¹ Tadidio, ry Yaveh, ze nahazo anay, atio sady diniha gny fahafaham-barakanay. ² Nafindra ho an'ireo vahiny gny lovanay; gny fasangenay ho an'ireo hafa firene. ³ Nizary kamboty zahay, kamboty ra, vo gny reninay dra manahaky gny panday vata. ⁴ Sy mainsy mandoa volafosy ho an'gny rano inominay zahay, sady sy mainsy mandoa volafosy vo mahazo gny vasianay. ⁵ Reo ze magnitriky anay dra mariny afaranay; rokaky zahaysady sy mahita fisahara. ⁶ Fa nanolo-bata ho an'i Egypta vo Asyriana zahay so hahazoa sakafo sahaza. ⁷ Nanota reo razambenay, dra sy eo sasy ereo, vo zahay gny mizaka gny helok'ereo. ⁸ Reo andevo gny manzaka eo aminay, dra sy misy hagnafaky anay eo an-tagnan'ereo. ⁹ Manao soro gny ainay zahay vo mahazo gny mofonay, nohon'gny mesa agny an'efisy. ¹⁰ Niha-nahama manahaky gny fatagny gny holisinay nohon'gny hahoria miredareda. ¹¹ Voaolaky reo apela tao Ziona, vo reo viriziny tao amin'ireo tanan'i Joda. ¹² Nahanto tamin'gny tagnany avo reo andriandahy, dra sy nomem-boninahisy reo loholo. ¹³ Nitere hikosoky vary tamin'gny fikosoham-bary reo tovolahy, vo reo ankizy lahy dra mivembe milanza hazo. ¹⁴ Niala teo amin'gny vavahadin'gny tana reo loholo, dra nanenga gny raha magnenon'ereo gny tovolahy. ¹⁵ Nizano gny hafaliam-ponay sady niova ho fandala gny dihinay. ¹⁶ Nilasaky lat'egny an-dohanay gny satro-boninahisy; loza ho anay, akory nanota zahay! ¹⁷ Noho zeho dra nazary narary gny fonay, sady nazary pahy gny masonay, noho reo raha reo dra nazary pahy gny masonay, ¹⁸ akory gny tendrombohis'i Ziona nitoka-mony, zay misy amboahaolo mikarenzy eo aminazy. ¹⁹ Fa Hanao, ry Yaveh, dra manzaka mandrakizay, vo Hanao dra hitoboky eo amin'gny seza fiandriananiha hatramin'gny taranaky fara-mandimby. ²⁰ Nagnino zahay gny alignoniha mandrakizay? Nagnino Hanao gny mahafo anay mandrisy gny andro maro? ²¹ Aheregno Aminiha zahay, ry Yaveh, dra hihery. Avaozy manahaky gny taloha gny andronay--- ²² no sy ho fa nilaviniha tateraky zahay dra tena ory loasy aminay Hanao.