¹ Tiko hainarô , rahalahy, fa irô babàtsika tao ambanin'ny rôndro jiaby bakô namakivaky ranomasigny. ² Olo jiaby natao batisa ho amin'i Mosesy tao amin'ny rôndro ndraiky tao amin'ny ranomasigny, ³ aviô olo jiaby samy nihinagna sakafom-pagnahy mitovy. ⁴ Olo jiaby nigiaka ranom-pagnahy mitovy. Fa irô nigiaka tamin'ny vatolampim- pagnahy zay nagnaraka irô, Kristy izegny vatolampy izegny. ⁵ Fa Zagnahary tsy nagneky tsara ny ankamaroan-drô, bakô fatin-drô naparitaka tagny an'efitra. ⁶ Amin'izo ty raha jiaby regny ohatra ho atsika, mba tsy hagniriantsika raha ratsy kara nilain-drô. ⁷ Aza manompo sampy, kara sasany tamin-drô. Izegny araka voasôratra hoe:" Irô olo nipetraka mba hihinagna ndraiky higiaka, bakô nitsangana mba hisôma." ⁸ Alô atsika tsy hijangajanga, kara nataon'ny maro tamin-drô. Agnatiny andra araiky, olo telo amby roapolo arivo no maty nohon'izegny. ⁹ Alô atsika tsy hitsapa Kristy, kara nataon'ny maro tamin-drô kay naripaka bibilava irô. ¹⁰ Aza mimenimenigny koa, kara nataon'ny maro tamin-drô kay naripakan'ny anjelin'ny fahafategna. ¹¹ Raha jiaby regny no nitranga tamin-drô mba ho ohatra ho atsika. Nisoratagna mba ho fampianaragna atsika izy regny_ho amintsika zay niavian'ny faranandrà. ¹² Dikan' izegny zegny mieritreritry tegnanany efa mitsangana mitandrema tsara mba tsy ho lavo. ¹³ Tsy nisy fakam-pagnahy nahatakatra anarô kay tsy hitambaran'olombelogno jiaby. Fa kanefa, Zagnahary mahatoky. Tsy hagnambaila anarô halaim-pagnahy mihoatra zakanarô Izy. Miaraka amin'ny fakam-pagnahy, hagnamia anarô lalagna hilifasagna koa Izy, mba hafanarô miaritry izegny. ¹⁴ Dikan'izegny , ry tiako, milifasa lavitry fanompoan-tsampy. ¹⁵ Mivolagna aminarô kara olo manan-tsaigny zaho, mba hafahanarô mitsara zay volagniko. ¹⁶ Kapoakan'ny fisaoragna zay isaorantsika, zio ma izegny tsy fiombonagna amin'ny lion'i Kristy? Mofo zay vakiantsika, zio ma izegny tsy fiombonagna amin'ny vatagnan'i Kristy? ¹⁷ Fôtony araiky fo mofo, atsika zay maro vatagna araiky. Atsika jiaby mandray amin'ny mofo araiky fo. ¹⁸ Zhava irô vahoakan'Israely: zio ma irô zay mihinagna irô fagnatriky tsy mpandray anjara eo amin'ny alitara? ¹⁹ Ino basy raha volagniko? Hoe tsisy dikany izegny sampy? Sa hanigny zay natao fagnatriky tamin'ny sampy no tsisy dikany? ²⁰ Fa mikoragna mikasiky raha jiaby ataon-drô Jentilisa mpanompo sampy fagnatriky zaho, fa amaizan-drô irô devoly raha jiaby regny fa tsy an-dRagnahary. Tsy tiako anarô ho jery araiky amin'ny devoly! ²¹ Tsy afaka migiaka kapoakan'ny Tompo ndraiky kapoakan'ny devoly anarô. Tsy afaka miaraka eo amin'ny latabatra Tompo ndraiky latabatran-drô devoly anarô. ²² Sa magnano zay mahasaro-piaro Tompo atsika? Mahery noho Izy ma atsika? ²³ "Raha jiaby ara-dalàgna ," fa tsy raha jiaby mahatsara." Raha jiaby ara-dalàgna," fa tsy raha jiaby no mampandroso olo. ²⁴ Tsisy tôkony hitady tombontsoany manôkagna. Kanefa, tsiaraikiaraiky tôkony hitady tombotsoany namany. ²⁵ Afaka mihinagna raha jiaby alafo agny amin'ny tsena anarô, fa aza magnotanitany eritreritry eky. ²⁶ Fa "nihin'ny Tompo tany, ndraiky zay raha jiaby misy ao aminazy." ²⁷ Raha misy tsy mpino magnano karibo anarô hihinagna, kay magniry handeha anarô, hahana zay raha jiaby mipetraka eo alohanarô kaza mametraka fagnontaniagna amin'ny eritreritry eky. ²⁸ Fa raha misy mivolagna aminao hoe: " Ity hanigny ity bakà amin'ny fagnatitra mpanompo sampy," aza mihinagna izegny. Izegny nihin'ny nampahay anarô, ndraiky nihin'ny fieritreretagna. [fanamarihagna: Ny dikany volagna taloha sasany manampy hoe:"Fa tany ndraiky raha jiaby ao aminy nihin'ny Tompo". Fa dikan-teny tsara indrindra tsy misy izegny.] ²⁹ Tsy mivolagna zaho hoe eritreritrinao manôkagna, fa fieritreretan'olo hafa. Nagnino fahafako tôkony tsarainy fieritreretana hafa? ³⁰ Izy koa mandray anjara amin'ny hanigny am-pakansitragna zaho, nagnino no tivativaigny amin'ny zay namiako fisaoragna? ³¹ Dikan'izegny , na mihinagna na migiaka anarô, na ino na ino ataonarô, ataova ho voninahitry Zagnahary jiaby. ³² Aza magnamia raha mampameloko Jiosy na ny Grika, na fiangonan-dRagnahary. ³³ Miezaka haharavo olo jiaby amin'ny raha jiaby zaho. Tsy mitady tombontsoako zaho, fa nihin'ny maro. Ataoko izegny mba ho voavonjy irô.