¹ Fa nazary maloto gny volamena; endrey gny fiovan'gny volamena malio loasy! Reo vato masy dra niparitaky tegny an-zorondala aby. ² Reo zanaky sarobidin'i Ziona dra maeva gny lanzan'ereo amin'gny volamena malio, fa amizao ereo dra sy maeva noho reo siny tanimanga, asa-tagnan'ireo panefy tanimanga ereo! ³ Ndre gny amboahaolo aza manolosy gny tratrany so hapinonoa reo zanany, fe gny zanakapelan'gny oloko dra fa nazary lozabe, manahaky gny ostritsa agny amin'gny tany efisy. ⁴ Gny lelan'gny zaza minono dra mirekiay amin'gny lagnilagniby noho gny hetaheta; mangataky sakafo gny ankizy, fe sy misy ho andreo. ⁵ Reo ze nihina sakafo lafo vily amizao dra mosare egny an-dala; reo ze nibeazy nitafy akazo voloparasy, dra mandry egny amin'gny fako misavoa amizao. ⁶ Gny fatrokafa gny zanakapelan'gny oloko dra lahibe noho gny an'i Sodoma, fa nirava tao agnatin'gny fotoa fohiky zeho sady sy nisy nanandra-tagna so hagnapy anazy. ⁷ Reo pitariky anazy dra nalio kokoa noho gny oram-panala, fosy kokoa noho gny ronono; gny vatan'ereo dra mena midorihisy noho gnyharan-dranomasy, gny vatan'ereo dra manahaky gny safira. ⁸ Gny tarehin'ereo amizao dra mezy noho gny molaly; sy fatasy egny an-dala ereo. Gny holis'ereo dra nirekisy tamin'gny tolan'ereo; nazary maiky mananaky gny hazo zeho. ⁹ Reo ze novono tamin'gny mesa dra sambasy kokoa noho reo ze matin'gny haresea, ze osa, nolefony tamin'gny sy fahapian'gny vokasy lat'agny an-saha. ¹⁰ Gny tanan'ereo apela malemy fagnahy dra fa nahandro reo zanany avo; lasa sakafon'ereo nandrisy gny fotoa nandrava gny zanakapelan'gny oloko ereo. ¹¹ Naneho gny hahoriany aby i Yaveh; nandrosaky gny hahoriany masiaky Izy. Nandrehisy afo tao Ziona so handevo gny fiorenany Izy. ¹² Sy nino reo pazakan'gny tan, drs sy nino gny ponin'izeho totolo zeho, fa afaky nilisy tamin'ireo vavahadin'i Jerosalema reo fahavalo na panohisy. ¹³ Nitranga zeho noho gny fahotan'ireo paminaniny vo gny helok'ireo pisorony ze fa nandasaky gny lion'gny mary agnivony tao. ¹⁴ Nirerirery, poaky, tegny amin'ireo lala ereo. Tena voaloto loasy tamin'izeho lio zeho ereo dra sy nisy nanenga so hikasiky gny akazon'ereo. ¹⁵ "Miala! ry Maloto!" ho gny kiakinan'gny olo tamin'ereo. "Miala! Miala! Ka mikasiky!" Ka nirerirery ereo; ho gny vahoaky teo amin'ireo firene ho: "Sy mahazo mizano eto sasy ereo." ¹⁶ Yaveh mihisy gny nagnaparitaky andreo; sy nagnety endreo sasy Izy. Sy magnome voninahisy reo pisoro ereo, sady sy naneho sitraky tamin'ireo loholo. ¹⁷ Pahy gny masonay, miamby vasoky ze hagnapy anay; lat'amin'ireo tilikambo fiambenanay gny nagnetenay gny firene ze sy afaky namonzy anay. ¹⁸ Nagnaraky reo lianay ereo, sy afaky nandeha tamin'ireo lalanay zahay. Mariny gny fiafaranay dra sady voaisa reo andronay, fa ho avy gny fiafaranay. ¹⁹ Gny pagnitriky anay dra malaky fandehana noho reo voromahery egny an-dagnisy. Nagnitriky anay tegny an-tendrombohisy ereo dra nanao otriky ho anay tagny an-tany efisy. ²⁰ Gny fofonay eo amin'gny vavoronay dra--- gny voahosos'i Yaveh--- Izy gny voasambosy tao an-davak'ereo; gny nizaka ho: " Ao ambanin'gny alony gny hahavelo anay amin'gny firene aby." ²¹ Mifalia sady miravoravoa, ry zanakapelan'i Edoma, hanao ze mitoboky agny amin'gny tanin'i oza. Fa ho aniha avo koa gny handrosoa gny kapoaky; ho mamo hanao sady hapiborida gny vataniha. ²² Ry zanakapelan'i Ziona, fa hifara gny fatrokafa aniha, sy hagnitasy gny sesitaniniha Izy. Fe ry zanakapelan'i Edoma, hagnafay Izy; sy hagnasaro reo fahotaniha izy.