¹ Vo Yaveh nanohy niresaky tamin'i Joba; ho izy ho: " ² Tokony hagnandra hagnisy gny Tsitoha se gny olo mana-pagniria hagnarasy? Izy ze mifandahasy amin'Agnahary, dra aoky izy hamaly." ³ ra namaly an'i Yaveh dra nanao ho: ⁴ " Ingo, sy misy dikany zaho; akory gny hamaliako Aniha? Apetrako amin'gny vavako gny tagnako? ⁵ Nizaka ndraiky mandeha zaho, dra sy hamaly sasy; eka, indro, fa sy hanohy mihoasy an'izeho zaho." ⁶ Dra namaly an'i Joba tamin'gny tafio-drivosy masiaky Yaveh dra nizaka ho: ⁷ " Apisikino manahaky gny lelahy gny valahaniha, fa hametra-pagnotania aminiha Zaho, dra sy mainsy mamaly Anahy hanao. ⁸ Sa hizaka vatana ra hanao fa sy mary Zaho? Hagnameloky Anahy se hanao so hizakaniha ho mary hanao? ⁹ Mana-sandry manahaky gny Zagnahary se hanao? Mahay mapikotrokotro-peo manahaky Anazy se hanao? ¹⁰ Tafio voninahisy vo fahamendreha gny vataniha; mihengoa haza vo fahalahibiaza. ¹¹ Apielezo amin'gny dina gny fihoaran'gny hahorianiha; atio reo aby mirehareha dra ahetreo izy. ¹² Atio reo aby ze mirehareha dra ahetreo izy; hisaho ambany eo amin'izeho isanganan'ero gny olo rasy fagnahy. ¹³ Alevegno hindray eo amin'gny tany izy aby; gadra agny amin'gny toera mivony gny tarehin'ereo. ¹⁴ Dra hagneky gny mahakasiky aniha koa Zaho fa gny tagnaniha akavagna avo dra afaky mamonzy aniha. ¹⁵ Atio se gny behomota, zay nahiko manahaky gny nanaovako aniha avo; mihina ahisy manahaky gny agnomby izy. ¹⁶ Ingo, eo amin'gny valahany gny heriny; eo amin'ireo hozasy gny trokiny gny tazany. ¹⁷ Manao gny rambony manahaky gny sedera izy; gny ozasy gny feny aby dra mitambasy. ¹⁸ Gny tolany dra manahaky gny fanso saba; tombony dra manahaky gny bara vy. ¹⁹ Izy gny lahibe amin'gny zavaboarin'Agnahary. Zagnahary raiky avo, zay nanao anazy, gny afaky mandresy anazy. ²⁰ Fa reo havoa magnome sakafo anazy; reo bibi-dia egny an-saha dra mihisa eo mariny eo. ²¹ Mipetraky ao ambanin'gny voahirana, ao agnaty volotara izy, ao agnaty lakan-drano izy. ²² Reo voahirana dra mandrakosy anazy amin'gny alokalokiny; reo hazomalahelon'gny lohasahan-driaky dra magnodidy anazy aby. ²³ Ingo, no tondraky gny moron'gny renirano, dra sy hangitakitaky izy; mahatoky izy, ndre dra hisamboaravoara hatregny ambonin'gny orony aza Jordana. ²⁴ Sa misy mahasambosy anazy amin'gny farango se, na mahasindro gny orony amin'gny fandriky?