¹ Ry zanako, raha mandray gny zakako hanao dra raketinao ao aminao reo didiko, ² dra aoky gny sofinao hitandry soa gny fahendre dra atongilagno ho aminigny fahaza-say gny fonao. ³ Raha mihiakiaky ho aminigny fahazava-say hanao dra mapiaka-peo ho amizay, ⁴ raha mitalia anizay manahaky gny hitaliavanao volafosy hanao dra mitalia gny fahazava-say manahaky gny fitaliava harena miafy, ⁵ dra ho fatasao gny tahosy an'i Yaveh dra ho hitanao gny fahalala an'Agnahary. ⁶ Fa magnome fahendre i Yaveh, boak'aminigny vavany gny hiavianigny fahalala vo fahazava-say. ⁷ Mitahiry gny fahedre soa ho an'ireo ze akasitrahany Izy, Izy gny apingan'ireo ze mandeha aminigny fahisia, ⁸ miamby reo lalanigny rariny Izy dra hiaro gny lalan'ireo ze matoky Anazy. ⁹ Dra ho sapanao gny fahamarigna, gny rariny, vo gny hisiny, dra gny lalana soa aby. ¹⁰ Fa hidisy ao am-ponao gny fahendrena, dra hahafinarisy gny fagnahinao gny fahalala. ¹¹ Hiaro anao gny fahamalia, dra hiambin'anao gny fahazava-say. ¹² Hagnavosy anao aminigny lalan-drasy reo, amireo ze mizaka raha-rasy, ¹³ ze magnenga reo lalanigny fahamarigna dra mandeha aminigny lalanigny fahamezigna. ¹⁴ Mifaly ereo gny fa manao rasy dra finarisy aminigny fahavetavetanigny rasy. ¹⁵ Magnaraky lala-meloky ereo, dra napiasa gny fitaky hagnavonia gny lalany. ¹⁶ Fahendre dra fahamalia gny hagnavos'anao aminigny apela zanga, aminigny apela rasy fitondratena vo gny zakany mandoka. ¹⁷ Mahafo gny sakaizanigny fahatanorany ereo magnaligno gny fagnekeny taminigny Zagnahariny. ¹⁸ Fa gny tragnony mitariky aminigny fahafatesa dra reo lalany hinday anao ho amireo ze agny andolo. ¹⁹ Ze midisy ao aminazy dra sy hihery sasy dra sy hahita gny lalanigny fiegna ereo. ²⁰ Dra handeha aminigny lalanigny olo soa hanao dra hagnaraky reo lalanigny olo-mary. ²¹ Fa reo manao gny mary gny hanao fonegnan'eo aminigny tany, dra reo sy mivaliky gny hitoby ao amizay. ²² Fa gny rasy fagnahy fongoran'eo aminigny tany, dra sy mana-pinoa hofongoryn'eo amizay.