, mba hahazaoko irô malemy. Nanjary raha jiaby ho an'olo jiaby zaho, mba hamonjeko sasany amin'ny fomba jiaby. ²³ Magnano raha jiaby zaho ho an'ny filazantsara, mba hafahako mandry anjara amin-drô fitahiagna izegny. ²⁴ Zio ma tsy hainarô fa amin'ny filomahizagna araiky ny mpilomoay jiaby magnano filomahizagna, nefa araiky fo no mahazo loka? Koa milomahiza mba hahazo loka. ²⁵ Mpilomoay araiky magnano fifehezan-tegna amin'ny fanazaragna tegnany jiaby. Magnano izegny irô mba handray satro-boninahitra zay mety rombaka, kanefa ndraiky milomahiza mba hahazoantsika satro-boninahitra tsy mety rombaka. ²⁶ Nohony izegny tsy milomoay amin'ny tsisy dikany zaho na mamango tombokôndry amin'ny tsiko. ²⁷ Fa fiheziko tegnako bakô ataoko andevo, mba hikegny tegnako, rehefa bakà nitory tamin'ny hafa zaho.