¹ Sa ra gny olo sy mana asa fatrasy eto an-tany? Sa ra gny androny sy mitovy amin'gny andron'gny lelahy raiky nikarama? ² Manahaky gny andevo raiky magniry fatrasy gny aloky gny hariva, manahaky gny lelahy raiky mitalia gny karamany--- ³ ka dra nahy so hiarisy gny volan'gny fahoria zaho; fa nome hariva feno fikorontagna zaho. ⁴ Nofa mandry zaho, dra mizaka amin'gny vatako ho: 'Ombia zaho gny hifoha dra ombia gny hariva gny ho lasa?' Nivalibaliky ambony ambany zaho mandra-parain'gny andro. ⁵ Niakazo kanka vo baingan-tany gny nofoko; maiky gny fery tamin'gny holoso vo boakeo dra afaky sady nihery ndraiky. ⁶ Malakim-pandeha noho gny famahanan-tenony gny androko; mandalo sy misy fagnatena ereo. ⁷ Ry Zagnahary, sarovy fa gny fiaignako dra fofonay raiky avo; sy hahita soa sasy gny masoko. ⁸ Gny mason'Agnahary, zay mahita anahy, dra sy hahita anahy sasy; gny mason'Agnahray dra ho eo aminahy, fe sy hisy zaho. ⁹ Manahaky Gny raho levo so mihely, dra manahaky anizay koa gny zy hiakaran'izay mizoso agny amin'gny Fiainan-sy hita sasy. ¹⁰ Sy hihery agny am-pasangeny sasy izy; ndre gny fonenany aza sy hahalala anazy sasy. ¹¹ Noho zay sy hagnakombo gny vavako zaho; fa hizaka amin'gny fangirifirian'gny fagnahiko zaho. ¹² Moa se ranomasy zaho na biby masiaky an-dranomasy gny asinao fiambena eo aminahy? ¹³ Nofa mizaka zaho ho: 'Hapiegny anahy gny farafarako, vo gny fandriako hapizano gny fitaregnako,' ¹⁴ dra mapatahosy anahy amin'gny nofy vo mapihorohoro anahy amin'gny alalan'gny fahita Hanao, ¹⁵ so hisafidianako gny fagnakenda vo gny fahafatesa toy zay miaro taho tolako tahoky. ¹⁶ Halako gny fiegnako; sy magniry gny ho velo lalandava zaho; engao raiky zaho fa sy misy dikany gny androko. ¹⁷ Ino ra gny olo gny tokony ho hiahianiha, gny tokony ho darianiha, ¹⁸ gny tokony ho dinihiniha isaky maraindray vo sapainiha amin'gny fotoan'aby? ¹⁹ Mandra-kombia zay mialohan'gny hialaniha aminahy, mialohan'gny hanenganiha anahy raiky apy hitelomako gny ranoniviko. ²⁰ Ndre dra nanota aza zaho, dra ho inoniha ra zay, Hanao zay mandiniky gny olo? Nagnino Hanao gny nikendry anahy, so ho eta-mavesasy ho aniha? ²¹ Nagnino Hanao gny sy mamela gny hadisoako sady mangalaky gny heloko? Fa androany zaho dra handry amin'gny botany; hitalia anahy fatrasy Hanao, fa sy hisy zaho."