¹ Ry zanako, ka magnaligno gny didiko dra tano ao aponao gny fapenarako, ² fa andro lava vo tao maro hiay dra fedagna gny hagnapian'ireo hanao. ³ Ka anga handao anao gny sy fivadiha-pagneke vo gny fahamendreha-pitokisa, hapifamatosy eo aminigny vozonao gny fonao. ⁴ Dra hahita fitia vo ho soa laza eo amason'Agnahary vo gny olo hanao. ⁵ Matokia an'i Yaveh aminigny fonao manotolo dra ka miaky aminigny fahalalanao avo; ⁶ magneke Anazy aminigny lalanao aby dra Izy gny hapahisy gny lalano. ⁷ Ka hendry eo imasonao avo; matahoroa an'i Yaveh dra ialao gny rasy. ⁸ Ho fagnasitraha ho anigny nofonao dra famelombeloma ho anigny vatanao zay. ⁹ Magnaza an'i Yaveh aminigny harenao vo gny voloham-bokasy gny vokasao aby, ¹⁰ dra ho feno gny tragno fitehirizam-bokasy dra ho vaky hitobatobaky gny fitoeram-boalobokao, feno divay vaovao. ¹¹ Ry zanako, ka magnamavo gny fapenaran'i Yaveh dra ka malaiky gny fibedesany, ¹² fa reo ze tiany gny faizin'i Yaveh, manahaky gny ataonigny ra aminigny zanany ze akasitrahany. ¹³ Sambasy ze mahita fahendre ; fa mahazo fahazava-say avo koa izy. ¹⁴ Soa noho ze omenigny volafosy gny azonao avy aminigny fahendre dra gny tombony dra soa mihoasy gny volamena. ¹⁵ Sarobily noho gny firavaky gny fahedre dra sy misy azonao apitahia aminazy ze mety misy hirinao. ¹⁶ Andro lava gny eo atagnany akavana; dra harena vo voninahisy gny eo atagnany akavia. ¹⁷ Lalanigny fahalemem-pagnahy gny lalany dra fedagnan'avokoa gny lalany aby. ¹⁸ Izy gny hazon'ay ho an'ireo ze mihazon'anizay, sambasy reo ze mifikisy amizay. ¹⁹ Taminigny fahendre gny nagnoregnan'i Yaveh gny tany, taminigny fahazava-say gny napitoera gny lagnisy. ²⁰ Taminigny fahalala gny nitriaranigny laliky dra napilasaky gny andony gny raho. ²¹ Ry zanako, tano gny fisara vo faheza-magnavaky mary, dra ka ala aminigny masonao zay. ²² Ho aina ho anigny fagnahinao irery dra ravaky gny fakasitraha hanova magnodidy gny tendronao. ²³ Dra handeha aminigny lalanao apilamina hanao dra sy ho tafitohy gny tombokao; ²⁴ gny fa mandry hanao, dra sy hatahosy; gny fa mandry hanao, dra ho mamy gny torimasonao. ²⁵ Ka matahosy gny horohoro avy tapoky na gny fandrava ataonigny rasy fagnahy, gny fa avy zay, ²⁶ fa Yaveh gny ho eo agnilanao dra hiaro gny tombokao sy ho voanigny fandriky. ²⁷ Ka mamihy gny soa amireo ze mendriky zany, raha ao aminigny herinao avo gny hiasa. ²⁸ Ka mizaka aminigny namanao ho: "Mandehana, dra mevia ndraiky, dra maraindray gny hagnomezako anizay," raha hanagnanao agny aminao avo gny vola. ²⁹ Ka manao tetiky hagnisy rasy gny namanao__dra gny monina eo agnilanao dra matoky anao. ³⁰ Ka mifandisy aminigny olo aminigny sy atony, raha sy nagnisy rasy anao izy. ³¹ Ka mialo gny olo maherisetra na misafidy ze lalany. ³² Fa maharikoriko amin'i Yaveh gny olo maniasia, fa hapitokiany aminazy koa gny olo mahisy fo. ³³ Eo aminigny tragnonigny rasy fagnahy gny fagnozognan'i Yaveh, fa mitafy gny fonegnanigny olo-mary koa Izy. ³⁴ Mandasa gny pandrabiraby Izy, fa magnome sitraky ho anigny olo manetry tegna. ³⁵ Gny olo-kendry mandova voninahisy, fa gny mola koa dra hisandrasy aminigny fahamegnarany.