¹ fataniha se ho amin'gny fotoa ino gny iterahan'gny osi-dia gny zanany egny amin'gny vatolapy? Voadinikiniha se nofa miteraky gny zanany gny diera vavy? ² Voaisaniha se reo vola handesan'ireo vohoky ? Fataniha se gny fotoa hiterahany reo zanany? ³ Miodriky ereo dra miteraky gny zanany, vo dra tapisy gny fahararian'gny fiteraha. ⁴ Mihamatazaky sady mitombo egny amin'gny saha lahibe reo zanany; lasa ereo dra sy mihery sasy. ⁵ Ia gny manenga malalaky gny boriki-dia andeha? Ia gny namaha gny fatoran'gny ampondra-dia, ⁶ ze fa nagnamboarako fonegna agny araba, gny fasangeny agny amin'gny tanin-sira? ⁷ Mihomehy am-pagnaseo gny tabataba ao an-tana izy; sy mahare gny hiakin'ireo pandroaky izy. ⁸ Mirerirery egny an-tendrombohisy fihinanam-bilony izy; agny izy gny mitalia gny ahi-maiso aby hohany. ⁹ Ho faly hanopo aniha se gny agnombi-dia? Hagneky gny hizano eo amin'gny fihinana namboary se izy? ¹⁰ Mahafehy gny agnombi-dia amin'gny taly so hamadihany gny bainga se hanao? Handravogna gny lohasaha ho aniha se izy? ¹¹ Hatoky anazy se hanao akory lahibe gny heriny? Hanenga gny asaniha so ho ahiny se hanao? ¹² Hiantehisy aminazy so handay gny variniha agny am-pasange , dra hamory gny vary ho eo amin'gny famoloa se hanao? ¹³ Gny elasy gny ostritsa dra mikopakopaky am-pirehareha, fe misy fita se gny elasiny vo gny volony? ¹⁴ Akory manenga reo atoliny egny amin'gny tany izy, dra engany hafana ao amin'gny botany ireo; ¹⁵ halignony fa mety hisy tomboky hanorotoro na mety hisy bibi-dia hagnisakisaky andreo. ¹⁶ Mapizaly reo zanany izy manahaky gny ho sy anazy reo; sy matahosy izy ndre dra mety ho very maina aza gny asany, ¹⁷ akory Zagnahary nangalaky taminazy gny fahendre sady sy nagnome anazy fahalala. ¹⁸ Nofa milomay mafy izy, dra hiomehezany am-pagnesoa gny sovaly vo gny pitikisy anazy. ¹⁹ Sa ra nomeniha gny heriny gny sovaly? Nipiakazo gny vozony tamin'gny volony mihofahofa se hanao? ²⁰ Fa napisambiky anazy manahaky gny valala se hanao? Mapatahosy gny hafatrasin'gny fiefonefony. ²¹ Mibitaky amin'gny heriny izy sady miravoravo amin'gny tazakiny; miboaky malaky hisena gny fitovam-pialia izy. ²² Magneso gny tahosy izy sady sy reki-tahosy; sy mihemosy amin'gny mesa izy. ²³ Mifioky eo agnilany gny zana-sipiky, mindray amin'gny lefo manzelasy sady lefom-pohy. ²⁴ Mitely tany amin'gny fahavignira vo hahoria izy; amin'gny fagnenon'gny anzomara, sy tafazano amin'gny toera raiky izy. Ndre ombia ndre ombia gny hagnenon'gny anzomara, dra ho izy ho: 'Aha!' ²⁵ Manimbolo gny aly lat'agny lavisy izy--- dra gny kotaba fatrasin'gny pifehy vo gny koraky. ²⁶ Lat'amin'gny fahendreniha se gny mapitily gny hisikisiky, dra hamelarany gny helany ho agny asimo? ²⁷ Amin'gny bekoniha se gny hiakaran'gny voromahery vo hagnamboarany gny fasange amin'gny toera abo? ²⁸ Mivelo eo amin'gny harambato izy sady magnamboasy gny akaniny eo amin'gny tendron'gny harambato, zay ferova fatrasy. ²⁹ Lat'egny gny hotaliavany gny hazany; mahita andreo lat'egny lavisy egny gny masony. ³⁰ Mino lio avo koa gny zanany; zay toera misy fatin'olo, dra egny izy."