¹ Soa kokoa gny olo mahatra ze mandeha aminigny fahisiany toy izay olo mivadiky aminigny zakany dra mola. ² Dra koa, sy soa gny mana fagniria sy misy fahalala dra ze mihazakazaky fatrasy dra ho diso lalana. ³ Gny hamolanigny olo gny mamotiky gny fiegna dra amin'i Yaveh gny sososy gny fony. ⁴ Mahabe nama gny harena, fa gny olo mahatra koa dra tafasaraky amireo namany. ⁵ Gny vavolombelo sandoky dra sy ho afa-may dra ze mamoaky vandy dra sy ho afa-bela. ⁶ Maro gny hila sitraky aminigny olo malala-tagna dra gny namanize manolosy fagnomezan'aby. ⁷ Halanigny rahalahiny aby gny olo mahatra; ko maiky fa reo namany ze magnalavisy anazy! Hitoka anereo izy, saingy fa lasa ereo. ⁸ Ze mahazo fahendrena dra tia gny ainy; ze mita gny fahalala dra hahitta soa. ⁹ Gny vavolombelo sandoky dra sy ho afa-may, fa ze mamoaky vandy koa dra ho maty. ¹⁰ Sy mety aminigny mola gny miay aminigny harena mahafinarisy__maiky fa gny hanapahanigny andevo eo amireo andriandahy. ¹¹ Gny fahamarigna mahatonga gny olo sy ho moro ory dra voninahisy honazy gny sy magnety gny fahadisoa. ¹² Gny fahatezeranigny pazaka dra manahaky gny fieronigny liona tanora, fa gny sitrany koa dra manahaky gny andro aminigny ahisy. ¹³ Gny zanaky mola dra faharana ho anigny rany dra gny valy pifandrisy dra manahaky gny rano mitete sy tapaky. ¹⁴ Gny tragno vo harena gny lova boak'aminigny ray aman-dreny, fa valy hendry koa gny boak'amin'i Yaveh. ¹⁵ Gny hakamoa dra mandasaky gny olo agnaty torimaso laliky, fa ze sy vono-kisa koa dra ho resy. ¹⁶ Ze makato gny didy dra miaro gny ainy, fa gny olo ze sy mihevisy gny lalany koa dra ho maty. ¹⁷ Reo ze miatra gny mahatra aby dra mapisambosy an'i Yaveh dra henorany izy noho reo ze nataony. ¹⁸ Fehezo gny zanadahinao dieny misy fanatena dra ka eti-pigniria hamona anazy. ¹⁹ Gny olo be kizity dra sy maisy magnefa gny sazy; raha mamozy anazy hanao, dra sy maisy hagnery anizay fagnindrony hanao. ²⁰ Tenoy gny torohevisy dra ekeo gny fapenara, ba ho ahendry hanao agny aminigny fiafaranigny fiegnanao. ²¹ Maro gny fikasa ao aponigny olo, fa gny tazon'i Yaveh gny haharisy. ²² Gny sy fivadiha gny irianigny olo dra soa kokoa gny olo mahatra noho gny pavandy. ²³ Gny fagnomezam-boninahisy an'i Yaveh gny mitariky gny olo aminigny fiegna; ze mana anizay aby dra ho afapo dra sy apahorinigny rasy. ²⁴ Gny kamo dra handevy gny tagnany ao an-dovia; sy hagnery hapiakasy anizay ao am-bavany akory izy. ²⁵ Veleso gny panirasira, dra ho mailo gny olo babo; anaro ze mana-say, dra hahazo fahalala izy. ²⁶ Ze mandroba gny rany dra mandroaky gny reniny dra zanaky minday hegnasy vo fahafaham-baraka. ²⁷ Raha misahasy gny miteno fapenara hanao, ry zanadahiko, dra hania hiala amireo zakanigny fahalala hanao. ²⁸ Gny vavolombelo pivadiky dra manirasira gny fisara dra gny vavanigny rasy fagnahy mitelik'eloky. ²⁹ Vonona ho an'ireo panirasira gny fagnameloha dragny zera ho aminigny lamosinigny mola.