¹ Bakô mikasiky hanigny atao sorogno amin'ny sampy_ haintsika fa: "Atsika jiaby manam-pahaizagna." Fahaizagna mampimpoerampoera, fa fitiavagna manangana. ² Izy koa misy olo araiky mihevitry tegnany fa mahay raha, mbola tsy mahay araka tôkony hahaizany aby i olo izegny. ³ Fa izy koa misy olo araiky tia ndRagnahary, hainy i olo izegny. ⁴ Izy koa mikasiky fihinanagna hanigny natao sorogno amin'ny sampy_ haintsika fa " sampy eto amin'izao tontolo izao atao tsinotsino" sady "efa tsisy Zagnahary afa eky izy koa tsy araiky fo." ⁵ Fa mety misy irô atao sary kahigna zagnahary, na agny an-dagnitry na eto an-tany, kara hamaroan'irô "zagnahary" ndraiky hamaroan'irô "tompo." ⁶ Fa amintsika "Araiky fo Zagnahary Baba, izegny avy aminany raha jiaby, Izy koa antony hivilomantsika, bakô araiky koa Tompo Jesosy Kristy, baka taminany nisian'ny raha jiaby, bakô baka taminany koa nisiantsika." ⁷ Na zegny, izegny fahaizagna zegny mbola tsy ao amin'ny tsiaraikiaraiky. Nefa ndraiky koa, sasany tiô aloha nampihatra fanompoan-tsampy, nihinagna i hanigny zegny kara raha natao sorogno amin'ny sampy izegny. Noho izegny robaka fieritreretan-drô fôtony malemy izegny. ⁸ Fa tsy hanigny hanolotro atsika iô amin-dRagnahary. Fa tsy tegna ratsy atsika izy koa tsy mihinagna, na koa tegna tsara izy koa mihinagna izegny. ⁹ Tandrema mba tsy fahaizagnanarô antony hampameloko irô olo tsy ampy finoagna. ¹⁰ Ataova kara misy olo mahita igny anao, manam-pahaizagna io, mihinagna hanigny ao amin'ny tragnon'ny Sampy. Tsy fahalemen'ny fieritreretagna mba nasakiany hihinagna zegny namezany ho an'ny sampy? ¹¹ Kay baka amin'ny fahaizanao toetra marigny mikasiky sampy, nahavery i ralahy araiky malemy finoagna, zegny nahafatesan'i Kristy. ¹² Dikan'izegny, izy koa manota amin'ny ralahinarô anarô ka mandrobaka saigny malemin-drô, manota manohitry i Kristy anarô. ¹³ Dikan'izegny, izy koa hanigny mahatonga ralahiko ho meloko, tsy hihinan-kena feky zaho, mba tsy baka aminaka hahalavo ralahiko.