¹ Ze mitoka-tegna dra miyalia gny fagniriany manoka dra mifandisy aminigny fisara soa aby izy. ² Gny mola dra sy mahita fahafinareta aminigny fahazava-say, fa aminigny fagnambara ze ao apony avo. ³ Gny fa misy olo rasy fagnahy avy, dra avy mindray aminazy gny fagnamavoa__mindray aminigny hegnasy vo fahafaham-baraka. ⁴ Rano laliky gny zaka aloaky gny vavanigny olo; dra rano miboiboiky gny loharanonigny fahendrena. ⁵ Sy soa gny miangasy aminigny olo rasy fagnahy, na manda gny rariny aminigny olo-mary. ⁶ Gny molony gny mola dra minday aly hon'anazy gny vavany mihasy zera. ⁷ Gny vavanigny mola gny faharavany dra mamandriky gny vatany aminigny molony izy. ⁸ Gny zakanigny pifosa dra manahaky gny sombi-kany masiro dra mizoso agny agnatinugny vatan'ireo. ⁹ Ze miraviravy aminigny asany avo koa dra rahalahinize mamotiky indrindra. ¹⁰ Tilikambo mahery gny agnaran'i Yaveh; mihazakazaky magnao gny mary dra voaaro. ¹¹ Gny harenigny pana-karena gny tana voaaro dra gny manahaky gny manda abo ao agneriserisy. ¹² Mialoha gny faharavany dra fanetre-tegna gny avy alohanigny voninahisy. ¹³ Ze mamaly melohanigny fitenoa__dra hamola vo hegnasy hon'azy zay. ¹⁴ Zakanigny fagnahinigny olo gny fahararia, fa iza gny hahazaka anizay fagnahy torotoro zay? ¹⁵ Gny fonigny mana-say dra mandrato fahalala dra gny sofinigny hendry mitalia anizay. ¹⁶ Gny fagnomezanigny olo dra mety hanokaky lala vo hindain'anazy eo anoloanigny olom-be. ¹⁷ Ze volohany minday gny raharahany dra ho mandra-pihavinigny pifanandrin'aminazy dra hagnotany anazy. ¹⁸ Gny filoka dra mandamy fifandira vo magnasaraky reo pifanandry mahery. ¹⁹ Gny rahalahy tafitohy dra sarosy azo noho gny tana mahery, dra gny fifandira dra manahaky gny hilinigny lapa. ²⁰ Boak'amigny vokasy gny vavany gny mahafeno gny trokinigny olo raiky; aminigny vokasy gny molony gny maha-afapo anazy. ²¹ Gny fahafatesa vo gny ay dra fehezinigny lela, dra reo ze tia gny lela dra hihina gny vokany. ²² Ze lelahy mahita valy dra mahita raha soa dra mahazo sitraky amin'i Yaveh. ²³ Gny olo mahatra dra mengavy famindra-po, fa gny olo manan-draha koa mamaly akasiaha. ²⁴ Ze mizaka mana nama maro dra ho ravan'ereo, fa misy nama ze akaiky kokoa noho gny rahalahy