¹ Mikasiky irô nisorantanarô: "Tsara aminarô lelahy tsy mikasiky viavy." ² Kanefa nohony irô fakam-pagnahy amin'y raha tsy manjary maro isan-karazany, tôkony hanagna vady manôkagna aby lelahy Tsiaraikiaraiky, bakô viavy tsiaraikiaraiky tôkony hanagna vady manôkagna koa. ³ Ny lelahy tokony hagnamia irô zo ara-panambadiagna ho an'ny vadiny, aviô kara izegny koa ny viavy hon'ny vadiny. ⁴ Tsy ny viavy no managna fahefagna amin'ny vatagnany manôkagna, fa ny vadiny. Kara izegny koa ,tsy ny lelahy no managna fahefagna amin'ny vatagnany manôkagna, fa vadiny no managna. ⁵ Aza mifanakatsakagna anarô tsiaraikiaraiky, Izy koa tsy amin'ny fifagnarahagna nifanôvagna ndraiky amin'ny fotoagna natôkagna amin'izegny. Ataovà izegny mba hafanarô, manokan-tegna amin'ny vavaka. Aviô tôkony hiaraka hoandry indraiky anarô,mba tsy hafan'ny devoly mangala Fagnahy anarô nohon'ny tsy fagnarahanarô fifehezan-tegna. ⁶ Kanefa zaho mivolagna irô raha jiaby aminarô am- pahalalahagna fa tsy didy akory. ⁷ Tegnany tikao olo jiaby kara zaho. Fa tsiaraikiaraiky samby managna fanomezam-pahasoavagna manôkagna bakà amin-dRagnahary. Araiky managna ity karazam-panomezam-pahasoavagna ity, ndraiky araiky hafa managna karazany hafa koa. ⁸ Hoan'irô zay tsy managna vady ndraiky irô mpitondrategna mivolagna zaho fa tsara ho azy irô raha mijanogno tsy manambady irô, kara zaho. ⁹ Kanefa zay irô tsy afaka mifehy tegnany, tôkony hanambady. Satria tsara kokoa irô manambady toy zay aviliviliny filàgna ara-batagna. ¹⁰ Aviô irônzay manambady magnamia didy ty zaho_tsy zaho, fa Tompo_ viavy Tsy tôkony hisaraka amin'ny vadiny, ¹¹ (fa raha misaraka amin'ny vadiny , tôkony hijanogno ts hanambady na koa mipody mihavagna amin'ny vadiny)_ bakô lelahy tsy tôkony hisaraka amin'ny vadiny. ¹² Fa hoan'irô tavaila mivolagna zaho, fa tsy Tompo_hoe raha misy ralahy araiky managna vady tsy mpino, bakô raha maharavoravo izy miara-miasa aminazy, tsy tôkony hisaraka amin'ny vadiny izy. ¹³ Raha viavy araiky no managna vady tsy mpino, ndraiky raha maharavoravo izy miaraka miaigny aminazy, tsy tôkony misaraka amin'ny vadiny izy. ¹⁴ Satria lelahy tsy mpino natokagna noho amin'ny vadiny, ndraiky viavy tsy mpino natokagna nohoniny amin'ny vadiny rahalany. Fa raha tsy izegny ho maloto zanakandrô, nefa raha marigny efa vaotôkagna irô. ¹⁵ Izy koa vady tsy kristianina miala, ambila izy andeha. Amin'ny raha kara zegny, ralahy na ranabavy tsy voafehin'ny vavan-drô. Zagnahary nikaiky atsika mba hiaigny am-piadanagna. ¹⁶ Anarô viavy, amin'ny fomba karakory ahaizanao, fa ho voahavotronao vadinao? Anarô lelahy, amin'ny fomba karakory koa ahaizanao, fa ho voahavotronao vadinao? ¹⁷ Ambila fo ny tsiaraikiaraiky hiaigny amin'ny fiainagna efa nagnanaovan'ny Tompo izy, bakô araka zegny efa nikahian-dRagnahary izy. Io fitsipikinaka ao amin'ny fiangonagna jiaby. ¹⁸ Efa voavositry mba olo araiky izy koa fa kahigna mba hino? Izy tsy tôkony hiezaka hisehoseho kara olo'tsy voavositry. Tsy voavositry mba olo araiky izy koa nikahigna amin'ny finoagna? Tsy tôkony vosiragna izy. ¹⁹ Fôtony tsy ny famosiragna na ny tsy famosiragna ny tegna izy. Tegna izy ny fagnanaovagna didin-dRagnahary. ²⁰ Tsiaraikiaraiky tôkony hijanogno amin'ny fikahiagna zegny nisy izy rahoatra koa nikahiny Zagnahary mba hino izy. ²¹ Andevo mba anao tamin'ny nikahian-dRagnahary anao? Aza miasaloha amin'izegny. Izy koa mety ho afaka anao, araraota izegny. ²² Fôtony olo araiky nikahin'ny Tompo ho andevo, olo afaka ny Tompo. Kara zegny koa, andevon'i Kristy olo afaka tamin'ny nikahiagna izy mba hino. ²³ Anarô olo voavidy, dikany zegny aza magnano kara irô andevon'olo. ²⁴ Anarô ralahy, na ino na ino fiainagna nisy atsika tsiaraikiaraiky tamin'ny atsika nikahigna mba hino, aoka atsika hijanogno ho kara zegny. ²⁵ Mahakasiky irô nzegny tsy manambady feky, zaho tsy managna didy baka amin'ny Tompo. Nefa zaho magnamia hevitriko kara araiky zaigny, baka amin'ny famindram-pôn'ny Tompo, tôkony atokisagna. ²⁶ Nohony zegny, mieritreritry zaho fa baka amin'ny loza ho avy, tsara amin'ny lelahy mijanogno amin'ny maha izy izy. ²⁷ Voafehy amin'ny viavy mba anarô? Aza mitady ho afaka aminany. Afaka amin'ny vadinao mba anao? Aza mitady vady. Nefa tsy nanota anarô izy koa manambady. ²⁸ Izy koa manambady ny viavy tsy manambady, tsy nanota izy. Hanagna karazagna olagna maro irô zegny manambady rahoatra ka mbola velogno, fa za ndraiky ty hagnadoso anarô amin'izegny. ²⁹ Fa kara ty raha ambarako, anarô ralahy: Foky fotoagna. Manomboko ziô, alô irô zegny efa manambady hiaigny ho kara olo tsy managna. ³⁰ Irô zegny mitomagny tôkony hagnano ho kara olo tsy mitomagny, irô ravoravo ho kara tsy ravoravo, bakô irô zegny mividy ho kara olo tsy managna na ino na ino; ³¹ bakô irô zegny mampiasa izao tontolo izao tsy tôkony hagnano kara olo mampiasa izegny tanteraka. Fôtony izao tontolo izao amin'ny endrik'izio ho avy amin'ny fiafaragna. ³² Tiako anarô ho afaka amin'ny ahiahy irô. Lelahy tsy manambady miahiahy amin'ny raha ny Tompo, ny amin'ny fomba hamparavoravoagna Izy. ³³ Fa lelahy manambady ndraiky miahiahy amin'ny rahan'izao tontolo izao, ny amin'ny fomba hamparavoravoagna vadiny_ ³⁴ mandasandra izy. Viavy tsy manambady na virijiny miahiahy amin'ny raha ny Tompo, ny amin'ny fomba hanokanagna amin'ny tegna ndraiky fagnahy. Fa viavy manambady ndraiky miahiahy amin'ny rahan' izao tontolo izao, ny amin'ny fomba hamparavoravoagna vadiny. ³⁵ Hambarako zegny mba tombotsoanarô manokagna, fa tsy hagnapetraka raha jiaby hanakantsakana iô aminarô. Magnambara izegny zaho nohon'ny raha marigny, amin'izegny anarô mba hanolo-tegna amin'ny Tompo tsisy raha manabataba. ³⁶ Izy koa misy olo araiky mihevitry fa tsy mitonga tsaikitsaikinany am-pagnajagna_ izy koa mihoatra taognon'ny fanambadiagna i viavy io sady tsy maintsy kara izegny_ tôkony hagnano izegny tiany izy. Tsy manota izy. Tôkony hagnano fivadiany irô. ³⁷ Izy koa ndraiky nanagna fikasagna tsara tao am-pôny izy, izy koa tsisy faniritiriagna fa afaka mifehy sitrapôny manokagna, sady nanapa-kevitry tao am-pôny koa izy hagnano izegny, mba hitanany tsaikitsaikinany ho virijiny, tsar nynataony. ³⁸ Magnano ny tsara izegny manambady tsaikitsaikinany, avio zegny misafidy tsy hanambady hagnano ny tegna tsaratsara. ³⁹ Viavy voafehin'ny vadiny izy koa mbola velogno i lelahy io. Izy koa ndraiky fa maty vadiny, malalaka tsara izy hanambady zegny tiany vadigny, fa tegna tsara ao amin'ny Tompo fo. ⁴⁰ Nefa amin'ny fitsaragnako tôkony ho ravoravo izy koa miaigny amin'izao fo. Heveriko fa zaho araiky koa managna Fagnahin-dRagnahary.