¹ Dra namaly Joba dra nizaka ho: ² " Eh, no mbo voalanza le gny fagniriako; no mbo nahy teo amin'gny mizana aby le gny loza nahazo anahy aby! ³ Fa androany dra mavesasy lilasy noho gny fasi-dranomasy zeho ⁴ Fa gny zana-sipikin'gny Tsitoha dra ato aminahy, mino poizy gny fagnahiko; reo fapihorohoroan'Agnahary dra lahasy hanohisy anahy. ⁵ Magneno fatrasy ra gny ampondra-dia no mana ahisy? Ndre gny agnomby hitre nohon'gny faharesea no manam-bilo? ⁶ Sady ze sy misy ziro azo hohany no sy misy sira? Na misy sirony ra gny taposin'atoly? ⁷ Manda gny hikasiky reo zaho; manahaky gny sakafo maparikoriko anahy reo. ⁸ Eh, enga ra ka homen'Agnahary anahy gny raha ze iriko fatrasy: ⁹ so ho sitrak'Agnahary gny hanorotoro anahy ndraiky mandeha, ka haninzisy gny tagnany dra hangalaky anahy amin'itiky fiegna tiky Izy! ¹⁰ Aoky ho mbo fegnenako zao---ndre dra mifaly ao amin'gny fararia ze sy mihe aza zaho: fa sy nanda gny zakan'gny Raiky Masy zaho. ¹¹ Ino moa gny heriko, gnombo tokony hiezaky handigny avo zaho? Ino gny hiafarako, gny tokony ho hakavako gny androko? ¹² Herim-bato ra gny heriko? Na vita amin'gny saba ra gny nofoko? ¹³ Sy mary ra fa sy misy fagnapia sasy ao amin'gny vatako, vo zeho fahendre zeho fa nala taminahy? ¹⁴ Ho an'gny olo ze fa ho ketraky, gny fahatokia gny tokony hasehon'gny namany; ndre dra amin'ize nahafo gny fahatahora gny Tsitoha aza. ¹⁵ Fa reo rahalahiko dra nahatoky atminahy manahaky gny ranotrambo agny an'efisy, manahaky gny lakan-drano ze mandalo fosiny avo, ¹⁶ Ze mezy nohon'gny ranomandry ao amin'ereo, dra manahaky gny oram-panala ze magnavony gny vatany ao amin'ereo. ¹⁷ Sady nofa levo ereo, dra manzavo; nofa mafana, dra misoniky am-pitoboha. ¹⁸ Gny rodobe ze mandeha amin'gny lalany dra nivio nitania rano; mirerirery egny an-tany sy mamokasy izy regny ka dra ripaky. ¹⁹ Gny rodobe lat'agny Tema dra natakalaisy tegny, no nagnategna anreo gny atokon'i Sheba. ²⁰ Diso fagnatena ereo nohon'gny fahatokiany fa hahita rano. Nandega tagny ereo, akory voafitaky. ²¹ Fa androany handrareo namako dra sinosino aminahy; mahita gny raha mahaory nahazo anahy handrareo ka matahosy. ²² Nizaka taminddrareo ra zaho ho: 'Omeo raha zaho?' Na ho: 'Hanolosy fagnomeza lat'amin'gny harendrareo zaho?' ²³ Na ho: 'Avoto amin'gny tagnan'ereo fahavaloko zaho?' Na ho: 'Afaho amin'gny tagnan'ereo papahory anahy zaho?' ²⁴ Apenaro zaho,dra ho tanako gny fahanginako; ahivo ze hahatakarako ho teza gny nahadiso anahy. ²⁵ Endrey gny hararin'gny zaka mary! Akory gny fandresen-dahasindrareo, akory gny tena hagnanaran'ireo anahy? ²⁶ Mikasa gny hanao sinosino gny zakako ra hanao, manao gny bzakan'gny olo mamoy fo ho sahala gny rivosy? ²⁷ Eka vatany, misiriry gny zaza kamboty ra handrareo, sady mialy varosy amin'gny namandrareo sahala gny etam-barosy. ²⁸ Fe androany, mbo atio se zaho, fa vatany sy mbo havandy eo agnatrehan'gnt tarehindrareo zaho. ²⁹ Misahara, mitalaho amindrareo zaho; aoky sy hisy sy fahamarigna eo amindrareo; eka vatany, mizanogna, fa mary gny aliko. ³⁰ Misy faharasia ra eo amin'gny lelako? Sy afaky mamatasy gny raha rasy ra gny vavako?