¹ Zahay naharegny fa misy fijangajangagna ao aminarô, Karazagna fitondran-tegna tsy tsara zay tsy azo atao feky eo amin-drô jentilisa.Misy hafatra fa misy araiky aminarô mandry miaraka amin'ny vadin'i babàny. ² Anarô tegna miavognavogno! Fa tsy tokony alahelo anarô? Araiky nagnano zegny tsy maintsy hadoso eto aminarô. ³ Fa na tsy iô ara- batagna aza zaho fa mbola iô ara- pagnahy, efa nitsara araiky zegny nagnano izegny sandra, kara tio fo zaho. ⁴ Izy koa fa miaraka mivory amin'ny agnaran'Jesosy Tompontsika anarô, iô koa fagnahiko amin'ny herin'Jesosy Tompontsika, efa nitsara io olo io sandra zaho. ⁵ Nataoko zegny mba hanoloragna izegny lehilahy izegny ho an'i Setoany ho fandrombatagna vatagna , mba ho vavoanjy fagnahy amin'andran'ny Tompo. ⁶ Tsy tsara fireharehagnanarô! Tsy hay narô fa lalivay ely magnova mofo jiaby? ⁷ Diova tegnanarô amin'ny lalivay taloha mba ho hanjary mofo vaovao anarô, ka mba hanjary mofo tsisy lalivay. Fa Kristy, zanak'ondrintsika tamin'ny Paska, nataony sorogno. ⁸ Nohony zegny alo atsika hankalaza firavoravoagna , tsy amin'ny lalivay taloha, lalivain'ny fitondran-tegna ratsy ndraiky faharatsiagna. Nefa ndraiky, aoka atsika hankalaza amin'ny mofo tsy misy lalivain'ny fahadiovam-pô ndraiky fahamarignana. ⁹ Zaho nanoratra ho anarô tao amin'y taratasiko mba tsy hiarahanarô miasa amin-drô olo mpijanganjanga . ¹⁰ Kanefa tiako volagny tsy olo mpijanganjanga jiaby eto amin'izao tontolo izao, na irô tsy mahafehy tegna , na irô mpamitaka, na irô mpanompo sampy, fôtony mba hialagna amin-drô mila miala amin'izao tontolo izao anarô. ¹¹ Nefa amin'iziô ty zaho manoratra ho anarô mba tsy hiaraka hiasa amin-jôvy na amin-jôvy zegny kahiagna rahalahy nefa miaigny ao agnatiny fijangajagagna, na zay tsy mahafehy tegna, na mpanompo sampy, na mpagnasaha, na mpigiakatoaka, na mpangalatra. Aza mihinagna hanigny miarka amin'olo kara zegny feky. ¹² Fa karakôry idirako amin'ny fitsaragna irô zegny agny ambadiky fiangonagna? Mifanohitry amin'ny zegny , anarô tsy tokony hitsara irô ao agnatin'ny fiangonagna? ¹³ Fa Zagnahary mitsara irô zegny agny ivelany. "Adosoa aminarô olon-dratsy."