¹ Raha misy araiky aminarô managna ady amin'ny araiky hafa , masakia handeha agny amin'ny fitsaragna eo alohan'ny mpitsara tsy mpino izy, fa tsy eo alohan'irô mpino? ² Zio ma tsy hay narô fa irô mpino no hitsara an'izao tontolo izao? Izy koa zegny anarô hitsara an'izao tontolo izao, zio ma tsy mahavita mandamigny raharaha mandiniky anrô? ³ Zio ma tsy hay narô fa hitsara irô anjely atsika ? Karakôry, nohony zegny, ny fihoaragna fahafantsika mitsara irô raharaha amin'ity fiaignana ity? ⁴ Raha ohatra afaka mitsara raha zay miboaka amin'ny andavanandrom-piaignana anao, fa nagnino anao mametraka karazagna tranga kara zegny eo anolohan'irô zay tsinontsinona eo amin'ny fiangonagna? ⁵ Hahamegnatra anarô hivolagnako izegny. Zio ma tsy mba misy ampy fahendregna na araiky fo amirô handamigny malomalo amin-drô mpirahalahy? ⁶ Kanefa , misy mpino araiky mandeha mifagnatriky amin'ny mpino hafa iô amin'ny fitsaragna, izegny raharaha izegny ambailà iô alohan'ny mpitsara zay tsy mpino! ⁷ Fisian'ny ady aminarô Kristiana jiaby efa faharisiagna ho anarô sandra. Fa tsy alô mijaly amin'ny fahadisoagna? Fa tsy alô ambela ho voafitaka tegnanarô? ⁸ Fa anarô nandiso ndraiky namitaka irô hafa , bakô rahalahinarô koa irô! ⁹ Zio ma tsy hay narô fa ny tsy marigny tsy handova fanjakan-dRagnahary? Aza mino vandy. Irô raha tsy manjary, irô mpanompo sampy, irô mpijangajanaga, irô lelahy mpivaro-tegna, irô zay miara- mandry amin'ny samy lelahy, ¹⁰ irô mpangalatra, irô tsy mahalala onona, irô mamolava, irô mpagnaratsy , irô mpagnano an- keriny _tsy misy araiky amin-drô irô handova ny fanjakan-dRagnahary. ¹¹ Kara zegny koa irô aminarô. Fa efa voadio, ndraiky voamarigny tamin-dRagnahary anarô tamin'ny agnaragna Tompo Jesosy Kristy ndraiky Fagnahin-dRagnahary. ¹² "Raha jiaby aran-dalàgna aminakà", fa tsy raha jiaby no maha tsara. "Raha jiaby magnaran-dalàgna aminakà," fa tsy ho andevozin'ny araiky amin-drô zaho. ¹³ "Ny hanigny nihin'ny kibo, aviô kibo natao nihin'ny hanigny," fa Zagnahary hagnadoso irô roé. Vatagna tsy natao ho an'ny fijangajangana. Kanefa ndraiky, vatagna natao ho an'ny Tompo, aviô Tompo hagnamia ho an'ny vatagna. ¹⁴ Zagnahary efa nanagnana Tompo ndraiky hanagnana atsika amin'ny tanjakanazy koa. ¹⁵ Zio ma tsy hainarô fa tegnanarô ratsam-batan'i Kristy? Ka hindesigny ve izegny irô ratsam-batan'i Kristy aviô hampitambatra irô amin'ny mpivaro-tegna? Tsy hisy anie izegny! ¹⁶ Zio ma tsy hainarô fa zay mitambantra amin'ny mpivaro-tegna lôso nofo araiky aminazy? Kara zegny voalazan'ny Sôratra Masigny hoe: "Ho nôfo araiky fo irô roé." ¹⁷ Fa izy zay miaraka amin'ny Tompo lôso Fagnahy Masigny araiky Aminazy. ¹⁸ Hialà fijangajangana! Ny fahotagna jiaby hafa ataon'ny olo ivelan'ny tegna, fa olo mpijangajanaga manota ho amin'ny tegnany araiky fo. ¹⁹ Zio ma tsy hainarô fa vatagnanarô tragnon'ny Fagnahy Masigny, zay mipetraka agnatinarô , zay azonarô bakà amin-dRagnahary? Zio ma tsy hainarô fa tsy ninarô tegnanarô? ²⁰ Fa olom-boavidy anarô. Nohony izegny mankalazà ndRagnahary amin'ny tegnanarô. [Fagnamariagna: Irô dikany volagna taloha sasany vakigna kara ty: "Nohony izegny mankalazà an-dRagnahary amin'ny tegnanarô ndraiky amin'ny fagnahinarô, zay an-dRagnahary." Fa dikany volagna tegna tsara tsy mivaky kara io.]