¹ Kara ty tôkony handraisan'ny olo atsika, kara mpanompon'i Kristy sady mpitandrina irô raha misitrisitrikin-dRagnahary. ² Amin'izegny fifandraisagna izegny, fepetra takigna amin-drô mpitandrigny ny maha mendriky atokisagna irô. ³ Aminaka raha hely tôkony hitsaranarô na hitsaran'olombelogno jiaby zaho. Na zaho tsy mitsara tegnako. ⁴ Zaho tsy mahay fiampangagna natao taminaka, fa izegny tsy midika fa tsy managna tsigny zaho. Tompo mitsara zaho. ⁵ Dikany zegny, kaza manognotognony fitsaragna mikasiky raha jiaby alohan'ny fotoagna, alohan'ny fihavian'ny Tompo. Izy hitonga irô raha misitrisitikin'ny hiziky amin'ny fahazavagna sady hagnamboaka fikasan'ny fô. Baka iô hahazo fideragna avy amin-dRagnahary ny tsiaraikiaraiky. ⁶ Amin'iziô, ralahy, nagnatanteraka irô lalàgna taminaka ndraiky tamin'i Apolosy zaho nohon'ny aminarô, mba hafahanarô mianatra aminay dikan'ny fivolagnana: "Aza mandeha mihoatra zegny voasoratra." Amin'izegny mba tsisy araiky aminarô hipoerapoera amin'ny fankasitrahagna ny araiky noho ny hafa. ⁷ Azovy mahita tsy fitovizagna iô aminarô ndraiky irô hafa? Ino raha anagnanarô kay tsy nazonarô bôjo? Izy koa nahazo zegny bôjo anarô, nagnino anarô mipoerapoera kara tsy nagnano kara izegny? ⁸ Efa anagnanarô raha jiaby tadiavinarô! Fa lôso mpagnarivo anarô! Fa nanomboko nanjaka koa anarô_ zegny tsy baká taminay! Zaho tegna magniry ny nanjakanarô, mba hafahanay manjaka miaraka aminarô. ⁹ Nandiniky zaho fa Zagnahary nagnambela atsika ho Apostoly miharihary kara farany amin'ny laharagna ndraiky kara olo voasazy ho faty. Zahay nanjary fampisehoagna hoan'izao tontolo izao_ hoan'irô anjely, sady hoan'ny olombelogno. ¹⁰ Adala nohon'i Kristy zahay, fa anarô hendry ao amin'i Kristy. Malemy zahay, fa anarô mahery. Anarô namezagna voninahitry, fa zahay ndraiky tsy nalaigny barakà. ¹¹ Ndraiky isaka zio zahay mosary bakô mangetaheta, masikiny ankanjo, voakobay mare, ndraiky tsy managna tragno hipetragna. ¹² Miasa mare zahay, miasa amin'ny alalan'ny tagnanay fo. Izy koa fa latsaigny zahay, miaritry. ¹³ Izy koa hiagniny zahay, magnano tsodrano. Izy koa nahihigny zahay, mivolagna amin-katsaram-pagnahy. Niôva zahay, ndraiky mbola nalainy ho, fakon'izao tontolo izao ndraiky faikany raha jiaby. ¹⁴ Zaho tsy nanoratra raha jiaby iô mba hahamegnatra anarô, fa magnitsy anarô kara zanaka tiako. ¹⁵ Fa na managna mpiambigny araiky aligny ao amin'i Kristy aza anarô, tsy managna babà maro be. Fa zaho lôso babànarô ao amin'i Kristy Jesosy tamin'ny alalan'ny filazantsara. ¹⁶ Nohony zegny mampirisiky anarô zaho mba ho kara zaho. ¹⁷ Izegny nagnadifasako anarô an'i Timoty, zanaka tiako sady matoky ao amin'ny Tompo. Izy hampatsiaro anarô lalagnanaka ao amin'ny Kristy, kara nampianarako irô na aia na aia ndraiky ao amin'ny tragno NdRagnahary jiaby. ¹⁸ Amin'iziô ty lôso miavogno sasany aminarô, magnano kara fa tsy ho avy aminarô zaho. ¹⁹ Fa hoavy tsy ela aminarô zaho, raha sitraky Tompo. Bakô tsy hahay koragna ndrô zay tegna miavogno fo zaho, fa hahita tanjakan-drô. ²⁰ Fôtony fanjakan-dRagnahary tsy miankiny amin'ny koragna fa amin'ny hery. ²¹ Ino raha tadiavinarô? Tokony ho avy aminarô miaraka amin'ny tsorany kakazo zaho sa miaraka amin'ny fitiavagna feno halemem-pagnahy?