¹ Bakô zaho, ralahy, tsy afaka nivolagna taminarô kara olo ara-pagnahy, fa kara olo ara- batagna, kara tsaiky hely ao amin'i Kristy. ² Namezako ronono anarô, fa tsy ventin-kanigny, fôtony anarô tsy vôgnono tamin'izegny; bakô na amin'iziô mbola tsy vôgnono amin'izegny fo anarô. ³ Fôtony anarô mbola araka ny vatagna. Na aia misy fahasarotam-piaro ndraiky tsy fifankazahoagna iô aminarô, tsy miaigny araka ny vatagna mba anarô, tsy mandeha amin'ny tôkony hoizy mba ny olombelogno? ⁴ Izy koa misy araiky mivolagna: "Zaho magnaraka nihin'i Paoly," araiky ndraiky mivolagna: "Zaho magnaraka nihin'i Apolosy," tsy miaigny kara olombelogno fo ma anarô? ⁵ Azovy Apolosy? Azovy i Paoly? Mpanompo izegny baka aminany ninoanareo, zegny namezany Tompo asa aby. ⁶ Zaho nitsabo, Apolosy nandrôzy, fa Zagnahary nampitombo. ⁷ Dikany zegny, na araiky mitsabo na araiky mandrôzy tsisy misy dikany. Zagnahary mampitombo. ⁸ Araiky mitsabo ndraiky araiky mandrôzy olo araiky, bakô samy mahazo karamany araka ny asany aby ny tsiaraikiaraiky. ⁹ Fa zahay mpiara-miasa amin-dRagnahary. Anarô sahan-dRagnahary, sady tragnon-dRagnahary. ¹⁰ Araka fahasoavan-dRagnahary namezany zaho kara mpagnano tragno mahay, nametraka fôtony zaho bakô hafa koa magnorigny iô agnambony. Mba alo lelahy tsiaraikiaraiky hitandrigny amin'ny fomba hagnoregnany io amin'izegny. ¹¹ Fa tsisy olo magnampetraka fôtony izy koa tsy olo araiky napetraka, tsy azovy izegny fa i Jesosy Kristy. ¹² Amin'iziô izy koa misy olo magnorigny iô agnambon'ny fôtony amin'ny volamena, volafotsy, vato lafo vidy, kakazo, bozaka, na mololo, ¹³ haboaka asanany, andra mazava hagnaboaka izegny. Fôtony haboaka amin'ny môtro izegny. Môtro hitsapa hatsaragnan'ny nataon'ny tsiaraikiaraiky. ¹⁴ Izy koa mipetraka asany olo io, hahazo valiny tsara izy; ¹⁵ fa izy koa may asany olo io, matiantoko izy, fa izy vatany ndraiky ho vonjegna, kara nialany tamin'ny môtro igny fo. ¹⁶ Tsy hainarô fa anarô tragnon-dRagnahary bakô Fagnahin-dRagnahary mipetraka ao aminarô? ¹⁷ Izy koa misy olo mandrombaka tragnon-dRagnahary, handrombaka i olo zegny Zagnahary. Fa masigny tragnon-dRagnahary, kara zegny koa anarô. ¹⁸ Aza ambela hoisy olo hamitaka tegna. Izy koa misy olo iô aminarô mihevitry fa izy hendry amin'iziô vanim-potoagna iziô, ambila izy ho lôso "adala" amin'izegny mety ho lôso hendry izy. ¹⁹ Fa fahendren'izao tontolo izao hadalagna iô amin-dRagnahary. Fôtony voasoratra: "Nahatakatra hendry tao amin'ny hafitsiagnan-drô Izy." ²⁰ Bakô koa: "Tompo mahay fa fihevitry hendry tsisy dikany." ²¹ Dikany zegny tsisy fireharehagna mikasiky olo feky! Fa raha jiaby ninarô, ²² na Paoly, na Apolosy, na Kefasy, na izao tontolo izao, na fiainagna, na fahafatesagna, na raha amin'iziô, na raha ho avy. Raha jiaby ninarô, ²³ aviô anarô nihin'i Kristy, bakô Kristy nihin'i Zagnahary.