¹ Afaky misinto Levitiana amin'gny finta se hanao? Na mamatosy reo valagnorany amin'gny taly? ² Afaky magnisy taly eo amin'gny orony se hanao, na manindro gny valagnorany amin'gny alalan'gny finta? ³ Hitalao fatrasy aminiha se izy? Hanao zaka malefaky aminiha se izy? ⁴ Hanao fifaneke aminiha se izy, fa tokony ho alainiha ho panopo mandrakizay izy? ⁵ Hihisa hindray aminazy manahaky gny hiarahaniha amin'gny voro se hanao? hamatosy anazy ho an'gny panoponiha apela se hanao? ⁶ Hialy varosy gny aminazy se reo vondron'gny pagnarato? Hifapizaran'ireo so havily amin'ireo pivarosy se izy? ⁷ Mahavita mandefo gny holisiny amin'gny fitovam-pihaza se hanao na gny lohany amin'gny lelam-pita? ⁸ Apetaho eo aminazy ndraiky mandeha gny tagnaniha,dra ho saroaniha gny aly sady sy hanao anizeho sasy hanao. ⁹ Ingo. gny fagnatenan'gny olo ze manao anizeho dra vandy; sa ra sy hisy hilavo amin'gny tany nohon'gny fahita anazy avo? ¹⁰ Sy misy olo feno hahoria dra saky hihansy Levitiana; koa, ia se gny afaky misanga eo agnatrehako? ¹¹ Ia gny nagnome raha Aniha volohany so hagnefako anazy? Ze iaby ambanin'gny lagnisy manotolo dra Anahy. ¹² Sy hisigny zaho mahakasiky gny tomboky gny Levitiana, ndre avo koa gny raha mahakasiky gny heriny, na mahasiky gny hasoan'gny bikany. ¹³ Ia gny afaky mangalaky reo fitafiany ivelany? Ia gny afaky milisy gny ferova misoso? ¹⁴ Ia gny afaky manokasy reo vatrangaran'gny tarehiny--- voahodidy reo nifiny, zay horohoro? ¹⁵ Gny lamosiny dra vita amin'ireo apinga misoso, mifanery manahaky gny fihilin'gny tombo-kase. ¹⁶ Gny raiky dra tena mifagneky amin'gny raiky hafa hany ka sy misy sioky afaky milisy eo agnelagnelan'ereo. ¹⁷ Mifandray ereo; mifapirekisy, zeho dra so hahafahan'ereo hisaraky. ¹⁸ Gny hazava mitarasy lat'amin'gny fierosiny; gny masony dra manahaky reo holimason'gny vo mangiran-drasy. ¹⁹ Dra fagnilo mirehisy gny miboaky gny vavany, miparitaky gny pitik'afo. ²⁰ Gny vavoriny dra miboaky setroky manahaky gny raha mangotraky ao agnaty vilagny eo ambony afo zay nikopaha ho vatany mahama. ²¹ Gny fofon'ainy dra mapirehisy gny bain'afo hizary afo; afo gny miboaky lat'ao amin'gny vavany. ²² Ao amin'gny vozony gny hery, vo gny horohoro dra mandihy eo agnoloany. ²³ Mikamba gny fivalognan'ireo nofony; fatrasy orina eo aminazy reo; sy afaky ahesiky reo. ²⁴ Gny fony dra fatrasy manahaky gny vato--- eka vatany, fatrasy manahaky gny fikosoham-bary. ²⁵ Nofa manondrosy gny vatan Izy, ndre reo zagnahary aza ho reki-tahosy; nohon'gny tahosy, dra mihemosy ereo. ²⁶ No mizera anazy gny mesa raiky, dra sy misy dikany zeho--- ndre gny lefo, sipiky, ndre fitova-pialia maragnisy hafa. ²⁷ Mieriserisy izy fa manahaky gny mololo gny vy, vo manahas=ky gny hazo lo gny saba. ²⁸ Gny sipiky dra sy afaky mapilefa anazy; nizary lila aminazy reo vaton'gny asamotaly. ²⁹ Ahiny manahaky gny mololo reo langilang; mihomehy amin'gny firaondraona amin'gny fanidin'gny lefo izy. ³⁰ Gny tapany ambany dra manahaky reo vakim-bilagny maragnisy; manenga dian-kisaky eo amin'gny fotaky izy manahaky gny kodiaram-by fikosoham-bary. ³¹ Ahiny manahaky gny rano mangotraky agnaty vilagny gny laliky; ahiny manahaky gny vilagnin'gny hosotry maragnisy gny ranomasy. ³² Magnazava ze nilalovany izy; misy mieriserisy fa fosy volo gny laliky. ³³ An-tany etihoky dra sy misy mitovy aminazy, ze niforogny so hiay sy misy tahosy. ³⁴ Mahita gny raha aby ze mirehareha izy; izy gny pazaka ambon'ireo zanaky gny firehareha aby."