¹ Boakeo dra nitoka an'i Joba lat'ao amin'gny tafio-drivosy mahery vaiky Yaveh dra nanao ho: ² " Ia tihoky manday ezy amin'ireo fikasa amin'gny alalan'gny zaka sy misy fahalala tihoky? ³ Apisikino manahaky gny lelahy gny valahaniha fa hametra-pagnotania aminiha Zaho, dra sy mainsy mamaly Anahy hanao. ⁴ Teza hanao tamy nanony gny fotosy gny tany Zaho? Zakao Anahy, no tena mana fahazavan-say be hanao. ⁵ Ia gny namarisy reo refiny? Zakao Anahy, no fataniha. Ia gny nagnenza gny taly fandrefesa teo aminazy? ⁶ Tamin'gny ino gny nametraha gny fotony? Ia gny nametraky reo vato fehizorony ⁷ nofa niaraky nihira gny vasian'gny maraindray dra hikiaky fifalia reo zanak'Agnahary aby? ⁸ Ia gny nandily gny ranomasy tamin'gny vatrangara nofa vaky anizeho, no niboaky manahaky gny tao am-bohoky anizeho--- ⁹ nofa nanao reho raho ho fitafiany Zaho, vo ezim-pito ho fonony? ¹⁰ Zeho dra tamin'gny namaritako gny farisy amin'gny sisin-dranomasy, vo tamin'gny nametrahako gny hily vo vatrangarany, ¹¹ dra tamin'gny nitenenako taminy ho: 'Mety ho avy hatreo hanao, fe sy hihoasy lavisy; eto gny hametrahako gny fetra amin'gny fisafoaky gny onzaniha.' ¹² Hatramin'izeho nanombohan'gny androniha, fa nagnome beko gny maraindray hiposaky se hanao, sady nahavy gny mangiran-drasy halala gny toerany eo amin'gny filahasy gny raha aby, ¹³ so hitanany reo zoron'gny tany dra hiozongozo hiala eo aminazy gny olo rasy fagnahy. ¹⁴ Niova manahaky gny fiovan'gny tanimanga ambanin'gny tombo-kase gny endriky gny tany; gny raha aby eo aminazy dra miavaky mazava soa manahaky gny fivalognan'gny lamba. ¹⁵ Lat'amin'ireo olo rasy fagnahy gny nangala gny hazavan'ereo; gny sandry misondrotr'ereo dra nitapahy. ¹⁶ Fa nandeha tagny amin'gny loharanon-dranomasy se hanao? Fa nandeha tagny amin'gny laliky ambany loasy se hanao? ¹⁷ Fa naseho taminiha se reo vavahadin'gny fahafatesa? Fa nahita reo vavahadin'gny aloky gny fahafatesa se hanao? ¹⁸ Fa nodinihinia se gny fivelaran'gny tany? Zakao Anahy, no fataniha aby zeho. ¹⁹ Eza gny lala magnagny amin'gny toera fisaharab'gny fahazava--- manahaky zeho gny ez, eza gny toerany? ²⁰ Afaky mitariky gny hazava vo gny ezy agny amin'ireo toeram-piasan'ereo se hanao? Hitaniha se gny lala mihery magnagny am-pasangen'ereo? ²¹ Fataniha sy am-pisalasala zeho, akory fa teraky tamin'izeho hanao; lava dra lava vatany gny isan'gny androniha! ²² Fa nilisy tao amin'gny fasange fitehiriza gny ranomandry se hanao, ndre fa nahita gny fasange fitehiriza gny havandra se hanao, ²³ reo raha ze nitahiriziko ho amin'ireo fotoam-pahoria, ho amin'ireo andron'gny aly? ²⁴ Eza gny lala hiselaran'gny varasy na miparitaky magneza geto amobin'gny tany reo sioky lat'agny asinagna? ²⁵ Ia gny nihaly reo lalan-drano ho an'gny tondrak'ora, na ia gny nanorisy gny lalan'gny fipoahan'gny varasy, ²⁶ so hapilasaky gny ora egny amin'ireo tany ze sy misy olo, vo egny amin'gny tany efisy, ze sy misy ndre ia ndre ia, ²⁷ so hahatateraha reo filan'ireo tany karakay vo efisy, ka hapisimoky gny ahi-mainso? ²⁸ Manan-dra se gny ora? Ia gny niteraky gny ranon'ando? ²⁹ Trokin'ia gny niavian'gny ranomandry? Ia gny niteraky gny fanala lat'agny an-danisy? ³⁰ Mivony gny rano sady nazary sahala amin'gny vato; nazary mivainga gny fanambonin'gny laliky. ³¹ Afaky misery reo rozo amin'ireo Ikotolkelimiadilaona se hanao, na mamaha gny talin'gny Telonohorefy? ³² Afaky mitariky reo vasia so hisaho amin'gny fotoa tokony ho izy se hanao? Afaky mitariky gny Bera mindray amin'ireo zanany se hanao? ³³ Mahafatasy gny lalagnan'gny lagnisy se hanao? Afaky mametraky gny lalagnan'gny lagnisy ambonin'gny tany se hanao? ³⁴ Afaky mapiaka-peo hatrany amin'gny raho se hanao, so handrakoafan'gny ranon'oram-be hanao? ³⁵ Afaky mandefa selasy se hanao so hahafahan'ereo miboaky, so hizakan'ereo ho: 'Tahoky zahay?' ³⁶ Ia gny nametraky fahendre tagny amin'gny raho na nagnome fahazavan-say tamin'gny zavo? Ia gny afaky magnisa gny raho amin'gny fahaizany? ³⁷ Ia gny afaky manondraky gny fitoeran-dranon'gny lagnisy ³⁸ nofa mitambasy ho fotaky lahibe gny botan sady mirekisy reo bainga-tany? ³⁹ Afaky misambosy haza ho an'gny liona vavy se hanao na magnome fahafaham-po gny haresen'ireo liony tanora ⁴⁰ nofa mamisaky ao amin'gny fitoerany sady manotriky ao amin'gny kirihisy ereo? ⁴¹ Ia gny mamasy haza ho an'ireo goaiky nofa mitaray amin'Agnahary sady mivembe nohon'gny sy fahampian-sakafo reo zanany?